18-ӕм май у музейы дунеон бон. Ацы бӕрӕгбоны цытӕн азӕй-азмӕ популярондӕр кӕны «Ӕхсӕв музейты» аразын ӕмӕ уый та нысан кӕны, музей куы фӕкусы ӕхсӕвӕй райсоммӕ.
Хуссар Ирыстоны Национ музей дӕр «Ӕхсӕв музейты» банысан кодта ныр дыккаг хатт. 17-ӕм майы изӕры аст сахатыл йӕ дуӕрттӕ уӕрӕх байгом кодта ардӕм цӕуджытӕн. Бӕрӕгбонон изӕры цытӕн музейы экспонаттимӕ хуыздӕр ба-зонгӕ кӕныны уӕлдай ма бацӕт-тӕгонд ӕрцыдис сӕрмагонд программӕ дӕр.
Бӕрӕгбонон изӕрмӕ фӕуазӕг сты нӕ республикӕйы Президент Бибылты Анатоли, Хицауады сӕрдар Пухаты Эрик, Генералон прокурор Дзӕгъиаты Уырызмӕг ӕмӕ ӕндӕр бӕрнон адӕймӕгтӕ. Банысан кӕнын хъӕуы уый ӕмӕ ацы бӕрӕгбонон изӕрмӕ ӕрбацыдис тынг бирӕ адӕм, уӕлдайдӕр та фӕсивӕд ӕмӕ сабитӕ. Кӕстӕр фӕлтӕр дӕр стыр цымыдисимӕ зонгӕ кодтой музейы экспонаттимӕ.
Уазджытӕ нӕ республикӕйы разамонджытимӕ куы азылдысты музейы залты, куы базонгӕ сты лӕмбынӕг йӕ экспонаттимӕ, уӕд сын уый фӕстӕ нӕ горӕты мӕскуыйаг микрорайоны 1-ӕм скъолайы ахуыргӕнинӕгтӕ равдыстой цымыдисон концерт.
Бӕрӕгбонон арфӕйы ныхӕстимӕ ӕрӕмбырдуӕвджыты раз раныхас кодта нӕ республикӕйы Президент Бибылты Анатоли:
Абон ӕцӕгӕйдӕр стыр бӕрӕгбон у. Ахӕм бӕрӕгбонон изӕр фыццаг уагъд ӕрцыд Мӕскуыйы. Мах ӕй иууылдӕр тынг хорз зонӕм цалдӕр азы размӕ нӕ музей цы уавӕры уыдис, уый. Йӕ экспонаттӕ та ӕфснайд уыдысты Дзӕуджыхъӕуы. Фӕлӕ абон, табу Хуыцауӕн, Уӕрӕсейы руаджы арӕзт ӕрцыдис ӕмӕ сын уый тыххӕй зӕгъӕм стыр бузныг.
Банысан кӕнын ма мӕ фӕнды уый ӕмӕ цалдӕр азы размӕ нӕ республикӕйы уазӕгуаты уыдысты Донецкы ӕмӕ Луганскы Адӕмон Республикӕты минӕвӕрттӕ, уыдон ӕрбацыдысты ацы музеймӕ ӕмӕ сӕ дисы баппӕрста Тугъанты Махарбеджы конд ныв «Куыдзӕппарӕн къӕдзӕх». Донецкмӕ кусӕгон балцы куы ацыдтӕн, уӕд Донецкы Адӕмон Республикӕйы сӕргълӕууӕг Александр Захарченко ӕппӕт ӕрӕмбырдуӕвджытӕн дӕр стыр цымыдисимӕ радзырдта ацы нывы истори ӕмӕ мидис. Ӕз, зӕгъгӕ, сӕ музеймӕ бацӕугӕйӕ, бамбӕрстон ирон адӕмы бӕрзонд ахаст цардмӕ, рӕстдзинадыл хӕст цӕмӕн сты ӕппӕт уыдӕттӕ.
Куыд уынӕм, афтӕмӕй ӕрмӕст ацы ныв нӕ, фӕлӕ нӕ музейы ӕппӕт экспонаттӕй алкӕцыйӕн дӕр ис стыр нысаниуӕг. Абон ардӕм чи ӕрбацыдысты, уыдоны ‘хсӕн кӕд фыццаг хатт чи ӕрбацыдис ахӕм ис, уӕд уыдонӕн уӕлдай ахъаз фӕуыдзӕнис нӕ адӕмы историйы элементтӕ базонынӕн. Ӕз та зӕрдӕбын арфӕ кӕнын бӕрӕгбоны цытӕн нӕ музейы ӕппӕт кусджытӕн!
Национ музейы бӕрӕгбонон изӕрмӕ ӕрбацӕуджытӕ арвыстой хъӕлдзӕг рӕстӕг. Музейы иу кӕрон уагъд цыдис хъазтизӕр, кӕм та дзы кодтой ирон уӕлибыхтӕ, нартхоры кӕрдзынтӕ, арӕзтой дзыкка ӕмӕ нуӕзтой ирон бӕгӕны. Ӕрбацӕуджытӕм стыр цымыдис ӕвзӕрын кодта, ирон адӕм уӕлдай аргъ кӕмӕн кӕнынц, уыцы «Цыкурайы фӕрдыг» ӕмӕ сын уый фенын дӕр бантыст.
Туаты Ларисӕ
Comments are closed, but trackbacks and pingbacks are open.