Дæ цæст хæссыс, нывкæнынады аивадмæ нырма тынг дард чи лæууы, фæлæ йæ уд æмæ зæрдæйæ чи бауарзта, уыцы æвзонг курдиæтты куыстытæм æмæ дæ дисы дæр æппарынц æмæ цымыдисы дæр. Диссаг уымæй сты райдайгæ нывгæнджытæ, æмæ сын æрыгон уæвгæйæ, æнтысы бирæ, сæ зæрдæйы рæбын бынат ссардта аивады ацы хуызмæ æвзыгъддзинад. Цымыдисон та уымæй сты, æмæ кæстæртæй алкæмæн дæр йæ куыстмæ гæсгæ фидæны æнхъæлмæ кæсæн ис зæрдæрухсгæнæн фæстиуджытæм. Раст у, аивады тых ахæм у, æмæ йæм алчи йæхи не ‘ввахс кæны, кæд æм уыцы æвзыгъддзинад вæййы, уæддæр уыцы фæндагыл не ‘рлæууы.

Æввахсдæр базонгæ уæм, аивадуарзджытæ æрæджы æвдисæн кæмæн уыдысты, ахуыргæнинæгты уыцы зæрдæагайгæ куыстытимæ. Зындгонд куыд у, афтæмæй Цхинвалы районы Къостайыхъæуы астæуккаг скъолайы ног арæзт бæстыхаимæ иумæ уым йæ дуæрттæ бакодта нывгæнæн скъола-студи дæр. Уый нырма аивады зын фæндагыл кæд фыццаг къахдзæфтæ кæны, уæддæр бæрæг у, æнтыстджынæй кæй архайы, уый. Ивгъуыд аз студийы ахуырдзаутæй дыууæйæ хайад райстой, Сочæйы цы æхсæнадæмон конкурс уагъд цыд, уым æмæ сын уыд зæрдæрухсгæнæн æнтыстытæ. Ныр дæр та сæ фæхуыдтой уырдæм, кæцы уагъд цæудзæн фæстæдæр æмæ йæм сæхи цæттæ кæнынц зæрдиагæй. Æмæ канд конкурсты хайад исынмæ нæ вæййынц цæттæ, нывкæнынады аивад кæй уæнгты тæлфы, уыцы ахуырдзатæ. Куыд ивгъуыд аз, афтæ та æрæджы дæр сæ куыстыты иу хай рахастой рæгъмæ. Нывты равдыст уыд районы администрацийы бæстыхайы Фыдыбæстæ хъахъхъæнджыты боны цытæн, уымæ гæсгæ йæм фæхуыдтой кадетон скъолайы ахуыргæнинæгты дæр. Хайад ма дзы райстой администрацийы хайадты кусджытæ, скъолатæ æмæ культурæйы артдзæстты минæвæрттæ, ныййарджытæ æмæ скъола-студийы ахуыргæнинæгтæ сæхæдæг.

Зæгъын хъæуы, ацы студийы ахуырдзаутæ размæ ахæм уæндон къахдзæфтæ нæ кæниккой, æдзух сын сæ зонындзинæдтæ фылдæр кæныныл, сæ курдиæттæ райхалыныл сæ хъомылгæнджытæ куынæ архаиккой, уæд. Уыдон та сты Ирыстоны зынгæ нывгæнæг, студийы директор Гæбæраты Барис æмæ нывгæнæг Хуыбиаты Роберт. Уыдон кæддæриддæр сты сæ хъомылгæнджыты уæлхъус, рæдауæй сын амонынц нывгæ-нæджы зын, фæлæ рæсугъд фæндаджы райдиантæ æмæ сын æнтысгæ дæр уымæн кæны. Ахуыртæ сын вæййы къуыри цыппар хатты æмæ сæм ныртæккæ ис 12 ахуырдзауы. Кæй зæгъын æй хъæуы, сæйраг сæ нымæц нæу, фæлæ – æнтыстджын куыст. Хуыбиаты Роберты ныхæстæм гæсгæ сын ацы хъуыддаджы ис хорз фæстиуджытæ. – Рæстæджы цыдимæ сæ арæхстдзинад кæй хуыздæр кæны, уæндонæй кæй хизынц аивады къæпхæнтыл, сæйраг уый у – банысан кодта сæ ахуыргæнæг. Раппæлыны аккаг сты Джиоты Дианæ, Бæззаты Альмæ, Тараты Иренæ, Плиты Алан, Джергаты Георги æмæ æндæртæ. Равдыстмæ æрбацыдысты æмæ райдайгæ курдиæттæн арфæйы ныхæстæ загътой Ахуырады министр Гасситы Натали, районы адæмон ахуырады хайады сæргъ-лæууæг Лолоты Барис, нывгæнæг Æлборты Æхсæртæг, Къостайыхъæуы астæуккаг скъолайы ахуыры хайы гæс Мæргъиты Нелли æмæ æндæртæ.

Скъола-студийы ахуыргæнинæгтæ канд ныв кæнынмæ нæ арæхсынц, фæлæ ма æвзыгъд сты кафты аивадмæ дæр. Уыдон сæххæст кодтой цалдæр ирон кафты, æм-дзæвгæтæ та бакастысты Тараты Иренæ, Хуыбиаты Владик æмæ Саулохты Аннæ. Нывты равдысты иууыл цымыдисондæр куыстытæ уыдысты æмæ аивадуарзджытæ æхсызгонæн кастысты ахæм куыстытæм, куыд Лохты Сæрмæты «Хъаматимæ кафт», Джиоты Дианæ, Линæ, Бæззаты А., Хуыбиаты Маирбег, Джергаты Альбинæ æмæ æндæрты кон нывтæм «Хъæууон цард», «Зымæг хæхты», «Ног азы къæсæрыл», «Хъæууон кæрт», «Уасæг», «Хæхбæсты», «Аргъуан», «Фыййау» æмæ æндæртæ.

Кæронбæттæны равдыстмæ æрбацæуджытæн ноджыдæр арфæйы ныхæстæ ракодта районы администрацийы сæргълæууæг  Плиты Алан æмæ Кады грамотæ-тæй схорзæхджын кодта студийы ахуыргæнджытæ æмæ ахуыргæнинæгты .

Хуыбиаты Н.

Comments are closed, but trackbacks and pingbacks are open.