Ирон журналистикæйыл æрцыд уæззау зиан. Уæззау рынчыны фæстæ 77-аздзыдæй йæ цардæй ахицæн йæ радтæг адæмы æцæг патриот, РХИ-йы сгуыхт журналист Туаты Шота Савелийы фырт.
Туаты Шота райгуырд 1939 азы Цхинвалы районы Махисы хъæуы. 1959 азы Громы хъæуы астæуккаг скъола каст фæуыны фæстæ ахуыр кæнынмæ бацыд Тыбылты Алыксандры номыл Хуссар Ирыстоны паддзахадон педагогон институты филологийы факультетмæ. 1964 азы институт æнтыстджынæй каст фæуыны фæстæ йæм æрсидтысты Советон æфсады рæнхъытæм. Йе ‘мбæстагон хæс бафидыны фæстæ æрыздæхт йæ райгуырæн Ирыстонмæ æмæ кусын райдыдта Цхинвалы районы Бихъары хъæуы астазон скъолайы уырыссаг æвзаг æмæ литературæйы ахуыргæнæгæй. Ацы скъолайы 4 азы бакусыны фæстæ та йæм ногæй æрсидтысты Советон æфсадмæ кадрон службæмæ. Демобилизацигонд æрцыд капитаны цины.
1971 азы Туаты Шота кусын райдыдта газет «Советон Ирыстон»-ы редакцийы корректорæй æмæ уый фæстæ та – уацхæссæгæй. Уацхæссæгæй кусгæйæ, раргом йæ журналистон курдиат æмæ 1977 азы фæсаууонмæ ахуыр кæнынмæ бацыд Ростовы паддзахадон университеты журналистикæйы факультетмæ, кæцыйы каст фæци æнтыстджынæй. Йæ намысджын куысты тыххæй фæстæдæр нысан æрцыд газет «Советон Ирыстон»-ы хъæууонхæдзарадон хайады сæргълæууæгæй, цыран фæкуыста бирæ азты дæргъы. Редакцийы кусгæйæ, Ирыстоны ахæм къуым нал баззад, Шота кæм нæ балæууыд æмæ дзы газетæн æрмæг кæцæй не ‘рхаста. Йæ уацтæ та алы хатт дæр уыдысты мидисджын æмæ йын сæ газеткæсджытæ æхсыз-гонæй агуырдтой æмæ кастысты. Уыд æнахуыр куыстуарзаг журналист.
Уый фæстæ та нысан æрцыд газет «Южная Осетия»-йы редакторы хæдивæгæй. Фæстæдæр та ссис ацы газеты сæйраг редактор. Æдæппæтæй йæ журналистон стаж у 37 азы. Уал азы дæргъы йын журналисты уæззау уаргъ хæссын та æнцон кæцæй уыд, арæх-иу æй бахъуыд критикон уацтæ æмæ фельетонтæ ныффыссыны сæр дæр. Туаты Шота йæ зæрдæ никуы сивта йæ равзаргæ дæсныйадыл. Бирæ хæттыты ссис алыгъуызон конкурсты лауреат, куыд, зæгъæм, «Хуыздæр репортаж»-ы лауреат.
Фæстаг азты та йæ цард снывонд кодта рæзгæ фæлтæры хъомыладæн. Хуссар Ирыстоны университеты журналистикæйы факультет куы бакодтой, уæдæй фæстæмæ ныр 23 азы бæрц суанг йæ амæлæты бонмæ йæ зонындзинæдтæ рæдауæй амыдта йе студенттæн. Уыд журналистикæйы кафедрæйы доцент. Уал азы дæргъы схъомыл кодта бирæ хорз журналистты, кæцытæ абон кусынц республикæйы дзыллон информацийы фæрæзты. Туаты Шота 20 азы бæрц уыд Хуссар Ирыстоны Коммунистон партийы газет «Красное знамя»-йы редактор. Афтæ ма уыд Хуссар Ирыстоны паддзахадон университеты газет «Вестник Осетии»-йы редактор дæр. Университеты кусгæйæ ма уыцы иурæстæджы æртæ азы бæрц 2016 азы онг бакуыста РХИ-йы Парламенты консультант-тæлмацгæнæгæй. Куыста ма РХИ-йы Фæсарæйнаг хъуыддæгты министрады тæлмацгæнæгæй дæр.
Туаты Шота Савелийы фырт кодта æхсæнадон куыст дæр. Хайад иста алыгъуызон симпозиумты æмæ ирон адæмы съездты. Уый ма уыд II æмæ III-æм æрсидты Парламенты депутат дæр.
Йæ намысджын æмæ æвæллайгæ куысты тыххæй Туаты Шота хорзæхджын æрцыд бирæ паддзахадон хор-зæхтæй. 1999 азы йын лæвæрд æрцыд «РХИ-йы сгуыхт журналист»-ы кадджын ном. 2005 азы та – «Фæллойы ветеран»-ы ном. Афтæ ма хорзæх-джын æрцыд бирæ майдантæ æмæ Кады грамотæтæй.
Туаты Шота Савелийы фырты ном никуы ферох уыдзæн, чи йæ зыдта, уыдонæй. Рухсаг у!
Газет «Хурзæрин»-ы коллектив
Comments are closed, but trackbacks and pingbacks are open.