Куыд ивгъуыд аз, афтæ та ныр дæр Республикæ Хуссар Ирыстоны Фæсивæды политикæ, спорт æмæ туризмы фæдыл комитеты хъæппæрисæй хуссарирыстойнаг рæзгæ фæлтæрæн организацигонд цæуы сæрдыгон этнолагерь комплексон программæ среализаци кæныны фæлгæтты, кæцы баст у Республикæ Хуссар Ирыстоны рæзгæ фæлтæры удварнон-хæрзæгъдауон хъомыладимæ. Этнолагеры сæйраг нысан у фæсивæдæн се ‘ргом нæ фыдæлты историон æмæ культурон бынтæм аздахын.
РХИ-йы Фæсивæды политикæ, спорт æмæ туризмы фæдыл комитет ныр та аскъуыддзаг кодтой, цæмæй этнолагерь байгом кæной Дзауы скъола-интернаты базæйыл æртæ боны æмгъуыдмæ. Ныртæккæ комитет кусынц, сæхи цæттæ кæнынц этнолагерь байгом кæнынмæ. Ныридæгæн сæм цæуы фæсивæдæй куырдиæттæ.
Этнолагерь цæй тыххæй арæзт цæуы æмæ фæсивæды раз цы хæстæ æвæрынц, уый тыххæй нын радзырдта комитеты сæрдары хæдивæг Гатыгкоты Валентинæ. Уый, фыццаджыдæр, банысан кодта, горæты фæсивæд сæ сæрдыгон рæстæг хъæлдзæг æмæ цымыдисонæй кæм арвитой, уый фадат сын кæй нæй æмæ ныр æртыккаг аз реализацигонд кæй цæуы этнолагеры проект. «Этнолагеры организатор у нæ комитет. У цымыдисон, фыццаджыдæр уымæй, æмæ дзы фæсивæды æргом фылдæбæрцæй кæй здахæм ирон адæмы истори æмæ культурæмæ, уый. Ацы проект фæуд кæны 2019 азы æмæ та фидæнмæ райсдзыстæм ног программæ, уый дæр, кæй зæгъын æй хъæуы, фæсивæды удварнон-хæрзæгъдауон хъомылады тыххæй. Фæсивæд хъуамæ зоной нæ фыдæлты рагистори, культурæ, традицитæ, географи, афтæ ма хи куыд дарын хъæуы, уыцы нормæтæ. Ахсджиаг хъуыддаг у, цæмæй схъомыл кæнæм хорз, активон æмбæстæгтæ, кæцытæ бахъахъхъæной æмæ райтынг кæной сæ радтæг адæмы традицитæ æмæ культурæ. Цæмæй æндæр адæмты æмæ культурæты æмрæнхъ цæуой размæ. Ивгъуыд аз этнолагерь бакодтам Хъеуселты æмæ йæ ацы аз та фæнд кæнæм бакæнын Дзауы скъола-интер-наты базæйыл 12 августæй 15 августмæ. Фæсивæдмæ æнхъæлмæ кæсы цымыдисон программæ. Фылдæр цæудзысты хæххон хъæутæм, ома, Дзауы районы рæсугъддæр æмæ фенддагдæр бынæттæм, куыд, зæгъæм, Ерман, Едыс, Эрцъо æмæ Къозы цадмæ æмæ афтæ дарддæр. Фæсивæдимæ экскурситæм цæудзысты комитеты туризмы хайады кусджы-тæ дæр. Уымæй дарддæр ма этнолагеры программæйы ис ирон националон хъæзтытæ, ирон хъазт, фат æмæ æрдынæй æхсын. Ацы аз Хуссар Ирыстоны Хетæгкаты Къостайы азæй кæй расидтысты, уый тыххæй фæнд кæнæм фæсивæдæн лекцитæ бакæсын ирон æвзаг æмæ литературæйы бындурæвæрæг Къостайы цард æмæ сфæлдыстады тыххæй. Программæйы ис спортивон хъæзтытæ дæр æмæ хиирхæфсæн музыкалон мадзæлттæ дæр. Этнолагеры хайад райсын сæ бон уыдзæнис, 14-18 азы онг кæуыл цæуы, ахæм кары фæсивæдæн. Мах цæттæ стæм 40-50 адæймагæй этнолагермæ куырдиæттæ райсынмæ. Нæ финансон уавæр нæ куы амонид, уæд фылдæр фæсивæд райсиккам нæ проектмæ», – банысан кодта Гатыгкоты Валентинæ.
Уый ма нын куыд радзырдта, афтæмæй Цæ-гат Ирыстоны та уагъд цæуы æрвылазон культурон-ахуырадон проект «Этнолагерь-2019» «Алайнаг фæд», цыран фараст бæстæйы ми-нæвæрттæ базонгæ уыдзысты сæ рагфы-дæлтæ – Аланты культурæ æмæ æвзагимæ. Мадзалы архайынц Ирланди, Турк, Сири, Герман, Гуырдзыстон æмæ Азербайджаны цæрæг ирæттæ. Уымæй дарддæр ма дзы хайад райсдзысты Свердловск æмæ Санкт-Петербурджы минæвæрттæ дæр. Се ‘хсæн сты нæ республикæйы фæсивæды минæвæрттæ дæр. Проекты нысан у, райгуырæн бæстæйæ дард чи цæрынц, уыцы æмфыдыбæстæйонты æрæмбырд кæнын æмæ сын фенын кæнын нæ адæмы культурæ, традицитæ, æгъдæуттæ. «Этнолагерь-2019»-ы мадзалы архайджытæн бацæттæ кодтой цымыдисон экскурситæ музейтæм æмæ республикæйы рæсугъддæр бынæттæм. Сæ программæйы ис Хуссар Ирыстонмæ абалц кæнын дæр. Гатыгкоты Валентинæ нын куыд загъта, афтæмæй уыдон хъуамæ 7 августы фæуазæг уой Цхинвалмæ æртæ боны æмгъуыдмæ. Се ‘рцыдмæ сын цæттæ кæнынц программæ дæр. «Мах сын бацæттæ кæндзыстæм программæ. Нæ фæнды ис уыдон Знауыры районмæ экскурсийы акæнын, уымæн æмæ дзы бирæ ис историон бынæттæ æмæ цыртдзæвæнтæ. Хайад райсдзысты ав-густы фыдохы мадзæлтты дæр», – загъта Гатыгкоты чызг.
ЦХУЫРБАТЫ Ларисæ
Comments are closed, but trackbacks and pingbacks are open.