Хозиты Барисы Цæгат Ирыстоны чи нæ зоны, ахæм адæймæгтæ, æвæццæгæн, бирæ нæ разындзæн. Уый зындгонд у куыд журналистон сфæлдыстады теори æмæ методикæйы специалист, аивадон публицистикæ æмæ литературон критикæйы, бынæттон æмæ национ мыхуыры, дзыллон информацийы фæрæзты жанрон алыхуызондзинады къабазы арæхстджын хуым-гæнæг, уыимæ йæ зонынц канд нæхимæ нæ, фæлæ республикæйы арæнты æддейæ дæр. 286 зонадон зонадон-иртасæн æмæ литературон-критикон куысты, уыдонимæ – библиографион амонæны, зонадон  монографи æмæ ахуыргæнæн-методикон æххуысгæнæн 15 чиныджы автор, йæ куыстытæй бирæтæ рацыдысты куыд Уæрæсейы, афтæ фæсарæйнаг бæстæты дæр. Хозийы фырты зонадон, организаторон æмæ сфæлдыстадон сгуыхтдзинæдтæн ирд æвдисæн сты РЦИ-Аланийы æмæ Уæрæсейы Федерацийы культурæйы сгуыхт кус-æджы кадджын нæмттæ йын лæвæрд кæй æрцыд, ССР Цæдисы Журналистты цæдисмæ æмæ йæ журналистты Дунеон организацимæ, Уæрæсейы Фысджыты æмæ Журналистты цæдистæм æй кæй райстой, Соросы Фонды æмæ Будапешты Центрон-Европæйаг университеты гранттæ йын кæй саккаг кодтой, уыдæттæ. Йæ ном хаст æрцыд, ссæдз азы размæ цы бæрæгуат-чиныг рацыд «Кто есть кто в Осетии», зæгъгæ, уырдæм, фæстæдæр та – энциклопе-дитæ «Народы великой России. Осетины» æмæ «Знаменитые люди Кавказа»-мæ дæр, бахауд уæрæсейаг литературæ, журналистикæ æмæ культурологи дæсныдæр иртасджыты номхыгъдмæ.

Хозиты Барис Раздены фырт райгуырд 1956 азы 15 июны Цæгат Ирыстоны АССР-йы Æрыдоны районы Рассветы хъæуы. 1973 азы каст фæци Фыййаджыбылы астæуккаг скъола. 1974-1976 азты службæ кодта советон æфсæдты Къорды Германийы, уым каст фæци æфсæддон уацхæсджыты скъола дæр. 1977 азы ахуыр кæнынмæ бацыд Цæгат Ирыстоны Хетæгкаты Къостайы номыл университеты филологон факультетмæ. Æртæ азы фæстæ аивта Санкт-Петербурджы паддзахадон университеты журналистикæйы факультетмæ æмæ йæ каст фæци 1987 азы. 1988 азæй 1991 азмæ – ЦИПУ-йы ассистент, 1991 азæй 1993 азмæ – хистæр ахуыргæнæг, 1994 азы – доцент, 1994-1995 азты – журналистикæйы кафедрæйы сæргълæууæг. 1956 азы йæ снысан кодтой ЦИПУ-йы телеуынынады директорæй.

1998 азы Хозиты Барис æвзæрст æрцыд ЦИПУ-йы аивæдты факультеты деканæй. Деканаты сæргъы лæууыд 12 азы. Йæ разамындæй ам ирдæй разындысты дыууæ зонадон фæндаджы: «Æнусты арæныл нывкæнынады аивад», «Ныры дуджы актерон аивад». Уыдон баиу кодтой дæсгай актерон æмæ нывкæнынадон аивадиртасджыты. Хозийы фырты хъæппæрисæй æмæ активон архайдæй арæзт æрцыд цалдæр зонадон-практикон конференцийы истори, аивад æмæ аивадиртасæг зонæдты нырыккон уавæры фарстыты фæдыл, уагъд æрцыд кусæн программæтæ, ахуыргæнæн чингуытæ, практикумтæ, актертæ æмæ нывгæнджыты тыххæй аивæдты факультеты альбом. Йæ уды фæллой, йæ бавæрæн бахаста Ирыстоны уæлдæр аивадон æмæ актерон ахуырад сæндидзын кæныны æмæ рæзты хъуыддагмæ. Куыд факультеты разамонæг, афтæ Хозиты Барис йæхи равдыста иттæг хорз организаторæй, йæ алыварс æрбангом кодта йæхи хуызæн хъуыдыгæнджыты командæ, коллективы куысты гъæд хуыздæр кæнгæйæ. Уый фæстиуæгæн аивæдты факультет сси Уæрæсейы Хуссары аивадиртасæн раззагдæр ахуыргæнæн центр.

