Афоныл фидæм фиддонтæ

Цæрджытæ газ æмæ рухсы фиддонтæ куыд æмбæлы, афтæ кæй нæ фидынц, ууыл. Республикæйы электроэнерги æмæ газифтонгады службæтæ цæрджытæн бæргæ бамбарын кæнынц фиддонтæ афоныл куынæ фидой, уæд хицæн кæй æрцæудзысты ацы лæггæдтæ, фæлæ, хъыгагæн, бирæтæ сæ ницæмæ дарынц.
«Абонент, кæцытæн газæй пайдагæнгæйæ сæ фиддонтæ систы 5 мин сомæй фылдæр хицæн æрцæудзысты газы хаххæй», — зæгъы газы службæйы директоры хæдивæг Тадтаты Филипп.
Фæлæ уый æнæнхъæлæджы ма хъуамæ уа абонентæн, уымæн æмæ цалынмæ ацы службæйы кусджытæ газ нæ ахицæн кæнынц, уæдмæ контролер бафæдзæхсы бинонты сæ фиддонтæ æгæр кæй сбирæ сты. Уый фæстæ сæм бацæуы официалонæй гæххæтт дæр. Дæс бон куы рацæуы уыцы хъусынгæнинагæй, уæд газы службæйы кусджытæн бар ис абонентæн æрдзон газ ахицæн кæнын.

Хъыгагæн, абонентæн æрмæстдæр сæ газ æмæ рухс куы æрцæуынц хицæн, уæд райдайынц агурын мадзæлттæ, цæмæй бафидой сæ фиддонтæ. Иууыл хъыгаг та у, ацы службæйы кусджытæ иу кæнæ иннæ абонентæн сæ куы ахицæн кæнынц, уæд сæм лæбурдтытæ æмæ æртхъирæнтæ кæй фæкæнынц. Уымæ гæсгæ уыдон газы коммуникацитæй хицæн кæныны сæр куы бахъæуы, уæд семæ акæнынц барадхъахъ-хъæнæг органты кусджыты, цæмæй уыдон фæрцы конфликт иуварс æрцæуа.
Газы службæйы кусджытæ куыд зæгъынц, афтæмæй “æрвылбон дæр мах бахъæуы дыууæ-æртæ дебиторы ахицæн кæнын. Хуыздæр уаид æмæ цæрджытæ цалынмæ хицæн не ’рцæуынц æрдзон газæй, уæдмæ фидой сæ фиддонтæ. Науæд уый фæстæ инструкци куыд амоны, уымæ гæсгæ ногæй коммуникацитæм куы иу кæной абоненты, уæд хъуамæ бафида уæлæмхас 1280 сомы.
Газы службæйы диреторы хæдивæг Тадтаты Филипп та загъта «Абоны бон нæ горæты газы фиддонтæ афоныл чи нæ фиды, уыдон нымæц у егъау. Тагъд рæстæджы тæрхондонмæ лæвæрд æрцæудзæнис 180 дебиторы тыххæй хъаст. Иумæйаг сисгæйæ ахæм абонентты нымæц нæ республикæйы хизы 940 адæймагмæ. Уыдон иууыл иумæ хицауадæй дарынц 9 милуан 712 мин сомы.
Уæлдæр куыд загътам, афтæмæй ахæм æнгæс тенденци ис энергетикæйы фадыджы дæр. Энергохызæджы системæ-йæ та хицæн цæуынц ахæм абоненттæ, кæцытæн сæ фиддонтæ схызтысты 2 мин соммæ. Уыдон ныхмæ дæр ист цæуы æнгæс мадзæлттæ. Уыдон ны-мæц дæр у 1600 абоненты бæрц. Электроэнергийы хæрдзтæ сын иууыл иумæ сты 7 милуан сомы. Паддзахадон унитарон куыстуат «Энергоресурс»-ы хистæр Гæбæраты Анатоли куыд зæгъы, афтæмæй боны мидæг электроэнергийы хызæгæй хицæн æрцæуынц 50 абоненты бæрц. Фæстæмæ электрохызæгмæ баиу кæныны лæггæдты аргъ у 300 сомы. Ацы куыстуат дæр тæрхондонмæ арвыста 300 куырдиаты.
«Энергоресурс»-ы куыстуатыл негативонæй æндавынц, нæ цæрджытæ фиддонтæ кæй нæ фидынц афоныл, уыцы хъуыддаг. Хъуамæ ма рох кæнæм, цалдæр азы размæ дæр ма ацы лæггæдтæй цух куы уыдыстæм, уæд цы зындзинæдтæ æвзæрстам. Æрæджы нæ Президент Мæскуыйы уæвгæйæ, уæлдæр æмвæзадыл фембæлдтыты рæстæджы ахсджиаг фарстатыл ныхас кодта «Газпром»-ы Генералон директор Алексей Миллеримæ. Президент бахатыд Уæрæсейы хица-уадмæ, цæмæй Ирыстоны районтæ дæр газификаци æрцæ-уой. Тыбылты Леонид æмæ Алексей Миллер сæрмагондæй дзырдтой акционерон æхсæнад «Газпром» уымæй размæ газификацийы программæ среализаци кæныны тыххæй æгас Хуссар Ирыстоны регионты цы бадзырд сарæзтой, ууыл. Ам финансон фарстатæ йæхимæ хъуамæ айстаид «Газпром». Президент йæ кусæгон балцæй райгондæй æрцыд æмæ стыр æхсызгонæй фехъусын кодта ацы фадыджы йæ къухы æнтыстытæ кæй бафтыд. Уый фæстиуæгæн æввахсдæр рæстæджы махмæ æрцыдысты Уæрæсейы «Газпром»-ы минæвæрттæ, цæмæй республикæйы газотранспортон инфраструктурæ сахуыр кæной. Кæй зæгъын æй хъæуы, ацы фарст скъуыддзаг куы æрцæуа, уæд уый ахъаз уыдзæн хъæууонхæдзарад æмæ экономикæйы рæзтæн.
Ныртæккæ Уæрæсейы Федерацийы къухдариуæгад, æмæ хицæнæй сисгæйæ та «Газпром» нæ республикæмæ цы ахаст дары, уымæн æнæгуырысхойæ хъæуы аргъ кæнын. Ивгъуыд азты та ацы здæхты нæ къухы бафтыд æгас Хуссар Ирыстонæн газификацийы генералон план саразын. 2013-14 азтæн Инвестпрограммæйы газификацийæн рахицæн æрцыд 90 милуан сомы. Фæлæ Æхсæн-хицауадон къамисы рабадты ацы æхцайы фæрæзтæ аздæхтой фыццаградон социалон проекттæм, сæрмагондæй та, æндидзыгæнæн куыстытæ æххæст кæнынмæ. Æмæ та мæнæ ног æнтыст! Уадз, алчидæр бæрндзинад æнкъара æмæ зона фиддонтæн æнæфидгæ кæй нæй.
УАЗÆГТЫ М.