Цхинвалы бирæпрофилон колледж байгом 2010 азы, Цхинвалы хъæууонхæдзарадон техникумы базæйыл. Колледжы ис 19  хуызы специализаци, куыд хæринагаразæг, кондитер, слесарь, электрик, токарь, автомобилтæ цалцæггæнæг, хуыйæг, æхсæнадон хæлцы продукцийы технолог æмæ æндæртæ. Ацы аз ма колледжы байгом механизацийы хайад. Цы дæсныйæдтæ райсæн ис колледжы, уыдон абон приоритетон сты нæ æрыгон республикæйæн. Ныппырхгонд инфраструктурæ, хæдзæртты сæндидзын кæнын, ногæй сæ саразыны тыххæй хъæуы алыгъуызон квалификациджын специалисттæ. Мах æвдисæн стæм, нæ республикæмæ æндæр адæмты минæвæрттæ куы æрцæуы, уæд уыдон куыстытæй бынæттон кусджыты армахаст бæрæг хорзæрдæм кæй хицæн кæны.

2016 азы колледжæн арæзт æрцыд йæхи æрмадзтæ, фæлæ уæдмæ та студентæ кондадон практикæйы цыдысты республикæйы арæзтадон объектты. Хайад-иу райстой Цæгат Ирыстоны кондитерты, слесарты æмæ хуыйджыты конкурсты. Ныр сын фæзынд хицæн, уæрæх хатæнтæ, алыгъуызон дæсныйæдты фæдыл æрмадзтæ. Уыдон иууылдæр ифтонг æрцыдысты нырыккон ифтонггæрзтæй. Ис дзы уазал æмæ хъарм дон, хинайæнтæ. Практикæйы цæуынæн сын ис æппæт уавæртæ дæр.

Ахуыры процесс кæм цæуы, уый та у дыууæуæладзыгон бæстыхай, йæ иумæйаг фæзуат у 980 кв. метры. Колледжы æмæ æрмадзты кæрæдзийæ хицæн кæны тротуарон плиткæ, цæмæй дзы хъахъхъæд цæуа сабырдзинад.

Бирæпрофилон колледжы директор Козаты Лирæ нын куыд загъта, афтæмæй ивгъуыд аз колледжы ахуыр кодта æмткæй 98 студенты. Иууыл бæллиццагдæр хайадыл нымад цæуы хæринагарæзæг æмæ кафелæвæрæджы хайад.

Иууыл къаддæр студенттæ та вæййы аграрон хайады. Колледжы къухдариуæгад архайынц, цæмæй бирæпрофилон ахуыргæнæндонмæ æрыгон фæлтæр тынгдæр, тырной ахуыр кæнынмæ æмæ дæсныйæдтæ райсынмæ. Колледжы ахуыргæнджыты хъæппæрисæй уагъд æрцæуы «Гом дуæртты бон». Уырдæм хуынд æрцæуынц горæты скъолаты ахуыргæнинæгтæ, афтæ ма республикæйы районты скъоладзаутæ дæр. Педколлектив æмæ ахуыргæнинæгтæ скъоладзауты базонгæ кæнынц, цы дæсныйæдтæ сæм ис, уыдонимæ. Саразынц сын экскурси куыд æрмадзтæм, афтæ ахуырадон корпусмæ дæр. Сæ зæрды ис, уымæй республикæйы рауагъдонтæн фидæны дæсныйæдтæ равзарыны фадат раттын.

Ацы аз дæр та уагъд æрцыд ахæм мадзал, студенттæ сæ ахуыргæнджытимæ сцæттæ кодтой алыгъуызон хæрзад хæринæгтæ. Ацы азы рауагъдонтæ – кондитертæ скодтой диссаджы рæсугъд адджинæгтæ. Уымæй студенттæ фенын кодтой ахуыры азы аккаг зонындзинæдтæ кæй райстой æмæ сæ дæсныйадыл кусгæйæ, сæхи профессионалтæй кæй æвдисдзысты.

Ныртæккæ бирæпрофилон колледжы цы рауагъдонтæ ис, уыдон æххæст кæнынц дипломон куыстытæ æмæ сæ зонындзинæдтæ та бафидар кæнынц фæлварæнтæй. Уый фæстæ райдайдзысты ног ахуыры азмæ студенттæ исын. Исæн къамис кусдзæнис суанг августы мæймæ. Колледжы директор зæгъы: «Мах ацы аз æнхъæлмæ кæсæм фылдæр студенттæм. Махмæ ис æппæт уавæртæ дæр, фидæны дæсныйæдтæ райсынæн. Вæййы афтæ дæр, студент иу аз – райсы иу дæсныйад, дыккаг аз та æндæр. Нæ колледжы студенттæ ифтонг цæуынц æмдзæрæндонæй дæр. Боны иу хай уыдонæн вæййы ахуыр, иннæ хай та – практикæ. Уымæ гæсгæ ифтонг цæуынц хъарм сихорæй дæр».

Колледжы студенттæ æнцонтæй ссарынц куыст, уымæн æмæ ам цы дæсныйæдтæн ис райсæн, уыдон се ‘ппæт дæр сты, ныртæккæ нæ республикæйы зæрдиагæй чи хъæуы, ахæмтæ.

Уазæгты Марфа

Comments are closed, but trackbacks and pingbacks are open.