Цхинвалы районы администрацийы адæмон ахуырады хайад (йæ хистæр Козаты Олег) 2021-2022-æм ахуыры азы хыгъдон рæстæджы бакодта бæрæг куыст, уый та здæхт уыд ахуыры дарддæры гъæд фæхуыздæр кæнынмæ. Хайады кусджытæ сæ куыст кодтой бакæнгæ куысты планы бындурыл, предметон ауыргæнджыты демографион зонæнтæ сног кæныныл. Арæзт æрцыдысты гом уроктæ æмæ тематикон мадзæлтты графиктæ, уæлдай хъусдард здæхт æрцыд æвзонг специалистты куыстмæ, тематикон æмæ уроктæ уадзыны плæнттæ бацæттæ кæныны тыххæй уагъд æрцыдысты консультацитæ. Ахуыры азы дæргъы скъолаты æппæт предметтæй ауагъдæуыд контролон куыстытæ, олимпиадæтæ æмæ фронталон бафарстытæ, ахуырдзауты зонындзинæдты гъæд æмæ программон æрмæг куыд базыдтой, уый рабæрæг кæныны тыххæй. Сарæзтæуыд тесттæ предметон олимпиадæтæй районон тур ауадзын æмæ республикон туры олимпиадæмæ та кандидаттæ рабæрæг кæныны тыххæй. Хыгъдон рæстæджы дæргъы районы ахуырдзаутæ активон хайад райстой куыд районон, афтæ республикон фæлгæтты алыхуызон мадзæлтты.
Ахуыр-хъомыладон куысты æнæфæхицæнгæнгæ хай у къласæн æмæ скъолайæн æддейæ куыст. Ацы фæдыздæхтмæ æмбæлон хъусдард ис хайады æрдыгæй. Скъолаты организатортæ æмæ кълæсты къухдариуæггæнджытæ æппæт мадзæлттæн дæр бацæттæ кодтой куысты æмбæлон плæнттæ æмæ сценаритæ. Хыгъдон рæстæджы æппæт скъолатæ дæр бацæттæ кодтой ахæм къалендарон бонтæ, куыд «Республикæйы бон», Хетæгкаты Къостайы райгуырды бон», «Ногазон сæуæхсидтæ», «Уæлахизы бон», «Ирон æвзаджы бон» æмæ æндæртæ. Банысан кæнын хъæуы Къостайыхъæуы астæуккаг скъолайы цур нывгæнæн скъола-студийы хорз куыст (йæ къухдариуæггæнæг РХИ-йы адæмон нывгæнæг Гæбæраты Барис). Йæ хъомылгæнинæгтæ вæййынц куыд республикон, афтæ ма уымæн æддейæ дæр нывгæнæн равдыстыты активон хайадисджытæ. Æвзонг нывгæнджытæ бирæ хæттыты систы уæлдæр хорзæхты аккаг. Ивгъуыд ахуыры азы сæ фæхуыдта Хъæрæсе-Черкескы республикæйы Лабæйы хъæуы ирон æхсæнад æмæ дзы скъола-студийы ахуырдзаутæн уыд равдыст. Балцы уыцы хæрдзтæ радих кодта районы адæмон ахуырады хайад. Хорз зæгъын æмбæлы Дменисы хъæуы сывæллæтты рæвдауæндоны куыстæй дæр (йæ сæргълæууæг Джиоты Мананæ). Йæ хъомылгæнинæгтæ æдзухдæр хайад райсынц республикон конкурсты æмæ сын вæййы хорз фæстиуджытæ. Ацы азы уагъдцæуæг конкурс «Æрдзы диссæгтæ», зæгъгæ, карз тохы бацыдысты горæты сывæллæтты рæвдауæндæттимæ æмæ бацахстой дыккаг бынат. Уыдон хорзæхджын æрцыдысты грамотæтæ æмæ зæрдылдарæн лæвæрттæй.
Ахуырад æмæ зонады министрадæй ахуыры азы райстæуыд ахуыргæнæн чингуытæ дзæвгар, уыдон дих æрцыдысты æмæ сæ байуæрстой ахуыргæнæн уагдæттыл, ахуыргæнæн чингуытæ ма хайадæн балхæдта РЦИ-Алани 151 мин сомы аргъ.
Ацы аз 100 азы сæххæст ногдзауты организацийы сырæзтыл. Ацы зæрдылдарæн цау банысан кæныны тыххæй 5-6 кълæсты ахуырдзауты райстой «Раззагонты» организацимæ. Районы администрацийы актон залы уыдон номыл цытджын æгъдауæй администрацийы сæргълæууæг æмæ ахуырады хайадæй хъуыстысты арфæйы ныхæстæ. Ногазон улæфтыты фæстæ уагъд æрцыдысты методикон баиугæндтæ, цыран равзæрстой сæрдæрттæ æмæ нымæрдарты. Предметты ахуыргæнджытæ сæ фæлтæрддзинадимæ зонгæ кодтой æмæ проблемон фарстатæ иуварс кодтой, ахуыры рæстæджы сын ныхдуртæ чи вæййы, уыцы иуæй-иу темæтæ ахуыр кæныны. Методистты æрдыгæй банысан æрцыд, зæгъгæ, ног ахуыры азы фæтыхджындæр уыдзæн контроль скъолайон методбаиугæндты куыстыл, уымæн æмæ уыцы мадзæлттæ ахъаз кæнынц ахуыры гъæд æмæ ахуырдзауты ахуырфæразондзинад æмæ сахуыргонд урокты æрмæг хуыздæр базонынæн. Банысангонд мадзæлттæ иумиагахуырадон уагдæтты уагъд æрцыдысты апрель-майы. Хайад ма иумæ бакуыста æнахъомты фæдыл хайадимæ дæр. Æдзухдæр цыдысты скъолатæм æмæ уагътой хъомыладон-профилактикон мадзæлттæ, фæткхалджытимæ хицæнтæй кодтæй беседæтæ.
