Республикæ Хуссар Ирыстон тъæнджы мæйы, традицион æгъдаумæ гæсгæ нысан кæны йæ ног историйы зæрдылдарæн бонтæй сæ иу – йæ хæдбардзинады референдумыл 25 азы сæххæсты бон, кæцы уагъд æрцыд тъæнджы мæйы 19-æм бон 1992 азы. Уыцы бон Республикæйы цæрджытæн сæ 99% фæндвидарæй аскъуыддзаг кодтой: Хуссар Ирыстон хъуамæ уа хæдбар.

Уыцы къахдзæф хуссарирыстойнаг дзыллæ сарæзта йæ сæрибардзинад æмæ хæдбардзинады тыххæй æхсæнадæмон барадмæ  гæсгæ. Дарддæры къахдзæф та уыд, референдумы хатдзæгтыл чи бындуриуæг кодта, РХИ-йы паддзахадон хæдбардзинады уы-цы Акты райст. Уыцы Акт райст æрцыд Республикæйы Сæйраг Советы сессийы зæрдæвæрæны мæйы 29 боны. Æмæ уымæ гæсгæ юридикон æгъдауæй расидт æрцыд Республикæ Хуссар Ирыстон.

Чысыл историйæ дæр. 1991 азы цыппурсы мæйы, Советон Цæдис куы ныппырх, уæд нæ адæмы раз слæууыд сæ фидæн сбæрæг кæныны ахсджиаг фарст комкоммæдæр Шекспиры ныхæстæм гæсгæ: уæм æви ма уæм?!» Уæд Уæрæсе бацахста ИНО-йы Советон Цæдисы бынат, йæхимæ райста пырх паддзахады æддагон хæстæ бафидын, афтæ ма Советон Цæдисы æнæхъæн ядерон хæцæнгæрзтæм лæмбынæг хъус дарыны хæс дæр. Ацыран банысан кæнын хъæуы, чысыл нацитæм, раздæры автономитæм уый кæй нæ хауд. Уыдонæн ныхасы бар нæ уыд, фæлæ сæ закъæттæм гæсгæ алы автономийæн дæр Советон Цæдисы скондæй рахизыны сæраппонд уыд референдум ауадзыны бар æмæ уыцы фæстиуджытæм гæсгæ баззайын Цæдисы сконды.

Раст уыцы рæстæджы РХИ-йы адæм дæр барджынæй спайда кодтой сæ бартæй æмæ 1992 азы ауагъд æрцыд референдум. Æрмæстдæр ацы къахдзæф уыд Хуссар Ирыстоны дзыллæйы иунæг ирвæзынгæнæг. Стыр хъыгагæн, уæдмæ хуссарирыстойнæгтæ æвдисæнтæ систы бирæ зындзинæдтæ æмæ трагикон цаутæн, æгæр стыр æмæ уæззау аргъ бафыстой –  сæдæгай мæрд-тæй, мингай цæфтæй. Мингай ирæттæ та, удхар æмæ фыдмитæ бавзаргæйæ, лидзинаг фесты сæ цæрæн бынæттæй.

Иудзырдæй, юридикон æгъдауæй нæ адæм фæндвидарæй цыдысты сæ хæдбардзинадмæ. Æп-пæт уыдæттæм гæсгæ æвæстиатæй ауадзын хъуыд референдум.

1992 азы референдумы  сдзуапп кæнын хъуыд дыууæ фарстæн:

1) Фæнды дæ, цæмæй Хуссар Ирыстон хæдбар паддзахадæй баззайа?

2) Фæнды дæ, цæмæй Хуссар Ирыстон бацæуа Уæрæсейы скондмæ?

Æнцон нæ уыдысты референдуммæ цæттæ кæныны мадзæлттæ. Иуæрдыгæй æфсæддон æмæ экономикон æндыгъд уавæр, иннæрдыгæй – Хуссар Ирыстоны адæм ныфс кæмæй æвæрдтой, референдумы уыцы организатортæ ныхкъуырд æййæфтой.

Бæрæг у, «сахъатджын» Звиад Гамсахурдиа нын нæ референдумы æнаипп бындуртæ æмæ бартæ хорз кæй æмбæрста. Дзасохты Александры фæрцы уый бахатыд РЦИ-Аланийы уæды сæргълæууæг Галазты Æхсарбегмæ, цæмæй уый ма бауадза РХИ-йы референдум ауадзын, кæнæ та гæнæнуæвгæйæ, бафæлвара референдум ауадзыны хъуыддаг аргъæвын æбæлвырд рæстæгмæ. Уый та Гуырдзыстонæн уыд тынг ахсджиаг –  нæ сыхæгтæ тарстысты, цалынмæ ИНО Гуырдзыстоны хæдбардзинад нæ банымайой, йæ раздæры арæнтимæ (РХИ-йы æмæ Абхазы республикæйы территоритæ), уæдмæ РХИ-йы адæмæн ма бантыса ауадзын референдум. Раст зæгъгæйæ, референдумы ныхмæлæу-джытæ уыд РХИ-йы дæр, фæлæ уыдон бирæ нæ уыдысты. Уыдон хъуыды кодтой, зæгъгæ, нырмæ дæр хорз куы цардыстæм.

