Хетæгкаты Къостайы номыл драмон театр æрæджы æрыздæхт Мæскуыйæ гастролтæй, цыран 4 апрелæй 7 апрелмæ Уæрæсейы столицæйы уагъд цыд мадзал «Ирон театры бонтæ Арбаты» æмæ дзы хайад райстой. Нæ артисттæ мæскуыйаг театруарзджытæн равдыстой 3 спектаклы – Уильям Шекспиры трагеди «Юлий Цезарь», Жан Ануйы пьесæ «Антигона» æмæ испайнаг драматург Фернандо Аррабалы пьесæ «Фандо æмæ Лис».
Ахæм мадзал ауадзыны тыххæй уæрæсейаг коллегæтимæ бадзырдтой 2019 азы, фæлæ уæдмæ райдыдта пандеми æмæ плæнттæ иууылдæр фæивтой – балц ахастой хуыздæр рæстæгмæ. Нæ театры аивадон къухдариуæггæнæг Дзуццаты Тамерланы ныхæстæм гæсгæ ацы проект сног кæнын фыццаджыдæр рауад Мæскуыйы А.А.Яблочкинайы номыл Актерты централон хæдзары къухдариуæгады фæрцы, кæцытæ сæм æппынæдзух сидтысты Мæскуымæ. Проект «Ирон театры бонтæ Арбаты»-йы автортæ æмæ координатортæ уыдысты Цæцæны адæмон артист æмæ Кæсæг-Балхъары сгуыхт артист Павел Тихомиров æмæ йæ ассистент Ирина Москаленко.
«Мах Мæскуымæ гастролты ацæуыны æнхъæл нал уыдыстæм, ныфс нæ нал уыд. Фæлæ нæм Мæскуыйæ куы фæдзырдтой цалдæр хатты, уæд махæн уыд тынг æхсызгон, ахæм ахаст нæм кæй дарынц нæ уæрæсейаг коллегæтæ, уый æмæ нæхи арæвдз кодтам. Фæлæ ахæм балцы ацæуынæн бирæ фæрæзтæ хъæуы æмæ мæ уый фæдыл стыр бузныг зæгъын фæнды нæ Президент Бибылты Анатолийæн, кæцы нын бакодта финансон æххуыс æмæ нæ срæвдз кодта гастролтæм», – банысан кодта Дзуццаты Тамерлан.
Спектаклтæ равдисыны тыххæй развæлгъау фехъусын кодтой не ‘мбæстæгтæн, кæцытæ цæрынц Мæскуыйы. Уымæй уæлдай ма æрбахуыдтой театралон ахуыргæнæндæтты зонгæ педагогты æмæ артистты, æмбæлтты, театралон критикты, Театралон архайджыты цæдисы минæвæртты æмæ ма дзы уыдысты журнал «Страстной бульвар»-æй дæр.
«Бæргæ, нæхи драматургты хуыздæр спектаклтæй куы ахастаиккам, уæд нын ноджы аивдæр рауадаиккой, – базонгæ сæ кодтаиккам нæ классикты сфæлдыстадимæ. Фæлæ нæм, хъыгагæн, ахæм къаннæг формæйы спектакль нæй, – иууылдæр сæ æвдисын хъæуы стыр сценæтыл. Нæ артисттæ нырыонг никуы архайдтой ахæм уавæрты, никуы уыдысты сценæмæкæсджытæм афтæ хæрзæввахс æмæ ацы балцы фæрцы райстой фæлтæрддзинад», – загъта театры аивадон къухдариуæггæнæг.
Нæ театры труппæ программæ байгом кодта 4 апрелы «Антигона»-йæ, кæцы æвдыст æрцыд Евгений Вахтанговы номыл театры Симоновы сценæ «Амфитеатр»-ы. Ардæм фæуазæг сты Уæрæсейы Федерацийы Республикæ Хуссар Ирыстоны Уæлвæткон æмæ Æххæстбарджын минæвар Гасситы Знауыр, РХИ-йы Президенты цардæмбал Куымæридтаты Линдæ, ирон диаспорæйы минæвæрттæ æмæ РХИ-йы Минæварады кусджытæ. Ацы спектаклы режиссер Дзуццаты Тамерлан куыд загъта, афтæмæй сценæмæкæсджытæ тынг райгондæй баззадысты актерты хъазтæй. Уæлдай тынг сæ дисы бафтыдта Бекъойты Зæринæ æмæ сæ уырнгæ дæр нæ кодта, ахуыры фæстæ нырма æртæ азы йедтæмæ кæй нæй сце-нæйыл.
5 апрелы мадзал адарддæр кодтой А.А.Яблочкинайы номыл Актерты централон хæдзары стыр залы фойейы, цыран цытджын æгъдауæй байгом равдыст «Националон театры истори». Ацы мадзал арæзт æрцыд, Хетæгкаты Къостайы номыл Хуссар Ирыстоны драмон театры сы-рæзтыл 90 азы кæй æххæст кæны, уый сæраппонд. Ам стендтыл фенæн уыдис фотоæрмæджытæ, кæцытæ дзурæг уыдысты нæ театры хъæздыг историйыл. Уыдис ма дзы нæ номдзыд актерты къамтæ, спектаклты фрагменттæй ист нывтæ, зæронд афишæтæ, нæ курдиатджын нывгæнджыты костюмты эскизтæ, рæсугъд националон костюмтæ æмæ афтæ дарддæр. Дзуццаты Тамерлан йæ раныхасы бузныджы ныхæстæ загъта мадзалы организатортæн.
