Президент Гаглойты Алан æрвылкъуырион æмбырд ауагъта горæт æмæ районты администрациты сæргълæуджытимæ. Æмбырды дзырд цыд бакæнгæ куыстытæ æмæ дарддæры пълæнттыл.
Цхинвалы администрацийы сæргълæууæг Къадзты Генойы ныхæстæм гæсгæ ныртæккæ куыст цæуы нæ горæты Нæузæххонты æмæ Сталины уынгты 96, 98, 100 хæдзæртты алфæмблай уынгтæ схæрзарæзт кæныныл.
Хъыгагæн, æхсæнады разыны ахæм æмбæстæгтæ, кæцытæ архайынц зиан æрхæссыныл. Уымæн æвдисæн у, горæты пионерты номыл парчы æхцондзинадхæссæг стеллæ «Æз уарзын Цхинвал»-мæ, æхсæвы рухсдæттæг электроны хæтæлтæ цавæрдæр «аудаг» æмбæстаг кæй алыг кодта. Администрацийы сæргълæууæг фехъусын кодта, стеллæйы рухсытæ арæзт кæй æрцыдысты.
Паддзахады разамонæг бузныджы ныхæстæ загъта Къадзты Генойæн Згъудеры уæлмæрды хæрзарæзтадон куыстытæ сорганизацийы фæдыл. Уый, зæгъгæ, æхсызгон у не ‘мбæстæгтæн, арæх фехъусæн ис ахæм ныхæстæн дæр, ома, уæлмæрд ахæм æфснайд никуы æрцыд. Хæрзиуæгон хъуыддаг у, бронкалæнтæ æвæрд дæр дзы кæй æрцыд.
Фидæны плæнттыл дзургæйæ администрацийы сæргълæууæг æрдзырдта сывæллæтты хæлцадон комбинат скусыны тыххæй, цæмæй ахуырадон уагдæтты сывæллæттæ ифтонг цæуой гъæдджын хæлцæй.
Ныртæккæ бирæ æмбæстæгты тыхсын кæны цæрæнуатон ахсджиаг фарста. Горæты администрацийы цæрæнуатон къамис ныртæккæ цы куыст кæны, уымæ цымыдис кодта Гаглойты Алан.
Къадзты Генойы ныхæстæм гæсгæ, къа-мисы куыстмæ ис лæмбынæг хъусдард. Хъыгагæн, не ‘хсæн ис, цæрæнуатон уавæртæ фæхуыздæр кæнын æнæзакъонæй чи домы, ахæмтæ.
Паддзахады разамонæг банысан кодта, зæгъгæ, цæрæнуатон къамисы куыстмæ уый ницы бар дары, хъусдард æм аздахдзæн æрмæстдæр закъонон бартæ хæлд куы цæуой, уæд.
Цхинвалы районы бакæнгæ куыстыты тыххæй информаци сарæзта районы сæргълæууæг Бæззаты Инал. Йæ ныхæстæм гæсгæ, ныртæккæ цалцæг кæнынц районы цалдæр хъæумæ цæуæг фæндаджы.
«Нырма актуалон у хъæуты нуазыны донæй ифтонг кæнын. Присы хъæуы серьезон проблемæтæ ис», — дзырдта районы разамонæг. Ныры онг цы суадæттæй цыдис дон, уыдон цадæггай сур кæнынц. Уымæ гæсгæ æмбырды рæстæджы уынаффæ цыд, куыд æмæ кæцæй ифтонг æрцæуа хъæу нуазыны донæй.
Бæззайы фырты ныхæстæм гæсгæ цалцæггæнæн куыстытæ цæуынц Тъбеты хъæуы культурæйы хæдзары агъуысты.
Æмткæй, районы егъау проблемæ та у электроадæттæн цæджындзты æдзæллаг уавæр.
Дзауы районы сæргълæууæг Тыбылты Вандæ фехъусын кодта, ныридæгæн фæн-дæгтæ цалцæг кæй æрцыдысты Къроз æмæ Църуйы хъæутæм. Дарддæр куыст цæуы районы хъæутæ нуазыны донæй ифтонг кæныныл, Ручъы хъæуы астæуккаг скъолайы агъуыст æмбæрзт æрцыд, баззад ма дзы чысыл бакæнинаг куыстытæ. Уымæй дарддæр ма кæронмæ бахæццæ фæндæгты реконструкци æмæ ныртæккæ æрæвналдзысты хъæуты мидæг фæндæгтæ слæгъз кæнынмæ.
