Республикæ Хуссар Ирыстоны Президент Бибылты Анатолийы раныхас Цхинвалы Театралон фæзуаты æфсæддон парады

Стыр Фыдыбæстæйон хæсты зынаргъ ветерантæ!

Республикæ Хуссар Ирыстоны æмæ Уæрæсейы Федерацийы Гарзджын тыхты инæлартæ, афицертæ æмæ салдаттæ!

Цытджын æмбæстæгтæ æмæ республикæйы уазджытæ!

Республикæйы къухдариуæгады номæй æмæ уын сæрмагондæй мæхи номæй арфæ кæнын Стыр Уæлахизы бæрæгбоны цытæн.

Рæстæг нæ æгъатырæй хицæн кæны 1945 азы уыцы нысаниуæгджын уалдзæгæй, планетæйы сæрмæ бæрæгбонон салюты гæрæхтæ куы айхъуыстысты, кæцытæ дунейæн фехъусын кодтой фашистон Германыл фæуæлахизы уац. Рацыд 72 азы, фæлæ 9 май милуангай адæймæгтæн баззайдзæн афæдзы иууыл зынаргъдæр, ахсджиагдæр бæрæгбонæй.

Хæст æгъатырæй бафæлвæрдта фидар удыхъæдæй Советон Цæдисы æппæт нациты минæвæртты. 1418 бон æмæ æхсæвы дæргъы хъæбатырæй мардысты Фыдыбæстæйы хъахъхъæнджытæ æмæ бæстæйы  сабыр цæрджытæ, пырх цы-дысты горæттæ æмæ сыгъдысты хъæутæ. Реалонæй тас уыд бæстæ бацахсынæн. Фæлæ æмуд советон адæм бахъахъхъæдтой сæ сæрибардзинад. Уый тыххæй нын Уæлахиз «æппæтæн иунæг» уымæн у.

Иумиаг знагыл фæуæлахизмæ аккаг бавæрд бахаста Хуссар Ирыстон дæр. Хуссарирыстойнæгтæй алы фронтты  тох кодтой 22 мин адæймагæй фылдæр, уыцы нымæцы иу минæй фылдæр бархионы, кæцыты ‘хсæн уыдис 56 чызджы. Уый афтæ нысан кæны, æмæ Хуссар Ирыстоны автономон областы цæрджытæй алы фæндзæм адæймаг ссис фронтовик. Уыдон  равдыстой диссаджы  хъæбатырдзинад Мæскуы æмæ Сталинграды цур тохты, Кавказмæ бацæуæнты, Курскы къæлæтауы. Сæ цардыл нæ ауæрдгæйæ, сæрибар кодтой Европæ æмæ Азийы бæстæты. Нæ хæдтæхæгскъæрджытæ артхæццæ арвыл сæхицæн скодтой  æнæмæлгæ кад. Сау æмæ Балтийы денджызты дæлдон кодтой знаджы науты. Чысыл Хуссар Ирыстон Райгуырæн бæстæйæн радта Советон Цæдисы аст хъайтары! Хæсты хайадисджытæй фондз мин æмæ æрдæг адæймаджы хорзæхджын æрцыдысты хæстон ордентæ æмæ майдантæй. Мах сæрыстыр стæм нæ кадджын ветерантæй. Кад æмæ уын цыт —  кæддæриддæр!

Хæлæрттæ!

Цалдæр минуты фæстæ Цхинвалы централон уынджы рацæудзæн символикон æнæмæлгæ полк. Стыр Фыдыбæстæйон хæсты хайадисджыты фырты фырттæ æмæ уыдоны фырттæ рахæсдзысты, рæстæджы аххосæй чи фæбур,  фронтовикты уыцы нывтæ, афтæ ма хæстæй чи нал ‘рыздæхт, уыдоны нывтæ. Ацы æнкъард номхыгъды ис 11763 адæймаджы. Ноджы ма авд минæй фылдæр та æбæрæгæй фесæфтысты. Чысыл Хуссар Ирыстонæн куыстхъом нæлгоймæгты 80 проценты фесафын уыд демографион катастрофæ, кæцыйæ нырма дæр не сраст стæм.

Фронтовикты фылдæр, кæцытæ хæсты быдырæй æрыздæхтысты цæфтæ æмæ уонгцухтæй, нал фæцардысты абоны онг. Уыдонæй бирæтæ, æгæрыстæмæй, Стыр Фыдыбæстæйон хæсты цæхæры чи бахсыст, ахæмтæ, не сфæрæзтой 1989-2008 азы нæ адæмы геноцид. Фæндон хæссын, цæмæй сæ нæмттæ ссарæм, абоны бонмæ чи нæ фæцард, уыцы ветерантæн.

Сидын æппæтреспубликон  минут æдзæмæй алæууын.

Бузныг.

Рацæудзысты азтæ, рацæудзысты дæсгай азтæ æмæ æнустæ, фæлæ хæсты хъæбатыр ветеранты стыр сгуыхтдзинад махæн дæр æмæ республикæйы фидæны фæлтæртæн дæр уыдзæн æдзухон зынаргъ ориентир.

