Хуссар Ирыстоны Æхсæнадон палатæ арæзт æрцыд 2009 азы.  2019 азы йæ сырæзтыл æххæст кæны дæс азы. Фæлæ уый нырма не ссис, цахæм хъуамæ уа, ахæм эффективон инструмент, баззад бирæнымæц организацитæй сæ иуæй. Цæмæннæ йæ нымадтой чиновниктæ уыцы азты?

Юбилейы тыххæй нырма дзурæн дæр нæй, йе ‘нтыстытæ æмæ къуыхцытыл дæр нырма нæ хъæуы дзурын, уымæн æмæ РХИ-йы Æхсæнадон палатæ йæ къæхтыл лæууын ныр райдыдта. Фæлæ йын бæрæг тæссаг къуыхцытæ дæр нæ уыд. Уыдон нæ къæмдзæстыг кæнынц, нæ сарæзтой æвзæрдзинæдтæ. Æхсæнадон палатæмæ ироникон ахаст фесæфдзæн, цымыдис кæнын райдайдзысты йæ архайдмæ.

Бибылты Анатолийы Президентæй сæвзаргæйæ, уый фæнд кæны æхсæнадыл æнцой кæнын æмæ адæмы инициативæмæ гæсгæ арæзт организацитыл, кæцытæн сæ бон суыдзæн хицауад æмæ æмбæстæгты ‘хсæн коммуникацитæн æххуыс кæнын. Хуссарирыстойнаг лидер тынг цымыдис кæны демократон æхсæнады институтты реалон уæвынадмæ. Йæ къухдариуæгады рæстæджы Æхсæнадон палатæ хъуамæ суа, чысыл адæймаджы проблемæтæ йæхимæ æввахс чи исдзæнис,  ахæм эффективон организаци. Уымæн æмæ уый у ахæм орган, кæцы иу кæны æхсæнадон куыст кæныны фадæттæ, æхсæнадон тыхты руаджы къухдариуæггæнджыты органтыл контроль кæнын æмæ адæмы проблемæтæ хицауадмæ хæссын.

Æхсæнадон палатæйыл æвæрд ис бæрнон мисси. Рæн-хъон æмбæстæгты чи тыхсын кæны, уыцы карз фарстытæ аскъуыддзаг кæныны тыххæй Республикæ Хуссар Ирыстоны æмбæстæгты интерестæ, æхсæнадон баиугæндтæ æмæ паддзахадон хицауиуæгады органты æмных кæнын. Æмбæстæгты бартæ æмæ сæрибардзинæдтæ бахъахъхъæнын, æмбæстагон æхсæнады демократон принципты рæзт — æппæт уыдæттæ хуымæтæджы хæслæвæрдтæ не сты, уыдон лæууынц не ‘хсæнады боны фæткы.

Æхсæнадон палатæ ацы актуалон фарстытæ куыд скъуыддзаг кæны, уый тыххæй информацион агентад «Хуссар Ирыстон — абон»-æн радзырдта РХИ-йы Æхсæнадон палатæйы сæрдар Дзиццойты Анатоли.

«Æхсæнадон палатæйы архайд дырысæй фыст ис закъоны. Мах кусæм, алыгъуызон фарстытимæ нæм æмбæстæгтæй чи æрбацæуынц, уыцы куырдиæттимæ. Уыдон гæнæн ис æмæ уой хисæрмагонд характеры, æхсæнадон царды, социалон-экономикон, цæрæнуатон фарстытæ. Рæстæгæй рæстæгмæ мах æрæмбырд вæййæм æмæ æруынаффæ кæнæм æмбæстæгты куырдиæттыл. Афтæ нæ зæгъдзынæн, æппæт фарстыты фæдыл дæр кæй æрцæуæм консенсусмæ, фæлæ фыстæджыты арвитæм æмбæлон организацитæм. Уæддæр, фылдæр хатт дзуапп нæ райсæм», — радзырдта Дзиццойты Анатоли.

Абоны бон тынг зын у Æхсæнадон куыстмæ хъус дарын, уымæн æмæ палатæмæ чиновникты ‘рдыгæй уазал ахастмæ гæсгæ йæ бон нæу априори радтын. Дзуаппытæ нæй, проблемæтæ скъуыддзаг нæ цæуынц.

Цы аххосагмæ гæсгæ уын нæ радтынц дзуапп,  зæгъгæ, ацы фарстæн йæ къух ауагъта Дзиццойты Анатоли.

Уæ зæрдыл уын лæууын кæнæм, Æхсæнадон палатæмæ фарст барвитыны рæстæджы Республикæ Хуссар Ирыстоны Парламент, РХИ-йы Хицауад æмæ хицауиуæгады бынæттон органтæ хæсджын кæй сты, Æхсæнадон палатæйы цы хъæуы, æппæт уыцы информаци радтыны тыххæй. Фæлæ афтæ нæу, фарстытæн дзуапп цæй тыххæй нæ радтынц, уымæн дæр дзуапп нæй.

Уыимæ, Хуссар Ирыстоны Æхсæнадон палатæйæн ис фаг гæнæнтæ цæуæг процесстыл бандавынæн, уымæн æмæ уыдон фидар æрцыдысты закъондæттынадмæ гæсгæ, фæлæ дзуапдæтджыты ничи фæрсы. Уымæ гæсгæ уайы афтæ, æмæ ацы структурæйы архайд зайы аууоны.

Цъæхилты Аланæ

Comments are closed, but trackbacks and pingbacks are open.