Хъæууон цæрджыты цардуагон уавæртæ фæхуыздæр кæныныл хорз кусы Цхинвалы районы администрацийы разамынд. Ацы хъуыддаг хæсгонд у районы Паддзахадон унитарон куыстуаты цæрæнуатон-коммуналон хæдзарадæн æмæ, йæ фадæттæ æмæ уавæртæм гæсгæ, архайы цæрджыты домæнтæ æххæст кæныныл. Куыстуаты хистæр Хъотайты Барис куыд радзырдта, афтæмæй йæ дæлбаруæвæг кусджытæ архайынц, цæмæй хуыздæр æмæ рогдæр кæной хъæууон цæрджыты цардуагон уавæртæ æмæ сын уый цасдæрбæрцæй æнтысгæ дæр кæны. Ныртæккæ сæ техникæ кусы Уанаты хъæуæй Джермæ фæндаг аразыныл, абоны онг уал дзы бакуыстой дыууæ къуырийы бæрц. Фæндаг кæронмæ арæзт фæуынæн ма рæстæг бахъæудзæн иу къуыри æмæ уæд æххæстæй дзуапп дæтдзæн цæрджыты домæнтæн, фенцондæр уыдзæн, ауылты чи цæуа, уыцы автомашинæты хицæуттæн дæр. Уымæй дарддæр ма Джеры дзуары онг фæндаг сыгъдæг æрцæудзæн, æвæрд дзы æрцæудзæн доны хæтæлтæ дæр. Ацы фæндагæн æдæппæт йæ дæрддзæг у 12 километры бæрц. Фæндаг цалцæггæнæн куыстытæ бакæндзысты Ортъеуы хъæуы, афтæ ма ахæм куыстытæ æххæст кæнынц Чирцъинайы хъæуы дæр. Раст у, нырма сын кæронмæ арæзт нæ фæци, хатт сæ техникæ кæй фехæлы, уый аххосæй. Тыхджын къæвдаты фæстиуæгæн тынг разиан кодта, ам цы хид арæзт уыд, уымæн æмæ уый фæстиуæгæн бæлццæттæ æвзарынц зындзинæдтæ. Цæрджыты рæстагон домæн хъуамæ æххæст æрцæуа æмæ кусджытæ хид аразынмæ бавналдзысты рæх-джы.
Арцеуы хъæуы цæрджытæ рагæй тыхсынц, нуазыны донæй хъуагдзинад кæй æййафынц, уый аххосæй. Цæрджыты рæстагон домæн бахынцыдта районы разамынд æмæ тагъд рæстæджы сæххæст уыдзæн сæ бæллиц. Хъæуы сæрмæ ссардæуыд доны гуырæн, цæуы стыр бæрцæй æмæ фаг кæндзæн хъæубæстæн. Ныртæккæ уал кусджытæ зæххы хуылфы нывæрдтой доны хæтæлтæ, хъæумæ хæстæг сæвæрдзысты, 50 тоннæ йæ бæрцуат кæмæн уыдзæн, ахæм бак æмæ уырдыгæй та хицæн сыхтæм хæццæ кæндзæн дон. Арцеуы хъæуы ма хъуамæ схæрзарæзт кæной уынгтæ дæр. Фæндаг цалцæггæнæн куыстытæ ма хæдзарад хъуамæ бакæна Бихъары хъæуы ‘рдæм дæр. Хуыр калд æрцæудзæн, фæндæгтæ кæм ныдздзыхъхъытæ сты, уы-цы бынæтты Хелцуайы хъæуæй суанг Арцеу æмæ Громы онг.
Сатихъары хъæууон администрацийы фæсивæд тынг тыхстысты, сæ сæрибар рæстæг кæм арвыстаиккой, ахæм спортивон фæзуæттæй цух кæй уыдысты, уый аххосæй. Ацы цухдзинæдты иувæрсты дæр нæ ахызт куыстуат æмæ сын аразынц стадион. Цæмæй знаггадæй хызт уа, уый тыххæй йæ алфамбылай уыдзæн æмбонд. Уым уыдзæн канд футболон фæзуат нæ, фæлæ ма волейболон фæзуат дæр. Ахæм куыст аразджытæ бакодтой хъæууон администрацийы территорийы дæр. Мидæгæй та сцалцæг кодтой дыууæ хатæны, уыдзæн дзы хорз спортивон зал. Цæмæй фæсивæд сæхи фæлтæрой, ахæм спортивон инвентарь самал кæнынæй та сын æххуыс кæны Президент Тыбылты Леонид. Гудзабары хъæуы та арæзтæуы, нæ чысыл хуртæ сæхи кæм ифхæрсой, ахæм фæзуат. Уыдзæн дзы хъеллаугæнæнтæ, бырæнтæ, асинтæ æмæ æндæр ахæмтæ. Уыдон дæр бынаты сæмбæлдзысты нæ республи-кæйы разамонæджы фæрцы.
Къостайыхъæуы уынгтæ цалцæг кæнынмæ дæр бавналдзысты ацы аз, куыддæр техникæ иннæ хъæуты куыстытæ ахицæн кæна, афтæ. Хъæууон администрацимæ цы хъæутæ хауы, уыдонæй Ход, Тыбылтæ æмæ Кърозы хъæутæм фæндаг ис бынтон мæгуырау уавæры, уый тыххæй цæрджытæ тынг тыхсынц. Кæй зæгъын æй хъæуы, уыдон домæн дæр хъуамæ сæххæст уа ацы аз æмæ цæрджытæн фенцондæр уыдзæн сæ уавæр. Донхæры дон Тъбеты хъæуы цур калдис фæндагыл æмæ уый аххосæй æрцыд мæгуырау уавæрмæ. Цæрджыты домæн ам дæр скъуыддзаг æрцæудзæн. ПУК «Мелиораци»-йы къухдариуæгадимæ баныхас кодтой æмæ йæ сараздзысты иумиаг тыхтæй. Ном-хуындæй та уыдон хъуамæ къанау асыгъдæг кæной змис æмæ æндæр быронæй, куыстуаты коллектив та фæндаг схæрзарæзт кæныныл бакусдзæн. Уазал боныгъæдты æмбæлон хъармдзинадæй цух уыдысты Хелцуайы хъæууон клуб, Дампъалет æмæ Арцеуы скъолатæ. Ацы цухдзинад дæр бахынцыдæуыд æмæ уыцы бынæтты арæзт æрцыд æмæ цæуы централон хъармгæнæн системæтæ. Хъотайы фырт йæ ныхасы кæрон банысан кодта, зæгъгæ, нæ разы ис бирæ скъуыддзаггæнинаг хæстæ æмæ сæ æх-хæст кæныныл архайдзыстæм, нæ фадæттæ æмæ нæ нæ уавæртæ куыд амоной, афтæ.
Хуыбиаты Никъала
Comments are closed, but trackbacks and pingbacks are open.