Куыд ма хъусын кодтам, афтæмæй Хуссар Ирыстонмæ гастролон балцы цалдæр боны æмгъуыдмæ æрцæуинаг уыдысты Ульяновскы æрыгон сценæмæкæсджыты паддзахадон театр «NEBOLSHOY TEATP», цæмæй хуссарирыстойнаг театрдзаутæн равдисой сæ репертуарæй цалдæр спектаклы. Ныр уыдон сты Цхинвалы Ульяновскы областы Аивад æмæ культурон политикæйы министр Евгения Сидоровайы сæргълæудæй æмæ сæ хорз суазæг кодтой нæ республикæйы Культурæйы министрад.

25-æм октябры Республикæ Хуссар Ирыстоны Культурæйы министр Зæгъойты Радæ фембæлдис Ульяновскы областы Аивад æмæ культурон политикæйы министр Евгения Сидороваимæ. Фембæлды рæстæджы Зæгъойты Радæ банысан код-та, фæстаг рæстæджы Хуссар Ирыстон æмæ Уæрæсейы Федерацийы æхсæн æмгуыстад ног æмвæзадмæ кæй рахызт æмæ уый æхсызгон хъуыддаг кæй у. Министр ма загъта, зæгъгæ, Республикæ Хуссар Ирыстон æмæ Ульяновскы областы хицауадты ‘хсæн ис æмгуыстады фæдыл сразыдзинад. «Бынтон æрæджы нæ республикæмæ Уæрæсейæ фæуазæг сты цалдæр сфæлдыстадон коллективы æмæ ныр та цин кæнæм сымах æрцыдыл. Махæн тынг æхсызгон у Ульяновскы театр нæ республикæмæ кæй фæуазæг ис, уый. Де ‘рцыды хъуыддаг та мын уæлдай æхсызгон у, Евгения. Ныфс мæ ис, фидæны æмгуыстады тыххæй не ‘хсæн фидар бындур æвæрд кæй æрцæудзæн. Уырны мæ, культурæйы фæдыздæхт  мах иумæ кæй баххæст кæндзыстæм ног мидисæй. Уæрæсейы регионтæм цы ахæссæм æмæ цы равдисæм, уый нæм ис. Махæн ис диссаджы кафт æмæ зарды паддзахадон ансамбль «Симд», кæцыйыл фидæнмæ сæххæст уыдзæнис 85 азы. Нæ ансамблæн ис хъæздыг традицитæ, кæцы Уæрæсейы Федерацийы, уыимæ иумæ Ульяновскы дæр æмбæлон æмвæзадыл равдиса нæ рагфыдæлты хореографион культурæ. Уымæй дарддæр ма нæм архайынц æндæр сфæлдыстадон коллективтæ дæр, уыдон нымæцы – адæмон инструментты паддзахадон оркестр æмæ æндæртæ. Нæ республикæ ма сæрыстыр у нæ паддзахадон драмон театрæй дæр, кæцыйæн ис йæхи хъæздыг истори. Мæнмæ гæсгæ, ульяновскаг сценæмæкæсджытæн цымыдисон уыдзæнис ирон аивад æмæ культурæ æввахсдæр куы базониккой, уæд. Мах æдтейæ цы равдисæм, уый нын ис. Фæлæ нын æхсызгон уыдзæнис сымахæй исты куысты фæлтæрддзинад райсын», – мидбылхудгæ банысан кодта Зæгъойты Радæ.

Ульяновскы областы Аивад æмæ культурон политикæйы министр Евгения Сидорова бузныджы ныхæстæ загъта Зæгъойты Радæйæн Хуссар Ирыстонмæ сæ кæй фæхуыдтой æмæ сыл хъарм ахастимæ ныр кæй æмбæлынц, уый тыххæй. «Мах ныфс ис, нæ артистты аивад æмæ сæ арæхстдзинад хуссарирыстойнаг сценæмæкæсджыты зæрдæмæ кæй фæцæудзысты, уымæй. Ульяновскы областы культурæ у хъæздыг æмæ алыгъуызон, уымæн æмæ нæм ис фондз паддзахадон театры, цыппар паддзахадон музейы æмæ уæрæх культурон-хиирхæфсæн уагдæтты хызæг. Махæн тынг æхсызгон уыдзæнис Хуссар Ирыстоны культурæйы минæвæртты нæ областы уазæгуаты фенын æмæ уæ развæлгъау хонын», – загъта Евгения Сидорова.

Фембæлды кæрон Зæгъойты Радæ æмæ Евгения Сидорова кæрæдзийæн  бакодтой зæрдылдарæн лæвæрттæ.

Нæ уацх.

Comments are closed, but trackbacks and pingbacks are open.