Æнæниздзинад хъахъхъæныны министрады коллективы базонгæ кодтой сæ ног министримæ

Æнæниздзинад хъахъхъæныны æмæ социалон рæзты министрады коллективы базонгæ кодтой сæ ног министр Тотчиты Георги Феликсы фыртимæ.

Республикæйы медицинон уагдæтты кусджытæн сæ ног разамонæгимæ фембæлды рæстæджы Хицауады Сæрдар Пухаты Эрик банысан кодта, зæгъгæ, уый æнæхъуаджы не ‘рцыд æвзæрст.

«Георги Феликсы фырт у зонæдты доктор, зындгонд дохтыр, æмæ йын ис хæрзарæхст специалист æмæ куырыхон разамонæджы ном. Нæ республикæйы хъуаг стæм ахæм адæмæй. Фидарæй мæ уырны, æнæниздзинад хъахъхъæныны къабазы фарстытæ уымæн зонгæ кæй сты, æмæ йе ‘ппæт фæлтæрддзинад, зонындзинæдтæ æмæ арæхстæй Георги Феликсы фырт кæй спайда кæндзæн нæ республикæйы медицинон къабазы куыст фæхуыздæр кæныны сæраппонд», – загъта уый.

Йæхи ‘рдыгæй Георги Феликсы фырт ныфс бавæрдта Хицауады Сæрдарæн, æппæт хъарутæ дæр кæй æрæвæрдзæн республикæйы æнæниздзинад хъахъхъæныны гъæд фæхуыздæр кæныны сæраппонд.

«Мæнæн мæ зæрды ис, нывæстон куыстæй ахсджиагдæр цы у, уымæй райдайын, бынтон цæхгæр ивындзинæдтæй нæ райдайдзынæн. Уыимæ иумæ фидар у мæ фæнд, цы æууæнк мыл æвæрд æрцыд, уый тыххæй фыдæнхъæл ма фæкæнон республикæйы къухдариуæгады, æмæ мæ хæстæм бавналон бæрнджынæй…», – банысан кодта Точиты Георги.

Цыбыр биографион бæлвырдгæнæн: 1996 азы каст фæци Цæгат Ирыстоны паддзахадон медицинон академи. 1999 азы – Мæскуыйы медико-стоматологион универститеты цур акушерад æмæ гинекологийы ординатурæ. 2001 азы Уæрæсейы Адæмты Хæлардзинады университеты акушерад æмæ гинекологийы кафедрæйы бахъахъхъæдта кандидатон диссертаци, 2006 азы та – докторон диссертаци. 2007 азæй абоны онг у Уæрæсейы Адæмты Хæлардзинады университеты акушерад æмæ гинекологийы кафедрæйы профессор.