Ӕрæджы Хуссар Ирыстонмæ гастролон балцы æрцыдысты Ульяновскы æрыгон сценæмæкæсджыты паддзахадон театр «NEBOLSHOY TEATP» æмæ театрдзаутæн -цыппар спектаклы. Хетæгкаты Къостайы номыл Паддзахадон драмон театры сценæйыл 25 октябры райдыдтой равдыстытæ æмæ аххæссыдысты суанг 28 октябрмæ. Алы бон дæр дæттой дыууæ спектаклы æмæ æвдыст та цыдысты ахæм форматы — сценæйы уæлæ сарæзтой ноджы чысылдæр сценæ æмæ йын йæ фæйнæ фарс æрæвæрдтой бандæттæ.
Фыццаг уал 25 октябры равдыстой спектакль «История одного похищения», кæцы рацарæзтой зынгæ америкæйаг фыссæг О. Генрийы радзырд «Вождь краснокожих»-æй. Уый фæстæ та сценæмæкæсджыты рæгъмæ рахастой спектакль «Как Лопшо человеком стал», кæцыйы сæйраг хъайтар Лопшо Педунь ист у удмуртаг адæмон аргъæуттæй. Ам дзырд цæуы æрыгон, хъæлдзæг, æмбаргæ æмæ цæрдæг лæппуйыл, кæцыйæн йæ уарзон чызджы тыххæй бантыст бирæ сгуыхтдзинæдтæ саразын.
Равдыстой ма нырыккон драматург Керен Климовскийы пьесæмæ гæсгæ æвæрд спектакль «Лучшее, что было в моей жизни». Артисттæ сдзуапп кодтой алыгъуызон цардуагон фарстатæн сæ диссаджы хъазты руаджы æмæ театрмæ æрбацæуджыты хъуыдытыл бафтыдтой, царды хорздзинады мидис сын бамбарын кодтой. Ацы спектаклмæ дæр фау æрхæссæн нæй, уæлдайдæр та йæ режиссер — УФ-йы сгуыхт артист Эдуард Терехов иттæг хорз куыст бакодта йæ сæвæрыныл.
Кæронбæттæны та уазджытæ равдыстой театралон-ахуырадон проект «Солнце. Муха. Крокодил». Ацы спектакль схонæн ис зынгæ советон поэт, публицист æмæ сывæллæтты фыссæг Корней Чуковскийы сфæлдыстады цыбыр æмбырдгонд. Нысанмæздæхт у комкоммæ рæзгæ фæлтæрмæ, цæмæй фæцайдагъ уой фæрсыныл, цымыдис кæной мадæлон литературæмæ æмæ алыварсонæй размæ цæуой æмæ рæзой.
Спектакльтæ иууылдæр рауадысты тынг цымыдисон æмæ дзы æхцондзинад райстой куыд сывæллæттæ, афтæ ма кардзыд театруарзджытæ дæр. Уазджытæ сæхæдæг дæр райгондæй баззадысты сæ балцæй — дисы сæ бафтыдтой нæ хæххон пейзажтæ æмæ ма сæ зæрдæмæ тынг фæцыд нæ театры бæстыхай дæр. Театры директор æмæ сæ аивадон къухдариуæггæнæг Эдуард Терехов банысан кодта, зæгъгæ Хуссар Ирыстонмæ балц театры коллективæн стыр ахъаз фæуыдзæнис сæ дарддæры архайды. Уæлдайдæр та сыл сæ хуссарирыстойнаг коллегæтæ хорз баузæлыдысты æмæ ахæм лæггад нæ рох кæны, хорз тæлмæнтæ ныууадзы адæймагыл. Æвæццæгæн, фидæны нæ театры коллектив дæр уазæгуаты ацæудзæнис Ульяновскмæ æмæ равдисдзысты сæ арæхстдзинад сценæйыл.
ДЖИОТЫ Алыксандр
Comments are closed, but trackbacks and pingbacks are open.