21 февралы Хуссар Ирыстоны Генералон прокурор Дзæгъиаты Уырызмæг брифинг ауагъта Бастдзинад æмæ массон коммуникациты комитеты раздæры сæрдар Къæбысты Георгийы уголовон хъуыддаджы фæдыл.
Прокурор куыд банысан кодта, афтæмæй Къæбысты Георги аххосджын цæуы æхгæд акционерон æхсæнад «Остелеком»-ы кусгæйæ йæ æххæстбартæ кæй уæлдæр кодта, уый тыххæй, аххосджын та йæ фæкодтой «Остелеком» æмæ бастдзинады комитеты басгæрсты фæстиуджытæм гæсгæ. Слестгæнæн куыстытæ кæронмæ кæй нæ фесты, уый фæстиуæгæн, Къæбысты Георгийы ахæстоны уæвыны тæрхон дарддæргонд æрцыд 2018 азы 7 апрелы онг.
«Хъаст нæм куы æрбалæвæрдтой бархалынæдты тыххæй, цыран хайад иста Къæбысты Георги дæр æмæ æндæр адæймæгтæ дæр, уæд райдыдтой бæрæггæнæн куыстытæ «Остелеком»-ы æмæ Бастдзинад æмæ массон коммуникациты комитеты дæр. Бæрæггæнæн куыстыты фæстиуæгæн куыд рабæрæг, афтæмæй Къæбысты Георги Бастдзинад æмæ массон коммуникациты комитеты сæрдары бынаты кусгæйæ, «Остелеком»-ы исады иу хай радта комитетæн, иннæ хай та – æндæр адæймæгтæн. Уыцы исады номхыгъды сты автотранспорт æмæ æндæр спецтехникæ, кæцытæ æппæрст æрцыдысты, бирæ рæстæджы дæргъы гом арвы бын кæй уыдысты æмæ кæй фехæлдысты, уый тыххæй. Æппæт уыдæттæ 10 милуан сомы бæрц зиан æрхастой «Электробастдзинадæн», кæцыйы срегистраци кодта æмæ йæ Хъалонтæ æмæ æмбырдты комитеты хыгъды сæвæрдта Хъоцыты Валери»- фехъусын кодта Генералон прокурор.
Йæ ныхæстæм гæсгæ, ифтонггæрзтæ Хъоцыты Валери дæр балхæдта республикæйы территорийыл цифрæйон телеуынынад саразыны тыххæй. Ацы ифтонггæрзты иу хай разынд, фæлæ иннæ хай цы фесты, уый нырма бæрæг нæу.
Дзæгъиаты Уырызмæджы ныхæстæм гæсгæ, бæрæггæнæн куысты фæстæ рабæрæг «Остелеком»-ы æфтиаг дæр.
«2017 азы кампанийы æфтиаг уыд 100 милуан сомы. Мæнмæ гæсгæ, бастдзинады æвзæр гъæд æмæ зынаргъ интернет дæр уыдысты, «Остелеком»-æн йæ бон йе ‘фтиæгтæй пайда кæнын кæй нæ уыд, уый аххосаг», – загъта Генералон прокурор.
Уый куыд банысан кодта, афтæмæй Къæбысты Георги уыд хицауады æрдыгæй Æхгæд акционерон æхсæнад «Остелеком»-ы директорты советы сæрдар. Ацы бынаты кусгæйæ, уый архайдта хисæрмагонд интересты реализацийыл.
«Цы бынаты куыста, уымæй пайда кæнгæйæ, Къæбысты Георги паддзахады интерестæ нæ хъахъхъæдта, фæлæ йæхи сæрмагонд интерестæ. Аффилиргонд фирмæтыл подрядтæ лæвæрдта коммерцион структурæтæн, уыцы нымæцы республикæйæн æддейæ дæр æмæ сыл контроль дæр кодта йæхæдæг», – банысан кодта Дзæгъиаты Уырызмæг.
Уый куыд фехъусын кодта, афтæмæй 2010 азы аффилиргонд фирмæты стыр суммæтæ æрвыст цыдысты æддæмæ.