«Хуссарирыстойнаг театры артисттæ хъæугæ зонындзинæдтæ райстой Уæрæсейы уæлдæр ахуыргæнæндæтты, уæ фæрцы схызтысты сæ профессийы бæрзонддæр æмвæзадмæ, сымах фæрцы нæ театр абон размæ цæуы æмæ уын арфæ кæнын ахæм хъарм ахасты тыххæй», – банысан кодта театры аивадон къухдариуæггæнæг.
Уыцы бон ма А.А.Яблочкинайы номыл Актерты централон хæдзары нæ артисттæ равдыстой спектакль «Юлий Цезарь», кæцыйы ирон æвзагмæ ратæлмац кодта Джусойты Нафи. Ацы спектакль фыццаг хатт Хуссар Ирыстоны театры сценæйыл æвæрд æрцыдис 90-æм азты æмæ ссис тынг популярон. Суанг 2009 азмæ уыд театры репертуары, стæй рæстæгмæ рохуаты аззад. Ныр та йæ ногæй бацæттæ кодтой æмæ йæ фыццаг равдыстмæ ахастой Мæскуымæ. Йæ ролтæ йын æххæст кæнынц раздæры артисттæ, æрмæст дзы бахастой иу ивындзинад, – Наниты Витали рынчын кæй у, уый тыххæй йæ баивтой Гаглойты Эдуардæй, кæцы йæ роль сæххæст кодта иттæг хорз.
Ардæм уыйбæрц адæм æрбацыд æмæ сын бынæттæ дæр нал фаг кодта. Залмæ ма æрбахастой ноджы бандæттæ, фæлæ дзы уæддæр бирæты бахъуыд фæстæмæ аздæхын. Сценæмæкæсджытæ тынг райгондæй баззадысты спектаклæй æмæ стыр арфæйы ныхæстæ загътой нæ актертæн. Банысан кодтой, зæгъгæ, мæскуыйаг театрты фæстаг рæстæджыты ахæм бæрзонд æмвæзадыл актерон хъазт никуыуал федтой æмæ уæ спектакль аккаг бынат æрцахсид кæцыфæнды фестивалы дæр.
6 апрелы та Уæрæсейы фæсивæды академион театры къаннæг сценæйыл æвдыст æрцыд спектакль «Фандо и Лис», кæцыйы режиссер у Ян Яновский. Ацы спектаклмæ фæуазæг сты зынгæ уæрæсейаг артисттæ Юрий Назаров æмæ Гоша Куценко. Ам дæр та нæ актертæ равдыстой сæ арæхстдзинад æмæ сæ райгондæй баззадысты сценæмæкæсджытæ. Гоша Куценкойы зæрдæмæ афтæ тынг фæцыд нæ актерты хъазт æмæ спектакль фæуыны фæстæ бацыд æмæ сын зæрдиаг арфæтæ ракодта.
7 апрелы ма организаци æрцыд сфæлдыстадон фембæлд «Денджызы æмвæзадæй 870 метры уæлдæр» (горæт Цхинвал дæр уыцы æмвæзадыл ис), кæцы арæзт æрцыд Хетæгкаты Къостайы цытæн.
Дзуццаты Тамерлан куыд банысан кодта, афтæмæй ацы балцæй райстой стыр фæлтæрддзинад, кæцыйæ спайда кæндзысты сæ дарддæры куысты. Зæгъæм, къаннæг формæйы спектаклтæ нæ театрæн табугæнджытæ нырма никуы федтой æмæ дарддæр бакусдзысты ацы хъуыддагыл.
Уымæй уæлдай ма майы мæймæ бацæт-тæ кæндзысты спектакль «Дон Жуан», кæцыйы хъаздзысты 15 актеры æмæ йæ æвæргæ та скæндзæнис Дыгуры паддзахадон драмон театры сæйраг режиссер Джелиты Хъазбег. Дзуццаты Тамерлан йæхæдæг та ныридæгæн кусы спектакль «Фæстаг æвдисæн»-ыл, кæцыйы æвдыст æрцæудзæнис ирон адæмы геноцид. Сног ма кæндзысты раздæры популярон спектаклтæ дæр, зæгъæм, «Амыран»-ы æмæ «Бременаг музыканттæ» та – сывæллæттæн. Фæзындзæнис ма сæ репертуары ногдзинæдтæ дæр, зæгъæм, Остъаты Аланы фыст аргъау.
Ацы аз нæ театры коллективмæ бирæ плæнттæ ис æмæ уымæй зæрдæ райы. Фæстæдæр гастролты ацæудзысты Уæрæсемæ цалдæр фестивалмæ æмæ ма Абхазмæ дæр. Уыимæ ма сæхи цæттæ кæнынц театры юбилеймæ дæр.
ДЖИОТЫ Александр
Comments are closed, but trackbacks and pingbacks are open.