2017 азы Хуссар Ирыстоны Æнæниздзинад хъахъхъæнын æмæ социалон рæзты министрад уæрæсейаг клиникæтæм арвыста, бæрзондтехнологион медицинон æххуыс кæй хъуыд, ахæм 355 æмбæстаджы. Уый тыххæй «Рес»-æн фехъусын кодта РХИ-йы Æнæниздзинад хъахъхъæныны министры хæдивæг Плиты Агуындæ.
«Уæрæсейаг клиникæтæм æрвыст чи æрцыд, республикæйы уыцы 355 æмбæстагæй 220 сты, Хуссар Ирыстоны æмбæстæгтæй уæрæсейаг æмбæстагдзинад кæмæ нæй, ахæмтæ. Уыдонæн хос кæнынæн паддзахадон бюджетæй рахицæн æрцыд 220 милуан сомы», – радзырдта Плиты Агуындæ.
Уый куыд банысан кодта, афтæмæй уæрæсейаг æмбæстагдзинад республикæйы кæмæн ис, уыцы цæрджытæ æрвыст цæуынц Уæрæсейы Федерацийы медицинон уагдæттæм æнæмæнгхъæуæг медицинон фæдзæхсты полисты фæрцы æнæаргъæй хос кæнынмæ. 2017 азы Хуссар Ирыстоны Æнæниздзинад хъахъхъæныны министрад æнæмæнгхъæуæг медицинон фæдзæхсты полисты фæрцы уæрæсейаг клиникæтæм хос кæнынмæ арвыста 135 адæймаджы.
Ацы аз Хуссар Ирыстоны цæрджыты райстой ахæм клиникæтæ, куыд Беслæны бирæпрофилон медицинон центр, академик Федоровы номыл бирæпрофилон зонадон-техникон комплекс, Бакулевы номыл клиникæ, Мæскуыйы Колопроктологийы паддзахадон зонадон центр, Ленинграды областон рынчындон, Мæскуыйы Гельмгольцы номыл Цæстыты низты зонадон-иртасæн институт, Бурденкойы номыл Нейрохирургийы институт, Ростовы онкологион институт, г. Мæскуыйы Эндокринологийы институт, г. Мæскуыйы Сывæллæтты æнæниздзинады зонадон центр, Санкт-Петербурджы Лонизты зонадон-иртасæн центр, Блохины номыл институт æмæ æндæртæ.
Comments are closed, but trackbacks and pingbacks are open.