Нæ республикæйы перспективон æрыгон нывгæнджыты куыстытæ бавдыст æрцæудзысты, 22 апрелы Мæскуыйы чи байгом уыдзæн «Уæрæсейы æрыгон нывгæнджытæ», зæгъгæ, ахæм равдыстмæ. Уый уагъд цæудзæн Нывгæнджыты централон хæдзары, — фехъусын кодта РХИ-йы Культурæйы министрады сæйраг специалист, кæцы лæудзæн Хуссар Ирыстоны æрыгон нывгæнджыты делегацийы сæргъ.

Организацион æгъдауæй æрыгон нывгæнджытæн баххуыс кодта республикæйы Нывгæнджыты цæдис æмæ Культурæйы министрад.

Раздæр ма куыд хъусын кодтам, афтæмæй аивады æрыгон хуссарирыстойнаг архайджыты куыстытæ равзæрстой Хуссар Ирыстоны Нывгæнджыты цæдисы æмæ равдысты агъоммæ электронон хуызы бавдыст æрцыдысты Уæрæсейы Нывгæнджыты цæдисы къамисмæ, кæцытæ сæ рады уыдонæй равзæрстой ноджы хуыздæрты.

Организатор — Уæрæсейы Нывгæнджыты цæдисы уавæртæм гæсгæ равдысты сæ куыстытæ гæнæн ис равдисой, 35 азы онг кæуыл цæуы, ахæм нывгæнджытæ.

Се сфæлдыстадон куыстытæ æрыгон нывгæнджытæ бавдыстой аивады ахæм хуызтæй: хуызфыссынад, скульптурæ, графикæ, монументалон аивад, адæмон аивад, аивадзонынад æмæ æндæртæ. Равдыст байгом кæнынмæ бацæттæ æрцæудзæн «Уæрæсейы æрыгон нывгæнджыты» каталог.

Культурæйы министр Остъаты Мадинæ банысан кодта, зæгъгæ, нæ нывгæнджытæ фыццаг хатт нæ исынц хайад æппæтуæрæсейаг равдыстыты. «Мах ивгъуыд аз дæр хайад истам дыууæ равдысты: „Отражение Европы“, æмæ Стыр Уæлахизы бæрæгбоны цытæн вернисажы. Уæлдæр банысангонд равдыстытæй дарддæр ма хуссарирыстойнаг нывгæнджыты сфæлдыстадимæ ацы аз базонгæ уыдзысты Хъырымы цæрджытæ дæр.

Хуссар Ирыстоны æмæ Уæрæсейы Федерацийы культурæйы министрадты ’хсæн 2010-2016 азтæн æмгуысткæнынады Программæ реализаци кæныны фæлгæтты, арæзт цæуы мадзæлтты план, кæцыйы мах фæдфæдылонæй реализаци кæнæм», — банысан кодта культурæйы министр. Уый ма куыд загъта, афтæмæй ацы аз нысан цæуынц бирæ цымыдисон мадзæлттæ æхсæнкультурон æмгуысткæнынады фæлгæтты, кæцыты архайдзысты Уæрæсе æмæ Хуссар Ирыстоны сфæлдыстадон баиу-гæндтæ. Уыдон сты конкурстæ, концерттæ, пленэртæ, кинофестивалтæ, симпозиумтæ æмæ æндæртæ.

Comments are closed, but trackbacks and pingbacks are open.