Нæ республикæйы рæзгæ фæлтæр профессионалон музыкалон ахуырад кæм райсынц, уый у Æлборты Феликсы номыл Цхинвалы музыкалон ахуыргæнæндон. Йæ къæсæрæй бирæ азты дæргъы рахизынц дзæвгар профессионалон музыканттæ.
Ивгъуыд къуырийы Æлборты Феликсы номыл музыкалон ахуыргæнæндоны ауагъд æрцыдис йæ ахуыргæнинæгты хыгъдон академион концерт. Хыгъдон концерт байгом ис Гендель Георг Фридрихы уацмыс «Дигнаре»-йæ, сæххæст æй кодта ахуыргæнæндоны музыкалон хор. Ацы уацмысæй уыдон ссардтой музыкалон ахуыргæнæндоны ахуыргæнæг РХИ-йы сгуыхт ахуыргæнæг Хъотайты Дарья Гаврилы чызджы рухс ном, кæцы фæкуыста бирæ азты ацы ахуыргæнæндоны æнæзæрдæхудтæй æмæ йæ зонындзинæдтæ рæдауæй лæвар кодта æвзонг фæлтæрæн. Музыкалон ахуыргæнæндоны хоры къухдариуæггæнæг у РХИ-йы сгуыхт ахуыргæнæг Хъуылымбегты Иринæ, концертмейстер – РХИ-йы сгуыхт ахуыргæнæг Тъехты Маринæ.
Концерты ма хайад райстой Гасситы Ацæмæз, Сланты Ацæмæз, Хуыгаты Олеся, Гæджиты Жаннæ, Куымæридтаты Тинæ, Кристина Гогинова, Дудайты Константин, Коцты Линдæ, Джиоты Дианæ, Биазырты Экатеринæ, музыкалон ахуыргæнæндоны националон инструментты оркестр æмæ ноджы бирæ æндæртæ. Уыдон се ‘ппæт дæр сæ музыкалон арæхстдзинадæй æхцондзинад хастой залмæ æрбацæуæг адæмæн æмæ дзы бирæтæн ды-гай хæттыты дæр сæххæст кæнын кодтой сæ музыкалон номыртæ.
Мадзалмæ ма хуынд æрцыдысты РХИ-йы Парламенты Сæрдары хæстæ æххæстгæнæг Мамиты Инал, Культурæйы министры хæстæ æххæстгæнæг Дзеранты Джульеттæ, æхсæнады минæвæрттæ.
Туаты Ларисæ
Comments are closed, but trackbacks and pingbacks are open.