Районы сæргълæууæг бахатыд бæстæйы разамонæгмæ, цæмæй районы æвæрд æрцæуой камерæтæ, науæд районы центры æгæр арæх уагъд фæцæуы машинæтæ тагъд скъæрынæй ерыстæ. Уыдонæй фæндæгтыл æвзæры тæссаг уавæр. Шофыр куы зона, камерæтæ фæндаджы змæлд фыссынц, уæд ын бæрнондæр ахаст уыдзæн æхсæнадон фæткмæ.
Тыбылты Вандæ ма фæндон бахаста, цæмæй куыд горæты, афтæ районы ахуырадон уагдæтты хуыздæр хъахъхъæнæм сывæллæтты æдасдзинад.
Фæндæгтæ цалцæг кæнын æмæ районы иуæй-иу хъæутæ нуазыны донæй ифтонг кæныны фарстатæ рæгъмæ рахаста Ленингоры районы администрацийы сæргълæууæг Гæджиты Иларион.
Гаглойты Аланы цымыдис кодта, районы Цæрæнуатон-коммуналон хæдзарады кусджытæ сæ куыстмыздтæ райстой æви нæ, уый. Администрацийы сæргълæууæг банысан кодта, хъæуæг документаци цæттæ кæй у æмæ сæ кæй бавдыстой Финансты министрадмæ.
Бæстæйы разамонæг ма бацымыдис кодта, æрæджы район æлхъывд газæй цы машинæ сифтонг кодта, уый дарддæр кæцы районмæ аласдзæн газ. Гæджиты лæппуйы ныхæстæм гæсгæ, ацы хъуыддаджы сæ æххуысы къух бадаргъ кæндзысты Къуайсайы цæрджытæм. Æввахс рæстæджы машинæ ифтонг æрцæудзæн газæй æмæ араст уыдзæн Къуыдаргоммæ.
Горæт Къуайсайы администрацийы сæргълæууæг Хуыгаты Алан хъусдард аздæхта горæтæн юридикон статус радтыны ахсджиаг хъуыддагмæ, зæгъгæ, æмбæлон документаци бавдыстам æмæ æнхъæлмæ кæсæм Юстицийы министрады дзуаппмæ.
Хуыгайы-фырт æрдзырдта, горæты уазæгдонæй нысанмæздæхтæй спайда кæныныл, Украинæйы æфсæддон операцийы хайадисæг æмбæстæгтæн цы гуманитарон æххуыс бакодтой, ууыл, æмæ æвзонг фермертæн æххуысы тыххæй.
Знауыры районы администрацийы сæргълæууæг Гобозты Аланы ныхæстæм гæсгæ, ныридæгæн районы хъæуты цæрджытæ зымæгон уазал рæстæджытæм ифтонг цæуынц сугæй. Уый тыххæй хъæууон администрациты арæзт æрцыд номхыгъд-тæ æмæ районы администраци алкæмæндæр баласдзæн суг.
Гобозты Алан ма куыд загъта, афтæмæй районы хисæрмагонд карьеры руаджы цалцæг цæуы Уисты хъæумæ фæндаг.
Гаглойты Алан æмбырды хайадисджытæн фехъусын кодта, ног азæй фæстæмæ республикæйы къухдариуæгад афæдз дыууæ хатты кæй бæрæг кæндзæн, районты цы куыст цæуы, уыдон фæстиуджытæ.
Районты сæргълæуджытимæ фембæлды хайад райстой Хицауады Сæрдар Джуссойты Константин, Президенты Администрацийы къухдариуæггæнæг Джиоты Алан, Автомобилон фæндæгты арæзтад æмæ сæ эксплуатацимæ дæттыны фæдыл комитеты сæрдар Елдзарты Константин, Паддзахадон унитарон куыстуæттæ «Водоканал» æмæ «Энергоресурс-Хуссар Ирыстон»-ы сæргълæуджытæ Сиукъаты Иван æмæ Гæбæраты Алан, æмæ Арæзтад, архитектурæ æмæ цæрæнуатон-коммуналон хæдзарады министр Зæгъойты Эдуард.
КЪÆБУЛТЫ Маринæ
Comments are closed, but trackbacks and pingbacks are open.