РХИ-йы Хицауады Сæрдары хæдивæг Козаты Димитрæн кусæгон балц уыд Ленингоры районмæ. Йемæ ма уыдысты РХИ-йы Паддзахадон таможнæйон комитеты сæрдар Цхуырбаты Мурат, йæ хæдивæг Гуыцмæзты Алан æмæ Паддзахадон æдасдзинады комитеты сæрдары хæдивæг Гулиты Васили.

Козаты Димитр базонгæ арæныл ахизыны фæхуымæтæгдæр режимы пункт «Раздæхæн»-ы куыстимæ. Уый фæстæ та фембæлд районы къухдариуæгад æмæ амалиуæггæнджытимæ.

Паддзахадон арæны ацы фадыгмæ Хицауады Сæрдары хæдивæджы цымыдис хуымæтæджы нæу. Таможнæйон æмæ хъалонты сферæйы куратор уæвгæйæ, уый йæ разы хæс æрæвæрдта службæйы куыст максималон æмвæзадмæ ракæнын, цы фадæттæ сæм ис, æппæт уыдонæй спайда кæнгæйæ. Уыдонæй иу у арæныл ахизыны фæхуымæтæгдæр режимы пункт «Раздæхæн»-ыл хъæууонхæдзарадон продукци ласын фæхуымæтæгдæр кæнын.

Уæвæг нормативтæм гæсгæ Ленингоры цæрджытæй специалон уадзæн гæххæтт кæмæ ис, уыдонæн сæ бон у, мæйы дæргъы иу хатт 50 килограммы бар цы товартæн ис, уыдоны ласын. Фæлæ, уадзæн пункты таможнæйон басгæрсты тыххæй ифтонггæрзтæ кæй нæй, уымæ гæсгæ арæнхъахъхъæнджытæн сæ бон нæу æххæстæй уæзтыл контроль кæнын, афтæ ма иу адæймаг мæйы дæргъы арæныл цал хатты ахизы, уый сбæрæг кæнын дæр. Арæнгæрон хъæуты пайда кæнынц уыцы уавæрæй æмæ арæх рейсытæ аразынц æнæхъæн би-нонтæй, цæмæй куыд гæнæн ис, афтæ арæныл фылдæр товар аласой.

Ленингоры районы мидхъуыддæгты управленийы хистæр Битарты Роберт куыд фехъусын кодта, уымæ гæсгæ уадзæн пунктыл 6:30 сахатæй 20:00 сахатмæ æрвылбон дæр астæуккаг нымадæй ласт цæуы 200 тоннæйы бæрц хъæууонхæдзарадон продукци, кæцы уый фæстæ реализаци цæуы республикæйы территорийыл. Афтæмæй, Ленингоры цæрджытæ скъуыддзаг кæнынц дывæр хæс: иуæй фæлварынц сæхицæн кæрдзыны æхца бакусыныл æмæ иннæмæй та цæрджыты ифтонг кæнынц хъæуæг хъæууонхæдзарадон продукцийæ.

Арæныл ахизыны фæхуымæтæгдæр режимы уавæры тыххæй бæстондæр информаци райсыны фæдыл Козаты Димитр фæнд кæны къуырион мониторинг сорганизаци кæнын арæнгæрон æмæ таможнæйон службæты æмæ Паддзахадон æдасдзинады комитеты минæвæртты хайадистæй.

«Хъуыддæгты уæвæг уавæр хынцгæйæ, ам æнæмæнгхъæуæг у экологион æмæ экономикон æдасдзинады фарстытæ сифтонг кæнын, æмæ, кæй зæгъын æй хъæуы, махæн нæ бон нæу республикæйы паддзахадон бюджет баххæст кæныны тыххæй фадæттæй ма спайда кæнын, кæцыты потенциалонæй дæтты уадзæн пункт «Раздæхæн»-ы сæвзæргæ реалон уавæр», — бамбарын кодта Козаты Димитр.

Уый бахæс кодта районы мидхъуыддæгты управленийы хистæрæн, цæмæй сбæрæг кæна, республикæмæ æрбаласгæ халсæрттæ æмæ дыргъты аргъ бынаты кæд у 15 сомы, уæд сæ аргъ цæмæн схизы 40-45 соммæ сæргай уæйгæнгæйæ. Районы амалиуæггæнджыты хъуыды цахæм у арæныл товартæ фæхуымæтæгдæр режимы ласыны тыххæй, уый Хицауады Сæрдары хæдивæг базыдта комкоммæ уыдонимæ Ленингоры районы администрацийы сæргълæууæджы хæдивæг Александр Бараташвилийы хайадистæй куы аныхас кодта, уæд.

Куыд рабæрæг, афтæмæй, коммерцион нысæнттæн товар кæцы æмбæстæгтæ ласынц, уыдон не сты, таможнæйон фиддонтæ сæ исой, уый ныхмæ, æрмæстдæр товартæ ласынæн хъуамæ уа æмбæлон статус æмæ æххæст цæуа карзæй.

Козаты Димитр банысан кодта, зæгъгæ, архайдтыты дарддæры алгоритм арæзт цæудзæн ауадзгæ мониторинджы фæстиуджытæм гæсгæ.

Фембæлды рæстæджы амалиуæггæнджытæ лæвæрдтой, цы фарстытæ сæ цымыдис кæнынц, уыдон, афтæ ма радзырдтой сæ проблемæты тыххæй дæр. Уый сын баныфсæвæрдта, зæгъгæ, йæ компетенцимæ гæсгæ куыд йæ бон суа, афтæ сæ аскъуыддзаг кæндзæн, æмæ йæ фадæтты фæлгæтты чи не сты, уыдон та арвитдзæн æмбæлон инстанцитæм.

Районы цæрджытимæ ныхас кæнгæйæ, Хицауады Сæрдары хæдивæг банысан кодта, зæгъгæ, республикæйы къухдариуæгад Президент Тыбылты Леониды сæргълæудæй Ленингоры районмæ здахы уæлдай хъусдард куыд социалон-экономикон рæзты планы, афтæ культурон интеграцийы дæр.

«Æз æмбарын уый, æмæ нырма кæй ис бирæ æнæаскъуыддзаггонд проблемæтæ, фæлæ уымæн ис объективон аххосæгтæ  нæ паддзахад ныртæккæ архайы йæ къæхтыл слæууыныл. Уымæ нæ кæсгæйæ, районы æндидзыд цæуы инфраструктурæ, арæзт цæуынц социалон-культурон объекттæ. Уырны мæ, куыдфæстаг-мæ скъуыддзаг кæй æрцæу-дзысты æндæр фарстытæ дæр», — банысан кодта Козаты Димитр.

Бынæттон администрацийы къухдариуæгадимæ фембæлды ма уынаффæ кодтой районы хъалонтæ сæвæрыны фарстытыл дæр.

РХИ-йы Хицауады

официалон сайт

Comments are closed, but trackbacks and pingbacks are open.