Организаторон, иртасынадон архайды алыхуызон фæлтæрддзинады руаджы æмæ лекцитæ кæсынмæ арæхстдзинады фæрцы Барисæн йæхицæй дæр рауад республикæйы журналистон ахуырады методикæ æмæ теорийы арфхъуыдыгæнæг, бирæзонаг, универсалон специалист, сси новаторон ахуыргæнæн программæты æмæ ахуыргæнæн-методикон куыстыты автор, канд университеты нæ, фæлæ республикæйы æхсæнадон царды дæр активон архайæг. Хозийы-фырты лекцитæ æмæ семинарон ахуыртæ хицæн кæнынц зонадон, методикон æмæ практикон здæхынадæй.

Хозиты Барисы зонадон интерестæ баст сты журналистон сфæлдыстады теори æмæ методикæйы, национ культурæйы историйы бындуртæ иртасынимæ. Республикæйы æмæ  йæ арæнтæй æддейæ дæр уæрæх зындгонд сты уæлдæр скъолаты национ культурæтæ ахуыр кæныны тыххæй Хозиты Барисы оригиналон идеятæ. Йæ концепцийы сæйраг уагæвæрдтæ мыхуыргонд æрцыдысты 1996 азы журнал «Кавказы зонадон цард»-ы æртыккаг номыры. Зонадон цардмæ цы бæлвырд иртасæнтæ æмæ æрмæджыты концептуалон бакуыстытæ æрæвæрдтой бындур, разамынд цы факультетæн лæвæрдта, уый иртасæн æмæ ахуыргæнæн-методикон архайдæн. Хозиты Барисы разамындæй æрвылаз дæр арæзт цæуынц зонадон-практикон конференцитæ. Уый хъæппæрисæй арæзт æрцыд сфæлдыстадон æрмадз «Журналист. Прессæ. Аудитори», разамонæг дæр ын йæхæдæг у.

Уымæй уæлдай ма ахуыргонд Хозийы фырт иудадзыг мыхуыр кæны йæ уацтæ  Санкт-Петербурджы, Ростовы, Краснодары æмæ Дзæуджыхъæуы зонадон рауагъдæдты. Зæгъæм, ныммыхуыр кодта «Осетинская филология: «История и современность», «Журналистика на пороге XXI века: Исторический опыт и современное развитие», «Журналистика. Филология. История. Эволюция и проблемы». Хозиты Барис  докладтæ скæны æмæ раныхас кæны республикон, регионалон, иумæйагнацион æмæ дунеон конференциты.

Уыдæттæ иууылдæр Барисы къухы æфтынц, адæмимæ кусын кæй зоны, зæрдæхæлар кæй у, стыр актертæн, нывгæнджытæн, студенттæн æмæ хуымæтæджы æххуысгæнæг кусджытæн дæр аргъ кæнын кæй зоны, уый фæрцы. Барис у зынгæ, бирæвæрсыг сфæлдыстадон адæймаг. Рагæй фæстæмæ дæр уарзы актерон æмæ нывкæнынады аивад, уымæн сын снывонд кодта 40 зонадон мыхуырон куысты дæр. Хуымæтæджы йæ не снысан кодтой аивæдты факультеты разамонæгæй. Аргъ ын ис куыд декан æмæ куыд специалист, афтæ дæр. Цæгат Ирыстоны Хетæгкаты Къостайы номыл паддзахадон университеты йе ‘нтыстджын æмæ алывæрсыгон куыст бæрæггонд æрцыд алыхуызон хæрзиуджытæй, дипломтæй, кадджын нæмттæй.

