2022-2025 азты социалон-экономикон рæзты паддзахадон программæйы фæлгæтты инвестпроекттæ æвзæрст цæудзысты карзæй

12 августы агентад «Спутник-Южная Осетия» сæвæрдта хъæууон хæдзарад æмæ сæудæджерады фадыджы инвестицион проектты тыххæй видеоролик, цыран дзырдæуы 2022-2025 азты Республикæ Хуссар Ирыстоны социалон-экономикон рæзты паддзахадон программæйы фæлгæтты (дарддæр – Программæ) реализацигонд.

Уый фæстæ фехъусын кодта интернет-аудиторийæн, зæгъгæ, видеороликы цы инвестпроектты номхыгъд ис, уыдоныл нырма дзурæн кæй нæй, уымæн æмæ сæ реализацийы процесс нæма райдыдта. Ныртæккæ уал кæцы проекттæ схистæр кæнын хъæуы, уый бæлвырд кæнын райдыдтой.

Экономикон рæзты министры фыццаг хæдивæг Хуыбылты Екатеринæ куыд фехъусын кодта, афтæмæй проекттæн кредиттæ лæвæрд цæуынц экономикон рæзты министрады цур Æхсæнведомствæйон къамис кæй равзары, уыдонæн. Хуыбылты Екатеринæйы ныхæстæм гæсгæ, уавæртæ сты карз: хъуамæ хорзыл нымад æрцæуой бизнес-плантæ æмæ проекты фæдыл кредитон хахх.

Зæрдыл дарын кæнæм, 4-æм августы Мæскуыйы Уæрæсейы Федерацийы æмæ Республикæ Хуссар Ирыстоны ‘хсæн къухтæ фыст кæй æрцыд 2022-2025 азы Республикæ Хуссар Ирыстоны социалон-экономикон рæзты паддзахадон программæ реализацийæн ахъаз кæнынæн сразыдзинадыл.

Программæ бæрæг кæны æввахс рæстæджыты республикæйы социалон-экономикон рæзты сæйраг хæстæ, кæцытæ здæхт сты цæрджыты социалон фæрныгад фæхуыздæр кæнынмæ.

Программæйæн æхцайы фæрæзтæ хицæн æрцæудзысты уæрæсейаг финансон æххуысы æхцайы фæрæзтæй, афтæ ма республикæйы бюджетæй.

Программæмæ гæсгæ, уæрæсейаг фарс финансон æгъдауæй ифтонг кæны чысыл амалиуæгад, сæудæджерадон куыстуæттæ, хъæууонхæдзарадон куыстуæтты, ома радтын кредиттæ.

Хуссар Ирыстон паддзахадон бюджеты хыгъдæй хæсджын у хæдзарадон субъекттæн æххуыс кæнын, сæйраджы дæр, хъалонон преференциты хуызы.