8-æм майы Цхинвалы районы Сатихъары хъæуы цы мемориалон цырт ис, уый раз æрæмбырд сты Сатихъар æмæ Хелцуайы хъæуы цæрджытæ. Ацы хъæутæй бирæ нæлгоймæгтæ ацыд Стыр Фыдыбæстæйон хæстмæ, бирæтæ дзы нал æрыздæхтысты. Чи æрыздæхт, уыдонæн та сæ фылдæр – уонгцухтæй. Хъыгагæн, абон ма уыцы ветерантæй сӕрӕгас у ӕрмӕстдӕр Мæлдзыгаты Валоди. Цалынмæ йе ‘нæниздзинад нæ фæцудыдта, уæдмæ-иу уый дæр, хъæубæстимæ иумæ хайад иста Уæ-лахизы цытæн бацæттæгонд мадзӕлтты.
Мадзалммӕ фæуазæг Цхинвалы районы администрацийы минæвар Тедеты Никъала.
Мадзал бацӕттӕ кодтой Хелчуайы Культурæйы хæдзары сæргълæууæг Лолоты Джульеттæ, Сатихъар æмæ Хелцуайы библиотекæты сæргълæуджытæ Æлборты Маринӕ æмæ Чысиаты Таня. Уый рауад иттæг цымыдисон. Сабитæ æрымысыдысты, абон сыгъдæг арвы бын кæй фæрцы цæрынц, уыцы хæстонты нæмттæ. Дзырдтой, цасфæнды рӕстӕг куы рацæуа, уæддæр хӕсты ветерантӕ кӕй уыдзысты стыр цыты аккаг. Фæлтæрæй-фæлтæрмæ кæй хиз-дзæнис уыдонæн цыт кæныны традици.
Мадзалы Сатихъары хъæуы администрацийы хистæр Дыгъуызты Никъала æмæ ацы хъæуы скъолайы директор Уазæгты Ритӕ дзырдтой æмæ ахуыргæнинæгтæн фæдзæхстой, цæмæй канд ацы хъæуæй ацæуæг ветерантæн ма кад кæной, фæлæ ӕгас Советон Цæдисы ветерантæн. «Зæрдæ фæриссы, Украинӕ, Эстони Гуырдзыстоны Стыр Фыдыбæстæйон хæсты мемориалон цыртытæ æнæзæрдæ адæймæгтӕ куы рафæлдахынц, уыцы нывтæм кæсгæйæ. Махæн алчи дæр, алы нацийы минæвар дæр кады аккаг у», – дзырдта ахуыргæ-нинæгтæн се скъолайы директор.
Ацы хъæутæй гуырдзиаг-ирон хæсты азарæй чи бабын сты, æрымысыдысты уыдон нæмттæ дæр.
Мадзалы кæрон ахуыргæнинæгтæ сæххæст кодтой хæстон зарджытæ уырыссаг æмæ ирон æвзæгтыл.
Уазæгты М.
Comments are closed, but trackbacks and pingbacks are open.