«Фирмæты уылты, кæцытæ, цыма æххæст кодтой цавæрдæр куыстытæ «Остелеком»-æн, Хуссар Ирыстонæн æддæмæ æрвыст æрцыд 622 милуан сомы. Æниу цыдæр куыстытæ конд цыдысты, фæлæ мах цы объектты бабæрæг кодтам, уым уыцы куыстытæн æппындæр ницы фæстиуæг уыд», – банысан кодта Дзæгъиаты Уырызмæг.
Уый куыд загъта, афтæмæй слестгæнæн куыстытæ нырма дæр нæ фесты, дарддæр æргом цæуынц паплойгонд суммæтæ. Республикæйы фирмæты уылты хардз æрцыд 180 милуан сомы бæрц. Ныртæккæ бæрæг цæуынц, æцæгæйдæр цы куыстытæ бакондæуыд, уыдон дæр æмæ «нывгонд» цы куыстытæ æрцыдысты, уыдон дæр. Прокуроры ныхæстæм гæсгæ, уыцы фактты тыххæй хыгъд лæвæрд æрцæудзæн Президентмæ дæр æмæ Парламентмæ дæр.
Генералон прокурор куыд радзырдта, афтæмæй бæрæг цæуынц æндæр фæткхалæнтæ дæр.
«2008 азы августы хæсты фæстæ Хуссар Ирыстоны территорийæ гуырдзиаг мобилон оператор куы ацыд, уæд республикæйы районты территоритыл ныууагъта 10 телемæсыджы. Алыгъуызон æфсæнтты фæстиуæгæн Къæбысты Георги йæ хæлар Джиоты Мирианимæ сæхи бакодтой, уыцы мæсгуытæ цы зæххы фадгуытыл æвæрд уыдысты, уыдоны. Уый фæстæ сарæзтой мæнг документтæ, цыма уыцы мæсгуытæ сæхи сæрмагонд зæххыл сæхæдæг сарæзтой сæхи сæрмагонд æхцайы фæрæзтæй» æмæ уыдоны иу хай у Джиоты Мирианы, иннæ хай та радтой, уыцы нысаны тыххæй цы фирмæ сарæзтой, уымæ», – бамбарын кодта Генпрокурор.
Уый куыд банысан кодта, афтæмæй слестгæнæн куысты фæстиуæгæн рабæрæг уыцы мæсгуытæ уæй кæй æрцыдысты «Остеклеком»-æн 23 милуан 700 мин сомыл. Уыцы æхцайы фæрæзты иу хай ахынцыд æрцыд, уыцы нысаны тыххæй цы фирмæ сарæзтой, уый хыгъдмæ, иннæ хай та – куыд физикон цæсгом, афтæ Джиоты Мирианы хыгъдмæ. Слестгæнæн куысты фæстиуæгæн куыд рабæрæг, афтæмæй уыцы æхцайы фæрæзтæ се ‘ппæт дæр ист æрцыдысты æмæ лæвæрд æрцыдысты Къæбысты Георгимæ.
Мадзалы рæстæджы дзырд цыд, Къæбысты Георгийы хæдзары басгæрсты рæстæджы цы ифтонггæрзтæ æмæ техникæ ссардæуыд, уыдоны тыххæй дæр.
Дзæгъиаты Уырызмæг куыд фехъусын кодта, афтæмæй ООО «Электробастдзинад»-ы гендиректор Хъоцыты Валерийыл дæр баконд æрцыд уголовон хъуыддаг, фæлæ йæ рæстæгмæ æрурæдтой, Хъоцыйы фырт рынчын кæй у, уый тыххæй.
«Хъоцыты Валери ООО «Электробастдзинад»-ы срегистраци кодта 2012 азы æмæ уыцы азæй фæстæмæ хъуамæ бафида, уæрæсейаг телеуынынады каналтæ, цæмæй нæ республикæйы территорийыл æвдыстаиккой, уый тыххæй цы æхцайы фæрæзтæ иста, уыдон. Ацы уынаффæйыл Хъоцыты Валери разы у, ома, паддзахады бюджетмæ уыцы суммæ бахæсдзæн хайгай».
Осиаты Индирæ
Comments are closed, but trackbacks and pingbacks are open.