Æмбырд президентмæ

Ныхас – инвестицион проектты фæдыл

РХИ-йы Президенты официалон сайт куыд фехъусын кодта, афтæмæй Бибылты Анатоли æмбырд ауагъта, Инвестицион агентады æххуысæй Хуссар Ирыстоны цы инвестицион проекттæ реализаци цæуынц, уыдоны фæдыл.

Æмбырдты куысты хайад райстой Республикæ Хуссар Ирыстоны Президенты Администрацийы къухдариуæггæнæг Козаты Игорь, Экономикон рæзты министр Кокойты Геннади, Хæдбар паддзахадты Æмхæларады паддзахадтæ-хайадисджытимæ, Республикæ Абхаз æмæ Хуссар Ирыстонимæ социалон-экономикон æмгуысткæныны фæдыл Уæрæсейы Федерацийы Президенты Управленийы сæргълæууæджы хæдивæг Денис Травин, компанитæ «Растдон», «Натурплант», «Ир Базальт», «Сады Иристона»-йы минæвæрттæ.

Бибылты Анатоли раарфæ кодта «Растдон»-ы минæварæн, компанийы продукцийæн Уæрæсейы базармæ æмæ Таможнæйон цæдисы территоримæ ласыны фадат ын кæй ис нырæй фæстæмæ, уый тыххæй.

«Кæй уæ срегистраци кодтой, уый зонын. Сымахæн знонæй бар лæвæрд æрцыд уæ продукци Уæрæсемæ æмæ æндæр бæстæтæм ласынæн. Уый сæраппонд уын арфæ кæнын. Кæй зæгъын æй хъæуы, сымах хъуамæ æрвитат гъæдджын продукт, уæ маркæ ма хъуамæ сафат, уый æрмæст «Растдон»-ы маркæ нæ, фæлæ Хуссар Ирыстоны маркæ дæр кæй у, уый æмбаргæйæ», – банысан кодта Президент.

«Ир Базальт»-ы генералон директор Джиоты Роман радзырдта базальтон фæскъауы кондады проекты реализацийы тыххæй.

«Абоны бон мах бакодтам агурæн куыстытæ, балæвæрдтам проектон документаци æмæ бафыстам ифтонггæрзты иу хайæн. Кусæм графикмæ гæсгæ, фæлæ нын арæзтадон фæзуатимæ ис проблемæтæ», – загъта Джиоты Роман.

Уый куыд бамбарын кодта, афтæмæй раздæр цы арæзтадон фæзуат равзæрстой, уый, геологты бæлвырдгæнæнтæм гæсгæ, нæ бæззы заводы арæзтадæн, зæххыбын дæттæ дзы бирæ кæй ис, уый аххосæй.

Президент бахæс кодта Экономикон рæзты министрадæн, цæмæй иу къуыримæ бацæттæ кæной фарст æмæ заводы арæзтадæн бацагурой æмбæлон бынат.

«Натурплант»-ы минæвæрттæ дæр радзырдтой, проекттæ реали-заци куыд цæуынц, уый тыххæй. Сæ ныхæстæм гæсгæ, компани рауадзын фæнд кæны минералон дон æмæ «Сады Иристона»-йы продукци.