Хæдбардзинады Акт райсыны бæрæгбоны цытæн 27-æм майы Республикæ Хуссар Ирыстоны нывгæнджыты цæдисы равдыстыты залы байгом ис равдыст «Это наша с тобою земля», зæгъгæ, ахæм номимæ.

РХИ-йы Нывгæнджыты цæдисы сæрдар Цхуырбаты Тамерлан нын куыд загъта, уымæ гæсгæ мадзал сорганизаци кодтой РХИ-йы Культурæйы министрад æмæ РХИ-йы Нывгæнджыты цæдис иумæ.

«Мах ацы равдыст сæрмагондæй бацæттæ кодтам Хæдбардзинады Акт райсыны бæ-рæгбоны цытæн æмæ дзы хайад исынц нæ республикæйы нывгæнджытæй бирæтæ. Се ‘хсæн сты куыд хистæр кары, афтæ кæстæр кары нывгæнджытæ дæр. Аивад, куыд фæзæгъынц, уымæ гæсгæ у æнæкæрон æмæ дзы хъуамæ алчидæр хайад иса. Равдысты цы нывтæ конд ис, уыдонæн сæ фылдæр сты тематикон, ома, Хуссар Ирыстон бирæ азты дæргъы куыд цардис æмæ размæ куыд цыдис, уыцы рæстæджы цардæй ист уацмыстæ. Нывгæнджытæй ацы хъуыддаг кæуыл куыд бандæвта æмæ сæ куыд уыдта, уымæ гæсгæ сæ рафæлгъуыдта йæхирдыгонау. Равдысты конд куыстытæ иу-уылдæр сты цымыдисон æмæ сын аргъгæнæг уыдзысты нæ бæстæйы цæрджытæ сæхæдæг. Равдысты ма ис сæрибар темæ-тыл конд нывтæ дæр æмæ уыдон дæр сты цымыдисон. Табуафси, æрбацæуæд æмæ фенæд ныв-гæнджыты сфæлдыстад», — загъта Цхуырбаты Тамерлан.

РХИ-йы Нывгæнджыты цæдисы сæрдар ма нын куыд загъта, уымæ гæсгæ равдыст уагъд цæудзæн дæс боны дæргъы райсомæй изæры фондз сахатмæ.

Равдысты, æцæгæйдæр, фенæн ис цымыдисон нывтæн, иу дзы иннæмæй аивдæр, æмæ бирæ цæуылдæрты дзурæг. Уыдон нымæцы сты нывгæнджытæ: РХИ-йы адæмон нывгæнæг Бежанты Вадим «Чындзæхсæв», Харебаты Ацæмæз «Пейзаж с озером», «Уалдзæг», Уалыты Дзерассæ «Джер», Козаты Ушанг «Героям Осетии», Сабанты Анжелæ (Хуссар Ирыстоны фыццаг ирон сылгоймаг, сгуыхт нывгæнæг) «Вестник нового дня», Æлборты Æхсæртæг  «Вечным  героям»,  Зессеты Сæрмæт  «Фыдохы  зарæг,  Цхуырбаты Тамерлан «Южная Осетия 1989-2008», æмæ бирæ æндæртæ.

Равдысты ма хицæнæй нывгæнæг дзæнæттаг Фæрниаты Ростикæн арæзт æрцыд къуым, цыран æвæрд æрцыдысты уымæн йæ нывтæй цалдæр.

Банысан кæнын хъæуы уый, æмæ ацы равдыстæй адæймаг кæй райсдзæнис æхцондзинад æмæ дзы, чизоны, кæцыдæр нывтæн разына бынæттæ не ‘мбæстæгты хæдзæртты.

Цхуырбаты Л.

Comments are closed, but trackbacks and pingbacks are open.