Республикæ Хуссар Ирыстоны адæмон артисткæ Гугкаты Эвелинæйы 80 азы юбилейы цытæн лæвары хуызы бацæттæгонд æмæ рауагъд æрцыдис хуызджын альбом «Сценæйы ус-паддзах», кæцыйæн финансон æххуыс бакодта нæ республикæйы Президент Бибылты Анатоли. Хуызджын альбомæн презентаци уыд Хетæгкаты Къостайы номыл Паддзахадон драмон театры.
Презентацийы хайад райстой Республикæ Хуссар Ирыстоны Президент Бибылты Анатоли, Хетæгкаты Къостайы номыл паддзахадон драмон театры коллектив сæ директор Уалыты Мадинæйы сæргълæудæй, афтæ ма Гугкаты Эвелинæйы сфæлдыстадæн табугæнджытæ æмæ йе ‘ввахс æмбæлттæ.
Мадзалы райдианы экраныл равдыстой спектаклæй ист кадртæ артисткæйы хайадистæй. Дарддæр æхсæнадимæ бастдзинæдты фæдыл театры хайады сæргълæууæг, юбилейон альбомы редактор Зæгъойты Рада æрæмбырдуæвджыты зæрдыл æрлæууын кодта, Гугкаты Эвелинæйыл ивгъуыд аз 18 сентябры 80 азы кæй сæххæст ис æмæ йæ юбилейы цытæн уагъд кæй æрцыдысты бæрæгбонон мадзæлттæ. Уæд загъдæуыд ахæм хъуыды дæр, цæмæй юбиляры цард æмæ сфæлдыстады тыххæй уагъд æрцыдаид хуызджын альбом. Æмæ ныр уый рухс федта. Рацыд 300 экзем-плярæй. «Гугкаты Эвелинæ махæн у ахæм артисткæ, кæцы Хуссар Ирыстоны паддзахадон театры райрæзт-мæ бахаста стыр хайбавæрд. Уымæн йæ лæггæдтæ бирæ сты ирон культурæйы раз. Адæмон артисткæ театры архайдта 55 азы бæрц, цыран сæххæст кодта бирæ æндæр æмæ æндæр цымыдисон рольтæ. Фæлæ уыцы рольты сæйраг бынат ахсынц ус-паддзахы рольтæ æмæ нæ альбомы дæр рахуыдтам афтæ», – банысан кодта Зæгъойты чызг.
Альбомы райдианы Гугкаты Эвелинæйы цард æмæ сфæлдыс-тады тыххæй лæмбынæг фыссы Хетæгкаты Къостайы номыл премийы лауреат, профессор Плиты Гацыр. «…Зарæг райхъуысы уæлвонг быдыртæй, цъæхсæр къæдзæхтæй, бæрзонд урс хæхтæй. Уыдæттæй абон дæр хайджын у бæрзонд Урстуалгом – мæсгуыты бæстæ. Уым, Едысы хъæуы райгуырд, уым арвыста йæ сабион бонтæ РХИ-йы адæмон артисткæ Гугкаты Лентъойы чызг Эвелинæ.
Зæнæджы кæстæр у Эвелинæ, райгуырд 1938 азы, йæ сабион бонтæ дæр уым арвыста, астæуккаг скъола та каст фæцис Дзæуджыхъæуы. Скъолайы фæстæ Хуссар Иры фæсивæды иу хаимæ ахуырмæ ацыд Мæскуымæ театралон институтмæ. Сæ ахуырæй æрыздæхтысты 1961 азы æмæ уæдæй абонмæ Эвелинæ уæхскуæзæй кусы нæ театры сце-нæйыл.
Алы дæсныйадæн дæр ис йæхи рахæцæнтæ. Эвелинæйæн йæ саразгæ фæлгæндзты нымæцмæ зæрдæ не ‘хсайы, сты 150 фылдæр, куыд сæ ахъазыд, куыд сæм сырæхст, уый та адæм, сценæмæкæсджытæ хъуамæ зæгъой, æмæ йæ загътой. Уый у курдиатджын драматикон актрисæ. Йæ курдиат уæлдай тынгдæр фæбæрæг героикон æмæ арф социалон рольты. Эвелинæ арæхстджын у фæлгæндзты миддунейы миниуджытæ райхалынмæ. Дæсны у сценæйон техникæйæ. Арæхстджынæй æххæст кæны комедион æмæ сатирикон рольтæ дæр…», – арфæйы ныхæстимæ фыссы Плиты Гацыр.
