Адæмон кафты сывæллæтты хореографион ансамбль «ИРОН» фыццаг бынат бацахста VII Æппæтадæмон конкурс-фестиваль «Созвездие дружбы»-йы. Цы æртæ кафты ахастой хуссарирыстойнаг коллектив фестивалмæ — «Симд», «Горский» æмæ «Фламенко», уыдоны иууылдæр сæххæст кодтой иттæг хорз æмæ сын радтой фыццаг бынæттæ.
Ацы конкурс-фестиваль нысанмæздæхт у нациты æнгом кæнынмæ, хæлардзинад тауынмæ æмæ ма иумæйагæй национ культурæ, патриотизм фидар кæнынмæ. Стæй ма сфæлдыстадон коллективты фæсивæд дæр сæ арæхстдзинады æмвæзад бæрзонддæр кæнынц, зонгæ кæнынц кæрæдзийы национ традицитимæ, райхæлы дзы ног курдиатджын гоймæгты сфæлдыстад. Фестивалы хайад фæисынц Уæрæсейы регионтæ, сыхаг бæстæтæ æмæ ма Ев-ропæйæ дæр æрцæуынц уазæгуаты. Ацы аз ам санкциты фæстиуæгæн дардбæстаг сфæлдыстадон коллективтæ хайад нæ райстой, фæлæ уæддæр тынг цымыдисон рауадис.
«Созвездие дружбы»-йы æдæппæт хайад райстой 600 артисты бæрц 6 азæй суанг 60 азы кары онг, æмæ сæххæст кодтой 80 номырæй фылдæр. Сабаты 29 октябры Нальцыччы культурæйы галуа-ны сценæйыл ансамбль «ИРОН»-имæ сæ арæхстдзинад равдыстой Цæгат Ирыстон-Аланийы, Абхазы, Дагъыстаны, Астраханы, Кæсæг-Балхъары æмæ æндæр регионты минæвæрттæ.
Ансамбль «ИРОН»-ы сконды уыдис 33 кафæджы æмæ уыцы бон сæххæст кодтой æртæ кафты. Кæд æмæ дзы конкуренци стыр уыд, уæддæр нæ коллективы къухты бафтыд æнтыст, сæ аив змæлдыл сын сæ цæст æрæвæрдтой сценæмæкæсджытæ æмæ жюрийы уæнгтæ, æмæ æртæ кафтæй дæр райстой фыццаг бынæттæ.
Дыккаг бон та фестивалы хайадисджытæ равдыстой диссаджы гала-кон-церт, кæцымæ кæсынмæ æрбацыдысты бынæттон цæрджытæ æмæ ма цытджын уазджытæ дæр. Ацы æппæтадæмон проект барæвдз кодта æмæ йæ адæмы рæгъмæ рахаста Дунейы Артийаг комитеты кавказаг минæварад æмæ ныр æвдæм хатт йæ егъау хайбавæрд бахас-та Уæрæсейы культурæйы фондмæ. Алы фестивалы дæр хуыздæр артисттæ хорзæхджын æрцæуынц алыгъуызон хорзæхтæй æмæ уый та тынг разæнгард кæны æрыгон фæлтæрты.
Ансамбль «ИРОН»-ы аивадон къухдариуæггæнæг Хуыгаты Дианæйæн ацы æнтыст фыццаг хатт нæу — йæ дæлбар коллектив ма ныры онг дæр бирæ хæттыты рамбылдта алыгъуызон æппæтадæмон конкурсты æмæ фестивалты. Ныр дæр та сæ куы фæхуыдтой ахæм мадзалмæ, уæд та сæхи арæвдз кодтой. Фæлæ ахæм дард фæндагæн æхцайы фæрæзтæ дæр дзæвгар фæхъæуы æмæ Дианæ стыр бузныг у бæстæйы Президент Гаглойты Аланæй, йе ххуысы къух сæм кæй фæдаргъ кодта, уымæй.
ДЖИОТЫ Алыксандр
Comments are closed, but trackbacks and pingbacks are open.