Хозиты Барис зонадон-иртасæн куыст кæны 28 азы, кафедрæйы сæргълæууæгæй бакуыста дыууæ азы, аивæдты факультеты æмæ ирон филологийы деканæй – 18 азы. Йæ куысты сæйраг æмæ иунæг бынат у Цæгат Ирыстоны Хетæгкаты Къостайы номыл паддзахадон университет. Республикæйы сæйраг уæлдæр скъолайы ассистентæй, хистæр ахуыргæнæгæй, доцентæй, кафедрæйы сæргълæууæгæй æмæ факультеты деканæй кусгæйæ, уый æнтыстджын разамынд лæвæрдта æмæ дæтты журналистикæйы сфæлдыстадон æрмадзæн. Ивгъуыд рæстæджы уый зонадон разамонæг уыд 100 дипломон куыстæй фыл-дæрæн, йæ разамындæй мыхуыры рацыд 15 чиныджы, æмæ 290 мыхуырон зонадон æмæ популярон куысты. Ирон журналистикæйы рæзтмæ Хозийы фырты бавæрæныл куы дзурæм, уæд ныффыста 547 зонадон æмæ публицистон уацы, мыхуыргонд æрцыдысты центрон æмæ бынæттон мыхуыры. 1988 азы рацыд йæ чиныг «Осетинская литература: учебник-хрестоматия», 1993, 2001 азты – «Елбыздыко Бритаев: фотоальбом», 2003 азы – «Теория и практика перевода: библиографический указатель» æмæ «Концепция многоуровневой системы подготовки журналистов», 2004 азы – «Теория и практика перевода: учебно-методическое пособие», 2005 азы – «Магометов: научно-творческий портрет», 2006 азы – «М.М. Блиев: научно-творческий портрет» æмæ ма ноджыдæр аст ахуыргонды зонадон-сфæлдыстадон портреттæ – чингуытæ, уыдонимæ Джусойты Нафийы тыххæй дæр, æдæппæт – 250 мыхуырон сыфæй фылдæр.

Хозиты Барис у авторитетон ахуыргонд-журналист, зындгонд литературон критик æмæ курдиатджын публицист, уæзгæ у йæ хайбавæрд нæ классикты литературон бынтæ бахъахъхъæныны хъуыддагмæ,  æрыгон фысджытæн æмæ журналисттæн сси, стыр аргъ кæмæн кæнынц, ахæм æууæнкджын ахуыргæнæг æмæ зондамонæг. Стыр аргъ кæнын ын æмбæлы, культурæ æмæ аивады къабазы цы æнтыстджын æхсæнадон куыст кæны, уый тыххæй дæр. Хозиты Барис у, йæ рæстæджы фæсивæдон журнал «Дарьял» уадзын райдайыны хъæппæрис чи равдыста, уыдонæй иу.

Æрæджы Хозийы-фырт сбæрæг кодта йæ 60 азы юбилей, схæццæ ис йæ хурхæтæнмæ. Мыхуыры хъуыддаджы журналистикæйы факультеты разамынд цы сфæлдыстадон æрмадзæн дæтты, уый факультеты у хуыздæртæй иу. Йæхи сæрмагонд хъуыддæгтæ дæр хорз цæуынц: æрæджы мыхуыр кæнынмæ радта æвзæрст уацмысты æртæ чиныджы, рæхджы рацæудзысты ирон æмæ уырыссаг æвзæгтыл. Ноджыдæр ма бирæ хорз фæндтæ ис ацы æвæллайгæ хæдхуыз сфæлдыстадон адæймагмæ æмæ йын сыл Дунескæнæг рæстаргъуыд кæнæд!

Багаты Аврам,

Цæгат Ирыстоны культурæйы сгуыхт

кусæг, Республикæ Хуссар Ирыстоны

сгуыхт журналист, Джусойты Нафийы

номыл национ литературон премийы лауреат

Comments are closed, but trackbacks and pingbacks are open.