2-8 февралмæ Хуссар Ирыстоны фæсивæдон æхсæнадон организаци «Ног фæлтæр» уадзы фæсивæдон активы республикон ахуыртæ Фиагдоны центр «Барс»-ы базæйы. Уый тыххæй фехъусын кодта организацийы минæвар Хъуылымбегты Алыксандр.

Йæ ныхæстæм гæсгæ, ацы ахуыртæн сæ нысан у, фæсивæдон актив æрбиноныг кæнын, уый фæстæ Ирыстоны хуссар æмæ цæгат хайы социалон-экономикион фарстытæ скъуыддзаг кæныны сæраппонд.

«Барс»-мæ æрæмбырд сты 40 хайадисæджы — уыдон æхсæн — ХИПУ-йы студенттæ, республикæйы активон фæсивæд æмæ æнæуый цымыдисгæнæг æрыгон лæппутæ æмæ чызджытæ. Цыбыр æмгъуыдмæ ахуырты хайадисджытæ рацæудзысты цалдæр дисциплинæйы: командæаразынад, социалон проект кæнын, адæмы раз раныхас кæнынмæ арæхст, социалон хызæджы кусын, документты æрзылд æмæ а.д.» — радзырдта Алыксандр.

Хъуылымбеджы фырты ныхæстæм гæсгæ, ацы ахуырты сæйраг миниуæг у уый, æмæ программæ æгасæйдæр кæй у индивидуалон, арæзт у сæрмагондæй ацы проектæн. Уый ма йæ ныхасмæ бафтыдта, зæгъгæ, цæмæй рацæугæ æрмæг хуыздæр зæрдыл бадардæуа, уый тыххæй лекцитæм байхъусыны хæдфæстæ та уагъдæуыдзæн практикон хай.

«Цæмæй ахуыртæ ноджы ахадгæдæр уой, уый тыххæй хуынд æрцыдысты специалисттæ Нижний Новгородæй. Теоретикон лекцитæ æмæ практикон хæслæвæрдтæ кæрæдзи ивдзысты. Ацы методикæ дæтты æрмæг хуыздæр бамбарыны фадат. Фæсивæдæн лæвæрдæуы вазыгджын, фæлæ цымыдисон хæслæвæрдтæ, командæарæзтады, проекттæ фыссын, менталон хъæзтытæ аразын, адæмы раз раныхæстæ цæттæ кæнын æмæ бирæ æндæр хъæзтытæ.

Хъуылымбегты Алыксандр куыд загъта, афтæмæй скъола фæуыны фæстæ йæ организатортæ хъавынц активистты æнæхъæн командæ скæнынмæ, социалон-нысаниуæгджын проектæ æххæст кæнын, æмæ республикæйы æхсæнадон царды рæзты фæдыл мадзæлттæ уадзыны сæраппонд.

Хъуылымбегты Алыксандр ма йæ ныхæстæм бафтыдта, зæгъгæ, Цхинвалмæ æрцæуыны фæстæ фæсивæдон организаци фембæлдзæн бæстæйы сæргълæууæг Тыбылты Леонидимæ. «Куыддæр æрыздæхæм фæстæмæ, афтæ нын уыдзæн фембæлд Тыбылты Леонидимæ, æмæ йын равдисдзыстæм нæ проекттæ», — загъта уый кæронбæттæны.

Банысан кæнын хъæуы уый, æмæ ацы проект кæй æххæст цæуы Республикæ Хуссар Ирыстоны Президент Тыбылты Леониды æххуысы руаджы.

Comments are closed, but trackbacks and pingbacks are open.