Альбомы дыккаг хайы та уырыссаг æвзагыл бæстонæй фыст цæуы артисткæйы царды тыххæй, суанг йæ райгуырдæй абоны бонмæ.
Презентацийы театры артисттæ арфæ æмæ бузныджы ныхæстæ дзырдтой Гугкаты Эвелинæйæн.
Быценты Циснари дæр банысан кодта, артисткæйы профессионализм æмæ йæ райгуырæн Ирыстонæн та патриоткæ кæй у, уый. «Йæ рæстæджы мын Гугкаты Эвелинæ куы нæ уыдаид, уæд, æвæццæгæн, нæ театры сценæйыл нæ хъазыдаин. Эвелинæ у тынг хорз адæймаг, кæстæр фæлтæрæн дæнцæг æмæ зондамонæг», – зæгъы Быценты чызг.
Поэтессæ Чехойты Оля дæр сразы ис иннæтимæ æмæ уый дæр арфæ ракодта Гугкаты Эвелинæйæн. Уый ма бакаст йе ‘мдзæвгæ, кæцы у ар-тисткæйы номыл.
Театры актер Мамиты Григори дæр йæ арфæйы ныхæстимæ банысан кодта, зæгъгæ, Гугкаты Эвелинæйы хуызæн курдиатджын гоймæгты цур, кæстæр фæлтæр дæр кæй вæййынц сæ куысты æмæ царды дæр тыхджын, уый æмæ йæ хистæр коллегæйæн бакодта зæрдылдарынæн чысыл лæвар.
Республикæ Хуссар Ирыстоны Президент Бибылты Анатоли дæр сразы раныхасгæнджытимæ, Гугкаты Эвелинæйы тыххæй цы хъуыды кæнынц æмæ цы загътой, уый тыххæй. «Альбом рауадзыны хъуыддаг уыд театры коллективы фæндон. Уыдон æхсызгонæй фæндыд, цæмæй нæ адæмон артисткæйæн бакодтаиккой ахæм лæвар. Æмæ æз та сразы дæн уыцы фæндонимæ. Альбом стыр нæу, фæлæ у рæсугъд, хуызджын. Мæн фæнды зæгъын уый æмæ кæй дæн зонгæ æмæ кæй цæрын Гугкаты Эвелинæйы хуызæн курдиатджы артистты рæстæджы. Мæнæн тынг æхсызгон у кæй зыдтон дзæнæттаг Гæбæраты Дауыты. Кæй зæгъын æй хъæуы, уыдоны рæстæ-джы артисттæй бирæты нæ хъуыды кæнын. Уыдон тыххæй йæ рæстæджы уагъд не ‘рцыдысты чингуытæ, науæд та абон кæй презентаци кæнæм, ахæм æнгæс альбомтæ. Абон мæнæн тынг цымыдисон уыдаид уыцы курдиатджын артистты тыххæй сæ альбомтæ рафæлдахын æмæ сын се сфæлдыстадимæ базонгæ кæнын», – загъта Бибылты Анатоли. Нæ бæстæйы сæргълæууæг дæр бузныг æмæ арфæйы ныхæстæ загъта артисткæйæн йе стыр курдиаты тыххæй æмæ йын йæ цæст бауарзта æнæниз цард бирæ азты дæргъы.
Мадзалы кæрон Гугкаты Эвелинæ дæр йæ рады бузныджы ныхæстæ загъта æппæтæн дæр ахæм стыр хъусдард здæхт æм кæй ис æмæ йын йæ юбилейы цытæн бæрæгбонон изæртæ кæй бацæттæ кодтой. «Æз 55 азы бæрц фæкуыстон театры, фæлæ нæм никуы уыдис хъусдард здæхт, ныртæккæ нæм куыд ис, афтæ. Анатоли Ильяйы фырт, цæстмæ ныхас мын нæу, фæлæ, æцæгæйдæр, уыцы бирæ азты дæргъы æз фыццаг хатт федтон æмæ банкъардтон нæ хицауады ‘рдыгæй ахæм хорз ахаст æмæ хъусдард здæхт театрмæ», – загъта Гугкаты Эвелинæ.
Презентацийы кæрон æрæмбырдуæвджытæн адæмон артисткæ йæ къухфыстимæ лæвар кодта йæ альбом.
ЦХУЫРБАТЫ Ларисæ
Comments are closed, but trackbacks and pingbacks are open.