Референдумы инициатортæй сæ иу, Дзиццойты Юри нæ рох кæны иу ахæм цымыдисон цау: «РХИ-йы бюллетенты сфидар кодта РХИ-йы Сæйраг Совет, мыхуыр сæ кодтой Дзæуджыхъæуы –  бæрæг аххосæгтæм гæсгæ сын нæхимæ ныммыхуыр кæныны фадæттæ нæ уыд. Æмæ нын бюллетентæ куы æрластой, уæд рабæрæг: сæ фарстытæ уыдысты бынтон æндæргъуызон, æндæр мидисимæ. Уыцы гæххæттытæ фенгæйæ мæ дисæн кæрон нал уыд æмæ уайтагъддæр бахатыдтæн хицауадмæ. РХИ-йы Сæйраг Советы уынаффæ æнæивдæй баззад,  мах та скуынæг кодтам уыцы мæнг бюллетентæ. Растдæр уыцы æхсæв сарæзтам ногтæ, нæ бæстæйы хъысмæт цæмæй скъуыддзаг кодта, уыцы дыууæ фарстимæ. Кæцыдæр ныхмæлæууæг тыхтæн нæ бантыст референдум ауадзыны хъуыддаг сзы-гъуыммæ кæнын, фæлæ сын ницы бантыст.

Хъæлæс дæттыны процесс ацыд æнтыстджынæй, бæрзонд æмвæзадыл,  хайад дзы райстой нæ республикæйы цæрæг гуырдзиæгтæ дæр. Æгæрыстæмæй, Цхинвалы æвзарæн фадгуытæй сæ иуы сæрдар уыд гуырдзиаг сылгоймаг. Хæдбардзинады тыххæй схъæлæс кодта æгас хуссарирыстойнаг дзыллæ – 99 %. Референдумы хайад райстой 53 минæй фылдæр адæймаджы. Æвзæрстыты фæстиуджытæ уыдысты ахæм:

1) Æмбæстæгты нымæц, бюллетентæ чи райста –   53 441.

2)  Æмбæстæгты нымæц, хъæлæс чи радта – 53 441.

3) Æмбæстæгты нымæц,- «разы»-йы дзуапп чи радта – 53 338.

4) Æмбæстæгты нымæц,- «æнæразы»-йы дзуапп чи радта – 48.

Ам банысан кæнын хъæуы иу факт: Уæрæсейы скондмæ бацæуыны фарст бирæ азты дæргъы цы политикон быцæуты пайдагонд цæуы, уый ацы референдумы фидаргонд æрцыд æмæ ницы хуызы йæ фыццаг фарсты ныхмæ нæ лæууы, иуæй-иутæ куыд æнхъæ-лынц, афтæ. Уыдон кæрæдзийы ныхмæ лæууæг уагæвæрдтæ не сты. 1992 азы уый нæ адæм хорз æмбæрстой, фæлæ цыдæр æбæлвырд аххосæгтæм гæсгæ абон айрох бирæтæй. Афтæмæй та ацы референдум у раст къахдзæфты бæрæггæнæн. Уæрæсейы закъæт-тæм гæсгæ Уæрæсейы скондмæ ис бар бацæуын æрмæстдæр куыд æндæр паддзахады хай афтæ нæ, фæлæ куыд хицæн паддзахад, афтæ (уæд Хъырымы цæвиттон нæма уыд).

Рæстдзинадыл бындуриуæггæнгæйæ, Хуссар Ирыстоны адæм сбæлвырд кодтой ацы историон æмæ æмбаргæ равзæрст. Уый стыр ахъаз уыд 2006 азы референдумы фæстиуджытæн дæр – нæ дзыллæйы 99%  ногæй схъæлæс кодтой хæдбардзинады тыххæй.

Банысан кæнын хъæуы, не ‘ппæт дæр хорз кæй æмбарæм, Уæрæсейы скондмæ бацæуыны фарст æмæ Цæгат Ирыстон-Аланиимæ баиу уæвыны фарст абоны боны фарстытæ кæй не сты. Йæ афон куы ‘рцæуа, уæд Хъырымы цæвиттонмæ гæсгæ, ацы фарстытæ дæр цæстыфæныкъуылдмæ скъуыддзаг æрцæудзысты. 1992 азы референдум та бæлвырд у, уый фаг у. Уый тыххæй истори зыгъуыммæ кæнын нæ хъæуы, нæхицæй ног референдумы цагъайрæгтæ аразгæйæ. Хъæуы кусын æмæ архайын, нæ къухы абон цы ис, æрмæстдæр уыдæттыл бындуриуæггæнгæйæ.

ПЕТРАЧЕНКО Андрей, политолог

Comments are closed, but trackbacks and pingbacks are open.