«Аландон» йæ ассортимент баххæст кæндзæн лимонадæй

Бынæттон компани «Алтей» тагъд Згъуыбиры суары донæй уадзын райдайдзæн лимонад. Компанийы сæргълæууæг Босыкты Владимир куыд зæгъы, афтæмæй бынæттон магазинты фæзындзæн лимонады дыууæ хуыз – «Аландон-Тархун» æмæ «Аландон-Груша». Ацы суаруадзæн завод Хуссар Ирыстоны фæзынд авд азы размæ. Ныртæккæ дæр уадзы минералон дон «Аландон», кæцы ист цæуы Згъуыбирмæ хæстæг суадонæй. «Нæ куыстуат ныртæккæ ис нæ горæты БАМ-ы районы. Заводмæ дон ласæм Згъуыбирæй. Бынаты йæм бафтауæм газ æмæ йæ стæй 1,5 литруат пластикон мигæнæнты уадзæм. Уæй йæ кæнæм заводæн йæхицæй дæр æмæ нын цы магазинтимæ ис бадзырд арæзт, уыдоны дæр. Бадзырдтæ арæзт нын ис УФ-йы бирæ горæттимæ дæр. Донæн йæ хосгæнæн æууæлтæ зындгонд сты Мæскуыйы, Санкт-Петербурджы æмæ ма Сомихстоны дæр. Пятигорскы курортологийы зонад-иртасæн институт цы хатдзæгтæ сарæзта Згъуыбиры донæн, уымæ гæсгæ йе ууæлтæй æввахс у «Кисловодск»-ы донмæ», – зæгъы амалиуæггæнæг.

Босыкты Владимир ма куыд зæгъы, афтæмæй дон цæуы Кавказы хохрагъæй Згъуыбирмæ. Никæцы дон æм схæццæ вæййы. Пятигорскы курортологийы зонад-иртасæн институты специалисттæ ма ноджыдæр сарæзтой ахæм хатдзæг, зæгъгæ, ацы дон ахъаз у артроз, диабет æмæ цармы низтæн. Лимонадуадзæн сæрмагонд ифтонгæдтæ ныридæгæн заводы территорийыл сты. Уыдон монтажгонд æрцæудзысты æмæ уæд 0,5 литруат авгæй мигæнæнты сахаты мидæг уагъд цæудзæн 1500 иуæджы. Лимонад рауадзыны хъуыды заводы къухдариуæгадмæ рагæй уыд, фæлæ цы инфекцион низ апарахат, уый аххосæй фæкъуылымпы сты. Уæрæсе æмæ ма Сомихстонимæ цы бадзырдтæ сарæзтой пандемийы агъоммæ, уыдон сæ тыхы баззадысты, куыддæр завод лимонад уадзын райдайа, афтæ продукци экспорт цæудзæн уырдæм дæр.

Амалиуæггæнæг ма нын куыд загъта, афтæмæй фæстаг цалдæр къуыри урæд æрцыд «Аландон»-ы рауагъд дæр. Уымæн æмæ заводы иуæй-иу агрегаттæ фехæлдысты. Уæрæсейæ хуынд æрцыд специалист, кæцы ныртæккæ архайы се сцалцæг кæныныл æмæ тагъд минералон дон «Аландон» уагъд цæудзæн æппæт хъомысадæй. «Цы ног агрегат æлхæд æрцыд, уый фæрцы ныр завод сахаты мидæг уадздзæн 3000 пластикон 1,5 литруат авджы. Уымæ гæсгæ мах архайæм бадзырдтæ аразын Беларуси, Казахстан æмæ Киргизиимæ дæр. Уый тыххæй нæ къухы ис сертификаттæ, кæцытæ бар дæттынц ахæм бадзырдтæ аразынæн. Ныртæккæ заводы ис 10 кусæджы. Лимонад уадзын куы райдайæм, уæд ма кусынмæ райсдзыстæм æхсæз адæймаджы», – зæгъы фирмæ «Алтей»-ы генералон директор.

Босыкты Владимир ма радзырдта, дыууæ азы размæ Згъуыбиры доны бындурыл цы хосгæнæндон сарæзта, уый тыххæй дæр. Бæстыхай кæд стыр нæу, уæддæр уыцы иу рæстæг сæ бон у хос кæнынмæ ардæм æрбацæуой 8-9 пациенты. Ардæм улæфынмæ æрбацæуджыты хæрзиуæгæн арæзт æрцыд цыппарстъалыйон уазæгдоны уавæртæ. Улæфынмæ æрбацæуынц бынæттон цæрджытæ, фæлæ интернет тыгъдады хосгæнæндонæн арæзт цы видеоролик æрцыд, уый бирæты зæрдæмæ фæцыд. Интернеты руаджы бирæтæ развæлгъау æрцахстой бынæттæ, уыцы нымæцы Донецкы Адæмон Республикæйæ дæр. Фæлæ COVID-19 аххосæй фæндæгтæ æхгæд кæй уыдысты, уый тыххæй сын нæ бантыст æрцæуын. Бынæттон адæмæй сæм чи баулæфы, уыдон фæстæмæ райгондæй раздæхынц. Згъуыбиры доны хосгæнæн æууæлтæ банкъарынц, баулæфынц æрдзы æмæ ваннæтæ райсынц. Уый ма зæгъы, зæгъгæ, бирæты фæнды баулæфын зымæджы бонты дæр. Уымæ гæсгæ, зæгъгæ, фæнд кæнæм хосгæнæндоны территори фæуæрæхдæр кæнын, тезгъогæнæн бынæттæ дзы фылдæр саразын. «Куыддæр нæ уавæртæ чысыл фæхуыздæр уой, афтæ сараздзыстæм къахдзоныгътыл бырæн фæз. Нæ зæрды ис бæхтæ самал кæнын дæр, цæмæй ам чи хос кæна, уыдон Урс Туалгоммæ экскурсийы цæуой. Стæй ма цæмæй махмæ сывæллæттæ дæр цæуа, уый тыххæй та хъуамæ саразæм алыгъуызон хъазæн фæзтæ. Сæ зæрды ис ам фермерон хæдзарад æрбакæнын дæр, цæмæй, санаторийы цы пациенттæ улæфой, уыдон хæрой экологион сыгъдæг урсаджы продукттæ. Хосгæнæндон, амалиуæггæнæджы ныхæстæм гæсгæ ис денджызы æмвæзадæй 1551 метры бæрзæндæн. Ацы бынæттæн физикохимикон анализ куы скодтой курортологийы специалисттæ, уæд æрцыдысты ахæм хъуыдымæ, зæгъгæ, доны оптималон уавæр дзуапп дæтты бæрзонд æмвæзадæн хоскæнынæн. Суары цы микроэлементтæ ис, уыдон æнæмæнгхъæуæг сты адæймаджы организмæн. Сертификаты дæр афтæ амындгонд у.

Уыцы хатдзæг фидар æрцыд Мæскуыйы дæр. 2018 азы минералон дон «Аландон» Ныгуылæн Европæйы æрвылазон армукъа «Продэкспо»-йы куы презентаци кодта, уæд Хуссар Ирыстоны суар нымад æрцыд иууыл хуыздæрыл æмæ йæ схорзæхджын кодтой сыгъзæрин майданæй», – зæгъы Босыкты Владимир.

Хосгæнæндон æмæ суаруадзæн заводы проект дæр реализаци æрцыдысты амалиуæггæнæгæн йæхи фæрæзтæй æмæ ма паддзахадæй цы хатырон фæрæзтæ райста, уыдонæй.

УАЗÆГТЫ Марфа