Хуыцаубоны горæт Цхинвалы уагъд æрцыд рок-фестиваль, ансамбль «Бонвæрон»-ыл 50 азы кæй æххæст кæны, уый цытæн. Кæд боныгъæд уазал уыд, уæддæр Театралон фæзуатмæ æрбамбырд сты ацы музыкæйæн табугæнджытæ. Концертмæ бацыдысты нæ республикæйы къухдариуæгад дæр бæстæйы Президент Бибылты Анатолийы сæргълæудæй.
Бибылты Анатоли зæрдæбынæй раарфæ кодта мадзалы организатортæн, уæлдайдæр та уыцы адæмæн, кæцытæ сæ хайбавæрд бахастой «Бонвæрон»-ы размæцыдмæ æмæ банысан кодта, ацы аивадон къорд бирæ азты дæргъы кæй у нæ культурæйы æппæтадæмон исбон.
«Ис ахæм бæрæгбонтæ, кæцытæн æнæсаразгæ нæ вæййы, уымæн æмæ бирæ азты дæргъы æнгом баст вæййынц адæмы цардимæ. Абоны бон «Бонвæрон»-ы юбилей дæр хауы уыцы бæрæгбонты номхыгъдмæ. Ацы музыкалон къорд 50 азы дæргъы лæггад кæнынц адæмæн, сæ арæхстдзинады фæрцы схызтысты аивады бæрзонд къæпхæнтæм æмæ фæндаг ссардтой мингай адæймæгты зæрдæтæм. Суанг 70-æм азтæй фæстæмæ ацы ансамбль æппынæдзух рæзмæ кæны нæ адæмы культурæ, æхсæнады зонгæ кодтой патриотон композицитимæ. Уыимæ иумæ ма, нæ æрыгон республикæйы знæгтæй бахъахъхъæнын куы бахъуыд, уæд ансамблы хайадисджытæ, куыд æцæг патриоттæ, афтæ æхсæнгарз райстой сæ къухтæм æмæ иннæ хæстонты æмрæнхъ хъахъхъæдтой сæ райгуырæн бæстæ. Куыд къорд æнæхъæнæй, афтæ нæ, фæлæ ма сæ алкæцы хайадисæг дæр у активон æхсæнадон архайæг. Мах сæрыстыр стæм «Бонвæрон»-æй æмæ мæ фæнды иууыл зæрдæбын арфæтæ ракæнын ацы юбилейы цытæн», – загъта йæ раныхасы бæстæйы Сæргълæууæг.
Бирæ азты дæргъы вокалон-инструменталон ансамбль «Бонвæрон»-ы хайадисджытæ кæй кæнынц сфæлдыстадон архайд, уый фæдыл сæ бæстæйы Президент схорзæхджын кодта паддзахадон хорзæхтæй. Республикæ Хуссар Ирыстоны сгуыхт артисты кадджын нæмттæ лæвæрд æрцыд Бедойты Тамазæн, Къæбулты Валентинæн, Чилæхсаты Петрæн æмæ Козаты Гелайæн.
РХИ-йы адæмон артист, композитор Харебаты Вадим йæ раныхасы стыр бузныджы ныхæстæ загъта Бибылты Анатолийæн йæ арфæты тыххæй æмæ ма банысан кодта, зæгъгæ, ацы концерт уагъд æрцыд Президенты æххуысы фæрцы.
«Фыццаджыдæр уал мæ бузныджы ныхæстæ фæнды зæгъын нæ горæтæн, йæ цæрджытæн. Уыдоны фæрцы мах рацыдыстæм ахæм дæргъвæтин фæндагыл, уыдоны фæрцы нын ис ахæм æнтыстытæ. Уæлдай бузныг нæ президент Бибылты Анатолийæн уый тыххæй дзурын, æмæ йе ‘ххуысы фæрцы уагъд æрцыд фыццаг рок-фестиваль Цхинвалы æмæ ныр цыппæрæм хатт лæууæм сценæйыл нæ уарзон адæмы раз. Ацы хъуыддаг ма хорз уымæй у, æмæ нæм ардæм æрцæуынц уазджытæ нæ сыхаг бæстæтæй æмæ музыкæйæн табугæнджытæ базонгæ вæййынц сæ курдиатимæ», – загъта Харебаты Вадим.
Концерты ма «Бонвæрон»-æй дарддæр зарджытæ сæххæст кодтой æндæр зарæггæнджытæ дæр. Уыдоны ‘хсæн уыдысты не ‘мзæххонтæ Харебаты Марта, Джиоты Любæ, Хохойты Влад, æмæ ма ахæм зарæггæнджыты къордтæ, куыд цхинвайлаг «JAZZ BAND» æмæ абхазаг «Dzioff», «Blood Dealers», «Лабиринт», «КA– 50».
ДЖИОТЫ Алыксандр
Comments are closed, but trackbacks and pingbacks are open.