Знагæн ныхкъуырд радтыны иумиаг хъуыддагмæ се стыр хайбавæрд бахастой Хуссар Ирыстоны фæсчъылыдымы фæл-лойгæнджытæ дæр. Фашисттæ æдзæсгомæй бырстой Фæскавказмæ, регионы хъæздыг æрдзон ресурстæ æмæ стратегион æгъдауæй ахсджиаг транспортон коммуникацитæ бацахсынмæ тырнгæйæ. Хуссар Ирыстон расидт æрцыд фронтон зонæйыл. Цхинвалы арæзт æрцыд хъахъхъæнынады комитет. Сæудæджерадон куыстуæттæ раконд æрцыдысты хæстон уавæрмæ, фрон-тæн продукци уадзгæйæ. Фæсчъылыдымы ма цы нæлгоймæгтæ баззад, уыдонæй арæзт æрцыд фондз батальоны хæххон æфцджытæ бахъахъхъæныны тыххæй. Æрмæст 1941-1942 азты ссæдз мин советон æмбæстагæй фылдæр ссардтой ам цæрыны, кусыны æмæ хос кæныны бынат. Хуссар Ирыстон расидт æрцыд æфсæддон-фæсчъылыдымон базæты ахсджиагдæртæй сæ иуыл. Фæсчъылыдымы фæллойгæнджытæн — æнусон бузныгдзинад æмæ кад!

Цытджын æмбæлттæ!

Дæсгай азты фæстæ æвзонг фæлтæр, кæцытæ хъомыл кодтой хистæрты хæстон традицитыл, равдыстой сæ хуыздæр миниуджытæ, Хуссар Ирыстоны сæрмæ гуырдзиаг неонацизмы мигътæ куы стыгуыр сты, уæд. Сæ адæмы сæрибардзинад æмæ хæдбардзинады сæрыл тохты,  бирæ хатты фылдæр чи уыд, уыцы знаджы ныхмæ мæлæтдзаг тохты бацæугæйæ, Фыдыбæстæйы æвзонг хъахъхъæнджытæ дунейæн равдыстой, раздæр кæй нæ федтой, ахæм хъайтардзинад æмæ ныфсхастдзинады цæвиттонтæ. Стыр Уæлахизы бон нысан кæнгæйæ, махæн бар нæй нæ бæстæйы историйы ацы сыфтæ ферох кæнын дæр.

Символикон у уый дæр, æмæ абон æфсæддон парады хайад кæй исынц Республикæ Хуссар Ирыстоны æмæ Уæрæсейы Федерацийы Гарзджын тыхты, Хуссар Ирыстоны Уæрæсейы Æдасдзинады федералон службæйы Арæнгæрон управленийы æфсæддон дæлхæйттæ. Уыдон иумæ ифтонг кæнынц ныфсджын сабырад æмæ æдасдзинад нæ зæххыл. Хуссар Ирыстоны æмæ Уæрæсейы Федерацийы баиугонд тыхтæн сæ бон у æвæстиатæй ныхкъуырд радтын нæ суверенон паддзахады паддзахадон æдасдзинад æмæ территориалон æнæхъæндзинад фехалынмæ цахæмфæнды бахъавдæн дæр. Уый хорз зонынц аг-рессортæ.

Мах нæ фæллайæм уый дзурын, æмæ Уæрæсе алы хатт дæр кæй уыд æмæ кæй уыдзæн нæ стратегион партнер. Уый бафидаргонд æрцыд Уæрæсейы Федерацийы Президент Владимир Владимиры фырт Путинимæ нæ фембæлды рæстæджы ацы аз 2-æм майы Сочийы. Мах нæ фидæн уынæм æнæфæхицæнгæ иудзинады Стыр Уæрæсеимæ. Ахæм равзæрст нæ куырыхон фыдæлтæ сарæзтой дард 1774 азы, æмæ уыцы равзæрсты фæдыл мах æнæфæцудгæйæ хъуамæ цæуæм.

Стыр Фыдыбæстæйон хæсты зынаргъ ветерантæ!

Уе сгуыхтдзинады стырдзинад æмбаргæйæ уын дзурын, адæм уæ иууылдæр кæй уарзынц, уый. Сымах стут нæ сæрыстырдзинад, цыт æмæ кад! Нæ цæст уын уарзы фидар æнæниздзинад æмæ бирæ азты цæрæнбон. Сабырдзинад æмæ амонд сымахæн æмæ уæ сывæллæттæн, уæ сывæллæтты сывæллæттæн æмæ уыдоны сывæллæттæн!

Зынаргъ хæлæрттæ, Фыдыбæстæйы хъахъхъæнджытæ!

Кæй зæгъын æй хъæуы, 9-æм май у уæ бæрæгбон дæр. Сымах рахастат уæ фыдæлтæй уыцы æнæуромгæ хъайтардзинад, кæцы тынг хорз фенын кодтат гуырдзиаг неофашизмы ных-мæ тугкалæн тохты. Бæрæгбоны хорзæх уæ уæд, мæ зынаргъ хæлæрттæ!

Иууыл зæрдæбындæр арфæтæ æз зæгъын Уæрæсейы Федерацийы Гарзджын тыхты æфсæддон службæгæнджытæн, уæрæсейаг арæнхъахъхъæнджытæн, кæцытæ службæ кæнынц Хуссар Ирыстоны. Сабырдзинад æмæ амонд сымахæн æмæ уæ бинонтæн!

Уадз, æмæ фидар сабырдзинад паддзахахиуæг кæнæнт Республикæ Хуссар Ирыстоны æппæт цæрджыты хæдзæртты æмæ зæрдæты!

Стыр Хуыцау æмæ Уастырджийы хорзæх уæд нæ хъæбатыр адæмы!

Стыр Уæлахизы бæрæгбоны хорзæх уæ уæд! Ура, æмбæлттæ!

Comments are closed, but trackbacks and pingbacks are open.