Апрель-майы мæйты Ахуырад æмæ зонады министрад басгæрста районы æппæт скъолаты æмæ бæстон ахуыр æрцыд документаци æмæ сæ зæрдæ барухс æмбæлон архайдæй. Уый та уыд, развæлгъау хайады специалисттæ кæй бабæрæг кодтой скъолаты æмæ æмбæлон æххуыс кæй бакодтой ахуыргæнæн уагдæтты къухдариуæггæнджытæн. Рустау æмæ Дменисы иумиагахуыргæнæн скъолаты ирон æвзаг æмæ литературæйы ахуыргæнджытæ Коцты Фатимæ æмæ Къусраты Анжелæ хайад райстой Æхсæнадæмон зонадон-практикон конференцийы «Хетæгкаты Къоста нырыккон национ ахуырады (Цæгат Ирыстоны квалификаци фæбæрзонддæр кæныны институты) æмæ сæ активон хайадисты тыххæй райстой грамотæтæ æмæ сертификаттæ. Дменис æмæ Къостайыхъæуы астæукаг скъолаты ахуыргæнджытæ Дудайты Земæ, Къусраты Анжелæ æмæ Плиты Заирæ Хетæгкаты Къостайы мадзæлтты боны цытæн сæ активон хайадисты тыххæй хорзæхджын æрцыдысты Ахуырады министрады грамотæтæй. Предметон ахуыргæнджытæ æмæ хайады методисттæн та сæ хорз æмæ фæстиуæгджын куысты тыххæй 2021-22 ахуыры азы районы администрацийы æрдыгæй лæвæрд æрцыдысты грамотæтæ.
Июны мæйы 50 ахуыргæнæгæй фылдæр уыдысты сæ квалификаци фæбæрзонддæр кæныны курсыты. Скъолаты ахуырдзаутæ кæнынц сихор, вæййы сын хæрзад хæринæгтæ æмæ адджын дæттæ. Къостайыхъæу æмæ Дменисы ахуыргæнæн уагдæтты вæййы хъарм сихор, ацы скъолаты ма уæвынад кæнынц фæдаргъдæргонд къордтæ.
Скъолаты актон залтæ мæгуырау уавæры кæй сты, уымæ гæсгæ сæ бахъæудзæн косметикон куыстытæ бакæнын, сæрды улæфтыты рæстæджы æркæсын бахъæудзæн хъармгæнæн сис-темæтæм дæр. Афтæ ма Дменисы скъолайы æртыккаг уæладзыджы бахъæудзæн капиталон цалцæг. Ацы фарста кæддæриддæр æрæвæры санитарон-эпидемиологон комитет, фæлæ фарст абоны онг дæр скъуыддзаг нæма æрцыд.
2021 азы ноябры мæйæ пандемийы аххосæй, нæ республикæйы уыд карантин æмæ аххæссыд 2022-æм азы январы мæйы кæронмæ, уымæ гæсгæ иумиагахуырадон скъолатæ рахызтысты дистанцион хуызы ахуырмæ. Уый аххосæй иуварс æрцыд ахуыргæнджыты радон аттестаци, кæцы аргъæвд æрцыд 2022-23 ахуыры азмæ. Аттестацийы чи ацæуа, уыцы ахуыргæнджыты номхыгъд у цæттæ. Апрель-ма-йы райстæуыд медицинон аптеч-кæтæ æмбæлон хосгæнæн препараттимæ (22400 сомы аргъ) æппæт ахуыргæнæн уагдæттæн. Республикæйы санитарон-эпидемиологон службæйы фæндонмæ гæсгæ скъолаты хæрæндæттæ хъуамæ ифтонг уой тæвд донæй, хайад сын балхæдта хъармгæнæн крантæ æмæ лæвæрд æрцыдысты Зар, Бихъар æмæ Рустауы скъолатæн, уыдон цæттæ сты эксплуатацимæ.
Бæрæг æнтыстытæм нæ кæсгæйæ, нырма не скъолаты куысты ис цухдзинæдтæ дæр, уыдон аиуварс кæныныл та хъуамæ бакусой куыд скъолаты къухдариуæггæнджытæ, афтæ ма хайады кусджытæ дæр. Республикон предметон олимпиадæйы æрмæстдæр хайад райста ирон æвзаг æмæ литературæйæ Рустауы скъолайы 10 къласы ахуыргæнинаг Кокойты Батрадз æмæ йын лæвæрд æрцыд 3-аг къæпхæны диплом.
Иумиагæй ахуырады æмвæзад нæу мæгуырау, фæлæ йæ ноджыдæр бахъæудзæн фæхуыздæр æмæ фæуæлдæр кæнын. Æрмæстдæр Къостайыхъæуы астæуккаг скъолайæ дарддæр иннæ скъолаты нæй спортивон залтæ, уый та æппæрццагæй æндавы ахуыртæ уадзыныл. Нæй сын спортивон инвентарь, ЦÆБ-ы ахуыртæ уадзынæн нæй кабинет, афтæ ма кабинеттæ нæй хими æмæ физикæйы предметтæй дæр, нæй реактивтæ химийы фæлварæнтæ уадзынæн, ирон, уырыссаг æмæ англисаг æвзæгты предметтæн нæй цæстуынгæ æрмæджытæ.
Æнæуый та хайады кусджытæ хорз æмбарынц сæ разылæууæг хæстæ æмæ тырнынц, цæмæй ноджыдæр фæхуыздæр уа ахуырфæразондзинад.
ХУЫБИАТЫ Никъала
Comments are closed, but trackbacks and pingbacks are open.