Æфсымæрон бастдзинæдты тыххæй – æмразыдзинад

РХИ-йы Фæсарæйнаг хъуыддæгты министрады пресс-службæ куыд хъусын кæны, афтæмæй 15 январы горæт Владивостокы Республикæ Хуссар Ирыстоны Фæсарæйнаг хъуыддæгты министр Медойты Димитр фембæлд горæт Владивостокы Думæйы Сæрдар Андрей Брикимæ. Фембæлды хайад райста УФ Дард Скæсæны Федералон зылды Республикæ Хуссар Ирыстоны Цыты Консул Деметы Ясон дæр.

Фембæлды рæстæджы дыууæ фарсы фыццаджы фыццаг уынаффæ кодтой Цхинвал æмæ Владивостокы ‘хсæн æфсымæрон бастдзинæдтæ саразыны тыххæй сразыдзинады проект бацæттæ кæныныл. Сразыдзинад саразыны инициативæ раразмæ кодта Владивостокы Думæ. Фембæлды рæстæджы нысан æрцыд сразыдзинадыл къухтæ æрфыссыны бон дæр.

Медойты Димитр бузныг загъта Андрей Брикæн, зæрдиагæй йæ кæй райста, уый сæраппонд æмæ банысан кодта, зæгъгæ, Республикæ Хуссар Ирыстоны къухдариуæгады нысан у Уæрæсейы Федерациимæ, уыцы нымæцы регионты æмвæзадыл алыварсон ахас-тытæ рауæрæх æмæ фæарфдæр кæнын.

Министр ма куыд  загъта, афтæмæй г. Владивостокмæ ацыд Хуссар Ирыстоны Президент Бибылты Анатолийы бахæсмæ гæсгæ æмæ бафидар кодта Хуссар Ирыстоны къухдариуæгады цæттæдзинад дардскæсæйнаг регионимæ куыст фæактивондæр кæнынмæ, ныридæгæн цы бастдзинæдтæ ис, уыдон рауæрæх кæныны тыххæй.

Йæ рады Андрей Брик бузныджы ныхæстæ загъта Медойты Димитрæн æмкуысткæнынад рæзын кæнынмæ йæ цымыдисдзинады тыххæй æмæ банысан кодта, фæндвидар кæй у, Цхинвал æмæ Владивостокы æфсымæрон бастдзинæдты сырæзт кæй фæахъаз уыдзæн дыууæ адæмы æмæ паддзахадты ‘хсæн кæрæдзийæн пайдайы æмгуысткæнынады динамикон рæзтæн.

Андрей Брик банысан кодта, зæгъгæ, Владивостокæн æфсымæрон ахастытæ ис æндæр æмæ æндæр бæстæты æхсæз горæтимæ, уыцы нымæцы Дзæуджыхъæуимæ дæр, кæцыйы фæлгæтты бастдзинæдтæ рæзынц культурæйы, базарадон-экономикон, туризмы фадгуыты. 

Горæт Владивостокы Думæйы Сæрдар радзырдта, зæгъгæ, Владивосток æмæ Цхинвалы ‘хсæн æфсымæрон бастдзинæдтæ саразыны тыххæй депутатты инициативæйы фарс рахæцыд горæты сæргълæууæг Олег Гуменюк.

Брик  куыд банысан кодта, афтæмæй ныридæгæн цæттæ у сразыдзинады проект, кæцы æрвыст æрцæудзæн Республикæ Хуссар Ирыстоны æмæ горæт Цхинвалы къухдариуæгадмæ, цæмæй базонгæ уой документимæ, æмæ ма дзы кæд исты цухдзинæдтæ уа, уæд сæ баххæст кæной.