Æхсæнадæмон Проект «Аланты фæд»-ы хайадисджытæ – Хуссар Ирыстоны

Хуссар Ирыстонмæ æрцыдысты æхсæнадæмон проект «Этнолагерь – 2018. Аланты фæд»-ы хайадисджытæ. Дзауы районы администрацийы æмæ фæсивæдон организаци «Иууон Алани»-йы минæвæрттæ уазджытыл фембæлдысты традицион æртæ уæливых æмæ ирон бæгæныйы цыты нуазæнимæ Ручъы хъæуы. Этнолагеры хайадисджытæн сæххæст кодтой ирон национ зарджытæ.

Национ ахастыты фарстаты фæдыл Республикæ Цæгат Ирыстон –  Аланийы министрады минæвар Хъерчелаты Илинæ банысан кодта, зæгъгæ, проект реализаци цæуы ныр цыппæрæм хатт.

«Проекты нысан у, Райгуырæн бæстæйæ дард чи цæрынц, уыцы æмфыдыбæстæйонты æрæмбырд кæнын æмæ сын фенын кæнын нæ адæмы культурæ, традицитæ, æгъдæуттæ, – загъта Хъерчелаты Илинæ.  гæнæнуæвгæйæ сын амонæм ирон æвзаг æмæ национ кæфтытæ».

Йæ ныхæстæм гæсгæ проекты хайадисджытæй активондæр сты, Туркæй чи æрцыд, уыцы ирæттæ.

«Мадзæлттæ куы фæвæййынц, уæддæр алы бæстæтæй нæ проекты хайадисджытæн немæ вæййы бастдзинад», – банысан кодта уый.

Цæгат Ирыстоны национ ахастыты министрады минæвар ма йæ ныхасмæ бафтыдта, зæгъгæ, ацы аз проект реализаци цæудзæн дыууæ этапæй. Иннæ хатт та, зæгъгæ, Хуссар Ирыстонмæ æрцæуын фæнд кæнæм 5 августы.

Хуссар Ирыстоны тыххæй сæ тæлмæнтæ ра-дзырдтой Пермæй æрцæуæг ирæттæ, хо æмæ æфсымæр Тайсауты Дианæ æмæ Давид.

«Мах Хуссар Ирыстоны стæм фыццаг хатт, тынг мæ зæрдæмæ фæцыдысты, хъармæй нæ кæй райстой, афтæ рæсугъд хæхтæ, диссаджы æрдз», – загъта Дианæ.

Давид дæр банысан кодта, этнолагеры хайадисджытæ сæ адæмы истори æмæ культурæимæ кæй зонгæ кæнынц, уый ахсджиагдзинад.

Проект «Аланты фæд»-ы хайадисæг Туркæй Цориты Шеваль дæр банысан кодта, зæгъгæ, ирæттæ сты уазæгуарзон адæм. Турчы ирæттæ дæр, зæгъгæ, ахæм уазæгуарзон æмæ хæларзæрдæ сты.

Уый куыд радзырдта, афтæмæй йæ мадæлон æвзаг зоны йæ ныййарджыты фæрцы, уыдон йемæ дзурынц иронау.

Проекты иннæ туркаг хайадисæг Шыбыткоаты Джан банысан кодта, зæгъгæ, йын æхсызгон у проект «Аланты фæд»-ы хайад исын, уымæн æмæ уый руаджы уымæн фадат фæзынд йæ фыдæлты зæххыл уæвынæн.

«Мах райгонд стæм, нæ адæмы культурæ æмæ традицитимæ базонгæ уæвынæн нын фадат кæй ис, уый тыххæй», – банысан кодта уый.

Турчы ирæтты диаспорæйы ноджы иу минæвар Албегаты Ильяс радзырдта, зæгъгæ, Стамбулы бирæ фæсивæд ис, кæцытæ ахуыр кæнынц сæ мадæлон æвзаг æмæ æппæт дæр аразынц йæ бахъахъхъæныны тыххæй. Проект «Этнолагерь – 2018. Аланты фæд»-ы фæлгæтты Хуссар Ирыстонмæ æрцыдысты Казахстан, Турк, Свердловск æмæ Уæрæсейы Федерацийы Пермы областæй ирон диаспорæты минæвæрттæ 20 бæрц.