Фæстаг рæстæджы куыд горæт Цхинвал, афтæ республикæйы районтæ дæр цæхгæр сæ хуыз хорзæрдæм кæй ивынц, уымæн æвдисæнтæ стæм иууылдæр. Бонæй-бон фылдæр кæнынц нæ горæты хæрзарæзт уынгты æмæ æндæр арæзтæдты нымæц.
Кæд фарон нæ горæты 7 уынджы æрцыд цалцæг, уæд ацы аз та Инвестицион программæйы фæлгæтты цалцæг хъуамæ æрцæуа 11 уынджы. Цхинвалы соматикон рын-чындоны цурты фæцæйцæугæйæ, адæймаг æнæфæхатгæ нæ фæуыдзæн, йæ алыварс цы арæзтæдтæ цæуы, уый. Иуæрдыгæй – хирургион хайад, йæ размæ – гуырæн хæдзар æмæ сывæллæтты реабилитацион центр. Сывæллæтты реабилитацион центры арæзтад фæуын-хъус у, тагъд æй эксплуатацимæ ратдзысты. Уæдæ афтæ зæгъæн ис, горæт кæй рæзы, кæй рæсугъд кæны бонæй-бонмæ, стæй канд горæт нæ, фæлæ районтæ дæр. Дзауы райцентр дæр йæ хуыз скалдта. Сыгъдæг уынгтæ, ног хæрзарæзт тротуартæ, администрацийы ногарæзт бæстыхай, скъола, банчы ног бæстыхай, рынчындон, магазинтæ æмæ бирæ æндæр бæстыхæйттæ – ахæмæй йæ уынæм абон мах.
Æмæ канд райцентр нæ, фæлæ районы дæрддаг хъæутæм дæр арæзт æрцыдысты фæндæгтæ, дон æмæ сæм электроны рухс бауагътой, аразынц хидтæ.
Æппæт ацы хорз хъуыддæгтæ дзурæг сты районы администрацийы сæргълæууæг Чилæхсаты Владимиры хорз куыстыл. Уымæй районы цæрджытæ иууылдæр сты райгонд. Уæдæ дын бантысæд, Владимир, ноджы фылдæр саразын адæмы фæрныгадæн.
Æрæджы Дзауы рынчындонмæ бацыдтæн мæ хæстæгмæ рынчынфæрсæг æмæ дисы бахаудтæн. Афтæ фенхъæлдтон, цыма Дзауы нæ, фæлæ кæцыдæр стыр горæты диссаджы клиникæмæ бахаудтæн. Нырма уал йæ кæрт фæцыд тынг мæ зæрдæмæ, уыдис сыгъдæг æмæ хæрзæфснайд. Рынчындонмæ мидæмæ бахизгæйæ, адæймаг æнæфæхатгæ нæ фæуыдзæн, ацы уагдоны куыст йæ уагыл кæй цæуы, уый. Цæхæртæкалгæ асинтыл дыккаг уæладзыгмæ схызтæн, уым дæр афтæ – сыгъдæг, фоейы – уазалгæнæн, телевизор æмæ дивантæ, рудзгуытыл алыгъуызон дидинджытæ.
Палатæмæ бахизгæйæ, афарстон рынчынты, куыдтæ сты, уымæй, стæй сын куы загътон, рынчындон мæ зæрдæмæ кæй фæцыд, уый, уæд кæрæдзийы дзыхæй ныхас ис-гæйæ, райдыдтой æппæлын рынчындоны кусджытæй, сæйраг дохтырæй суанг æфснай-джыты онг.
Кæркуысты Шурæ: «Æз ацы рынчындонмæ арæх æрбахауын, мæ туджы æлхъывдад бæрзонд кæй вæййы, уый аххосæй. Иугæр рынчындонмæ æрбахауын, уæд та фæныфс-джын вæййын, зонын æй, кæй та мæ адзæбæх кæндзысты. Дохтыртæн æмæ медицинон хотæн ахæм аудгæ ахаст ис рынчынтæм æмæ канд хостæй нæ адзæбæх кæнынц адæймаджы, фæлæ ма дзыхы дзырдæй дæр, иууыл бузныгдæр дæн дохтыр Дзадтиаты Фатимæйæ».
Джергаты Земфирæ: «Æз фыццаг хатт дæн ацы рынчындоны, фæлæ дохтыртæ æмæ медицинон хоты аудгæ ахаст адæймаг æвиппайды фæхаты, уæлдайдæр та – Дзадтиаты Фатимæйы ахаст. Мæ туджы æлхъывдад тынг бæрзонд уыд æмæ мын æй дыккаг бонмæ нормæмæ æркодта. Мæнæ Шурæ куыд загъта, афтæ æцæг йæ дзыхы ныхасæй дæр хос кæны рынчынтæн».
Дзауы рынчындоны цæвиттоныл фидарæй зæгъæн ис, нæ республикæйы къухдариуæгад æппæт тыхтæй дæр кæй архайы цæрджыты цардуагон æмæ социалон уавæртæ фæхуыздæр кæныныл.
Уадз, фылдæр сын бантысæд ноджыдæр саразын адæмы фæрныгадæн.
Гуыцмæзты Е.
Comments are closed, but trackbacks and pingbacks are open.