Ног къуырийы райдианы Паддзахадон университеты равдыстыты залы байгом уыдзæнис не ‘мзæххон рæсугъд чызг, курдиатджын нывгæнæг Æлборты Лирæйы персоналон равдыст «Цвет», зæгъгæ, ахæм номимæ. Рагæй уыд Лирæйы бæллиц йе сфæлдыстадон архайды фыццаг къахдзæфтæ кæм райдыдтой, уыцы уарзон Цхинвалы равдисын йæ ахорæнты дуне.

Æрыгон нывгæнæджы персоналон равдыст бацæттæ кодта  Культурæйы министрад æмæ ныр алкæмæн дæр цыппæрæм декабры онг фадат уыдзæн уырдæм бацæуынæн æмæ Лирæйы аивадæн саргъ кæнынæн.

Æлборты Лирæ райгуырд 1995-æм азы Цæгат Ирыстоны æмæ схъомыл ис горæт Цхинвалы. Хæрзчысыл ма куы уыдис, уæд фæбæрæг нывкæнынмæ кæй арæхсы æмæ йæ йæ мад бакодта нæ горæты Сывæллæтты сфæлдыстадон галуанмæ, уый фæстæ та Тугъанты Махарбеджы номыл нывгæнæн скъоламæ дыууæ азы æмгъуыдмæ. Уыимæ иумæ ма ахуыр кодта фыццæгæм музыкалон скъолайы дæр. Фæлæ куыд рабæрæг, афтæмæй чызг фылдæр цымыдис кодта нывкæнынадмæ æмæ уæндонæй ныллæууыд йæ равзаргæ фæндагыл. Йæ сабийы бонты æгæрон бæллицтæ йын сбазырджын кодтой нывкæнынад кæй фæрцы бауарзта, цъылынæг æмæ йæ ахорæнтимæ архайыныл чи фæцайдагъ кодта, йæ уыцы фыццаг ахуыргæнæг Республикæ Хуссар Ирыстоны адæмон нывгæнæг, дзæнæттаг Саулохты Мурат. Лирæ 2009-æм азы йæ ахуыр адарддæр кодта Тугъанты Махарбеджы номыл Цхинвалы ахуыргæнæндоны æмæ йæ 2013-æм азы каст фæцис хорз бæрæггæнæнтимæ. Студент ма куы уыдис, уæд кусынмæ бацыд нæ горæты 3-æм астæуккаг скъоламæ æмæ ахуыргæнинæгтæн амыдта нывкæнын. Цхинвалы йæ ахуыры фæстæ курдиатджын чызг бацыд Хетæгкаты Къостайы номыл Цæгат Ирыстоны Паддзахадон университеты аивæдты факультетмæ. Ам йæ зæрдæмæ фæцыдис уæлæдарæсы дизайны куыст æмæ бахуыдта нырыккон къабаты коллекци национ орнаментимæ æмæ-иу сæ рахаста адæмы рæгъмæ.

Лирæ кæд æрыгон нывгæнæг у, уæддæр ын ныридæгæн бантыст Цæгат Кавказы æндæр æмæ æндæр горæтты равдыстыты хайад райсын. У æхсæнадæмон фестивалтæ æмæ конкурсты дипломант. Йе сфæлдыстад у цымыдисон, фылдæр пайда кæны ирд ахорæнтæй. Абстрактон импрессионизмы жанры, хардэйджы стилы фæлдисы йæ куыстытæ. 2012-æм азæй фæстæмæ активон хайад исы Дзæуджыхъæуы равдыстыты. Йæ куыстытæ æвæрд сты цалдæр паддзахадон галерея æмæ музейы. Æлборты Лирæ ныртæккæ бацыд йе сфæлдыстадон тæмæны æмæ нырма бирæ хорз уацмыстæй барæвдаудзæн аивадуарзджыты зæрдæтæ.

Цхуырбаты Ларисæ