Куыд зонæм, афтæмæй нæ республикæйы Президент Бибылты Анатоли кусæгон балцы ис Республикæ Никарагуайы. Паддзахады сæргълæууæг хайад райсдзæн Сандинистон революцийыл 40 азы сæххæсты сæраппонд цытджын мадзæлтты. Кæд Хуссар Ирыстон æмæ Никарагуайы ‘хсæн стыр дæрддзæг ис, уæддæр нæ уый нæ хъыгдары  хæлардзинад фидар кæнынæн.

Манагуайы аэропорты Бибылты Анатолийыл фембæлдысты Никарагуайы Фæсарæйнаг хъуыддæгты министры хæдивæг Луис Альберто Молина Куадра æмæ Никарагуайы Президенты уынаффæгæнæг, Уæрæсеийы Федерациимæ базарадон-экономикон  æмæ инвестицион фарстаты фæдыл сæрмагонд минæвар Лауреано Ортега.

Уыцы бон Республикæ Хуссар Ирыстоны Президент Бибылты Анатоли фембæлд Никарагуайы Фæсарæйнаг хъуыддæгты министр Денис Монкадоимæ.

Дыууæ фарсы уынаффæ кодтой дыууæфарсон æмкуысткæнынады фарстаты тыххæй, кæрæдзийæн загътой сæ хъуыдытæ бирæ фарстаты фæдыл.

Министр банысан кодта, зæгъгæ, цытджын уазæг – хæларадон бæстæйы Президенты æрцыд Никарагуамæ – ахсджиаг цау у.

«Революцийы бæрæгбон нысан кæнынæн ис тынг ахсджиаг историон æмæ политикон нысаниуæг. Де ‘рцыдæй ноджы иу хатт фидаргонд æрцыд дыууæ бæстæйы ‘хсæн хæларадон ахастытæ æмæ æмкуысткæнынад фидарæй-фидардæр кæй кæны, уый», – загъта Денис Монкадо.

Бибылты Анатоли бузныг загъта фысымæн, æппæт никарагуайæгтæн ахæм нысаниуæгджын бæрæгбонмæ йæ кæй фæхуыдтой, уый тыххæй æмæ  раарфæ кодта министрæн, ахæм историон цаутыл 40 азы сæххæсты цытæн

«Тынг æхсызгон мын у ам уæвын, Никарагуайы адæм сæ фидæн куы сбæрæг кодтой, уыцы бон, кæцы баст у рæстдзинад æмæ паддзахады рæзтимæ. Хуссар Ирыстонæн æхсызгон сты Никарагуайы æппæт позитивон къахдзæфтæ. Сæрибардзинадмæ тырнындзинадæй нæ адæмтæ æмхуызон сты», – банысан кодта Президент.

Уый банысан кодта дыууæфарсон ахастыты рæзты хорз динамикæ æмæ загъта, зæгъгæ, йæ ныфс ис Республикæ Хуссар Ирыстон æмæ Республикæ Никарагуайы ‘хсæн ахастытæ дарддæр дæр кæй фидар кæндзысты, уымæй.

Бибылты Анатоли уыд Никарагуайы Уæрæсейы Федерацийы Минæварады, уым фембæлд Уæрæсейы Федерацийы Уæлвæткон æмæ Æххæстбарджын минæвар Андрей Будаевимæ.

Фембæлд ацыд хъарм, хæларадон уавæрты.

РХИ-йы делегацийы сконды сты Фæсарæйнаг хъуыддæгты министр Медойты Димитр æмæ Республикæ Никарагуайы Республикæ Хуссар Ирыстоны Уæлвæткон æмæ Æххæстбарджын минæвар Козаты Нарим.

***

Балцы фæлгæтты хуссарирыстойнаг делегаци бæстæзонæн балцы уыд Никарагуайы горæттæ Масая æмæ Гранадайы. Масаяйы горæты мэр Орландо Ногуэримæ иумæ делегацийы уæнгтæ федтой горæты фендтаг бынæттæ,  уыдысты фольклорон концерты.

Горæт Гранадайы Бибылты Анатоли фембæлд мэр Джулия де ла Круз Мена Ривераимæ.

Хуссар Ирыстоны делегацийы уæнгтæ базонгæ сты  бæстæйы традицитæ æмæ культурæимæ, сæ рады сын уыдон дæр радзырдтой Республикæ Хуссар Ирыстоны истори æмæ рæзты тыххæй.

Республикæ Никарагуайы Хуссар Ирыстоны Президенты кусæгон балцы сæйраг мадзæлттæ сты Сандинистон революцийыл 40 азы сæххæсты  бæрæгбонон мадзæлтты фæлгæтты.

Comments are closed, but trackbacks and pingbacks are open.