Тагъд бынæттон магазинты тæрхджытыл ногæй фæзындзæн минералон дон «Аландон».

«Аландон» хорз зындгонд у бынæттон адæмæн. Раздæр ацы минералон дон уагъд цыд Згъуыбиры. 2018 азы уæрæсейаг равдыст «Продэкспро»-йы нымад æрцыд хуыздæр продуктыл æмæ райста сызгъæрин майдан. Уæрæсейаг курортологийы зонад-иртасæн институты иртастытæм гæсгæ Згъуыбиры суар, кæцыйæ арæзт цыд «Аландон», ахъаз у бирæ низтæ хос кæнынæн. «Дæргъвæтин рæстæджы фæстæ ацы къуыри нæ компани «Атей» сног кæндзæнис минералон доны рауагъдад. Фæстæмæ нæ дон цæудзæнис «Аландон»-ы маркæйы бын. Ныр та нæ завод уыдзæн горæты БАМ-ы районы. Раздæр ам уыд завод «Родник Осетии», кæцы уагъта «Осетинская» маркæйы минералон дон», – зæгъы «Аландон»-ы уадзæг, амалиуæггæнæг Босыкты Владимир.

Цалдæр азы размæ, инновацион технологиты фæрцы нæ республикæмæ хуынд æрцыд реалон сектор райтынг кæныны нысанæн инвестор Владимиры областæй. Уый, нæ горæты БАМ-ы районы байгом кодта суаруадзæн завод «Родник Осетии». «Осетинская», зæгъгæ, ахæм маркæйы бын уагъд цыд минералон дон пластикон 1,5 æмæ 0,5 литруат мигæнæнты. Дон ист цыд Бæгъиаты 9-æм донгуырæнæй. Заводмæ йæ ластой сæрмагонд цистернæты, æмæ бынаты æппæт процедурæтæ рацæуыны фæстæ йæ уагътой мигæнæнты. Завод бакæныны рæстæджы «Владимирский стандарт»-ы вице-президент, амалиуæггæнæг Павел Аитов дзырдта, зæгъгæ, завод цы суары дон уадза, уый реализаци цæудзæн куыд бынаты, афтæ Уæрæсейы Федерацийы территорийыл дæр. Завод, дам, тагъд сæвæрдзæн дыккаг хахх дæр, уырдæм та, зæгъгæ, дон ласдзыстæм Згъуыбиры донгуырæнæй. Ныфс æвæрдта, уый фæстæ дæр завод йæ куыст кæй уæрæхдæр кæндзæнис, уымæн æмæ, зæгъгæ, заводы территори дзуапп дæтты куысты уавæртæн. Уый фæстæ дæр-иу журналистæн цы интервьютæ дæттой «Родник Осетии»-йы къухдариуæгад, уым æрвылхатт дæр райгонд уыдысты сæ куыстæй. Дзырдтой, зæгъгæ, Владимиры областы тынг популярон у дон «Осетинская».

Фæлæ бæрцæй цалдæр азы йедтæмæ нæ бакуыста завод. Бизнесæн йæхи фæткойтæ ис, фæстиуæг тагъд нæ ратты. Фæзынд цæлхдуртæ дæр компани «Владимирский стандарт»-æн. Æрлæууыд сæ куыст, цы 35 адæймаджы дзы куыста бынæттонтæй, уыдон дæр æгуыст баззадысты. Афæдзæй фылдæр ацы завод у æхгæд. Ныр ам æрбынат кæндзæнис компани «Атей».

Босыкты Владимир куыд зæгъы, афтæмæй уыдон цы ног ифтонгад сæвæрдтой заводы, уый фадат дæтдзæнис хуыздæр гъæды продукци стырдæр гуырахстæй уадзынæн. Иу сахаты ам уаддзысты 6 мин авджы. Заводы къухдариуæгад зæгъы, зæгъгæ, фыццаг уал дон реализаци цæудзæн бынæттон базары, уый фæстæ та бацархайдзысты фæсарæйнаг базармæ йæ ласыныл. Амалиуæггæнæджы ныхæстæм гæсгæ сын бадзырдтæ арæзт уыд Донецкы Адæмон Республикæ æмæ Уæрæсейы стырдæр горæттæй цалдæримæ. Фæлæ уыцы бадзырдтæ фæкъуылымпы  уыдзысты инфекцион низ коронавирусы карантины аххосæй. Коронавирусы фæдыл мадзæлттæ фæстиат кæнынц нæ рахызт фæсарæйнаг базармæ. Æнæуый æмбæлон гæххæттытæ арæзт сты нæ продукци таможнæйы сæртыл ласыны тыххæй.

Уæ зæрдыл уын лæууын кæнæм компани «Алтей» Згъуыбиры хъæумæ хæстæг, уалдзæджы райдианы йæ дуæрттæ кæй байгом кодта хосгæнæндон дæр. Хосгæнæн пансионат ис денджызы æмвæзадæй 1 550 метр бæрзонддæр бынаты. Пансионаты ис 8 бынаты. Ам хосгæнæн процедурæтæ уагъд цæуынц цалдæр минералон доны гуырæнæй. Дон та исынц «Аландон»-ы суадонæй, кæцы ахъаз у цармы низтæн, нуазгæйæ та – игæр æмæ уыргтæн. Ваннæтæ та ист цæуынц æндæр суадонæй, кæцытæ ахъаз сты артроз, артрит æмæ варикозæн. Амалиуæггæнæг зæгъы: «Ацы низтæн уæлдæр загъдгонд суадæттæ кæй æххуыс кæнынц, уый сбæлвырд кодтой адæм сæхæдæг дæр, фæлæ нæм ис бæлвырдгæнæн гæххæттытæ та Пятигорскы курортологийы зонад-иртасæн институтæй. Пансионатæй 200 метр фалдæр дæлвæзы зæххы бынæй  абухынц, æндæр æмæ æндæр ад æмæ æууæлтæ кæмæн ис, ахæм донгуырæнтæ, фæлæ уыдонæн сæ фадæттæ нырма не сты ахуыр. Иу дон сахуыр кæнынæн хъæуы 80 мин сомы. Пятигорскмæ цы суадонæй ахастон дон, уый цæуы Кавказы хохрагъæй æмæ йæм никæцы дон хæццæ кæны», – загъта Босыкты Владимир.

Босыкты Владимир ма нын куыд загъта, афтæмæй уый пансионат æмæ минералон дон «Аландон» дæр бакодта, паддзахадæй цы кредит райста, уый фæрцы.

УАЗÆГТЫ Марфа

Comments are closed, but trackbacks and pingbacks are open.