Æнтыст æмæ хорз тæлмæнтæ

Æрæджы Казаны горæты уагъд цыдысты æрыгон æмфыдыбæстæйонты III-аг Æппæтдунеон хъæзтытæ, кæцыйы организатортæ уыдысты Уæрæсейы спорты, ахуырад æмæ зонады, культурæйы министрадтæ, парти «Иууон Уæрæсе», Россотрудничество æмæ скъолайон спорты Æппæтуæрæсейон федераци.

Хъæзтытæ æрбангом кодтой æндæр æмæ æндæр бæстæты цæрæг æмфыдыбæстæйонты сывæллæтты æмæ ахъаз кодтой æмæхсæнад «Уырыссаг дуне»-йы рæзтæн, кæцы иу кæны адæмты æмæ бæс-тæты, иууон этникон-культурон дунемæ сæ кæнгæйæ.

Ацы аз хъæзтыты æрыгон хайадисджытæ уыдысты дунейы 47 бæстæйæ 600 сывæллоны бæрц. Уыдоны ‘хсæн уыдысты Хуссар Ирыстон. Абхаз, Испани, Швеци, Норвеги,  Австри, Сомихстон, Ирланди, Франци, АИШ æмæ æндæр бæстæты сывæллæттæ.

Хъæзтыты программæмæ гæсгæ ерыстæ уагъд цыдысты спорты æхсæз популярон хуызæй: баскетбол, волейбол, шахматтæ, мини-футбол, столы теннис æмæ ленк кæ-нынæй. Хуссарирыстойнаг сывæллæттæ архайдтой шахматтæ æмæ футболæй.

Мадзалмæ æрбацыдысты Паддзахадон Думæйы депутаттæ, скъолайон спорты Æппæтуæрæсейон федерацийы президент Ирина Роднина, фракци «Иугонд Уæрæсе»-йы къухдариуæггæнæджы фыццаг хæдивæг Отари Аршба, проект «Æмфыдыбæс-тæйонтæ»-йы координатор Ольга Зиновьева, афтæ ма Паддзахадон Думæйы депутат, доны полойæ дыууæ хатты Олимпион чемпион Ирек Зиннуров, кæцы уыдис хъæзтыты сæйраг тæрхонгæнæг дæр. Банысан æрцыд ахæм мадзæлттæ уадзыны нысаниуæг, сæ ахсджиагдзинад.

Спортивон ерыстæй дарддæр ма хъæзтыты хайадисджытæ хайад истой бирæ алыгъуызон культурон мадзæлтты: экскурситы, зындгонд адæймæгты хайадистæй мастер-кълæсты, ныхас кодтой шахматтæй дунейы чемпион Анатоли Карповимæ. Æрыгон спортсментæн уæрæсейаг спортсменты æнтысты тыххæй радзырдтой УФ-йы Федералон Æмбырды депутаттæ – боксæй иууыл уæззаудæр уæзы категорийы дунейы чемпион Николай Валуев æмæ классикон стилы хъæбысæйхæцæг, бирæ хæттыты Олимпион чемпион Александр Карелин. Уыдон дæр ауагътой мастер-къластæ.

Æрыгон æмфыды-бæстæйонты III Дунеон хъæзтыты ахсджиагдæр мадзæлттæй сæ иу ссис интеллектуалон хъазт «Диалогтæ уырыссаг æвзагыл». Сывæллæттæ хайад истой мадæлон æвзаг, литературæ, истори æмæ географи зоныны фæдыл цымыдисон конкурсты. Уырыссаг æвзаг популярон кæныны æмрæнхъ фæбæлвырддæр фæсивæды руаджы, фестивалтæ,  конкурсты сæ хайадисты руаджы ирон æвзаджы дæр нымайыны фадат. Æппæтдунеон хъæзтытæ уадзын ноджыдæр фенын кодта, хи национ политикæ уадзын реалон кæй у æмæ йын сæххæстгæнæн кæй ис, уый бындурыл уагъд кæй хъуамæ цæуой нæхи ирон хъæзтытæ дæр. Национ менталитет хъуамæ бæрæг кæнын райдайа сабион бонтæй.

Хъæзтыты Хуссар Ирыстоны командæ бацахста дыккаг бынат æмæ уый у стыр æнтыст.

Кæронбæттæны уыдис фæуæлахизуæвджыты хорзæхджын кæныны церемони, йæ фæстæ та уыд «Хæ-лардзинады арт».

Нæ сывæллæттæ хъæзтыты сæхи равдыстой иттæг хорз, кæддæриддæр æвдыстой уæлахизмæ тырнындзинад. Уымæй дарддæр ма сæхицæн ссардтой се ‘мкарæн хæлæрттæ æндæр æмæ æндæр бæстæтæй.

Фæнды  мæ бузныг зæгъын нæ республикæйы Президент Бибылты Анатоли æмæ Цхинвалы Зонад æмæ культурæйы уæрæсейаг центры къухдариуæггæнæг Михаил Степановæн, ахæм ахсджиаг мадзалы нæ сывæл-лæтты хайадистæн кæй баххуыс кодтой, уый тыххæй.

ЦХУЫРБАТЫ Татьянæ