Арæзт цæуы ноджыдæр иу медицинон уагдон

Цхинвалæн цæгатварсæрдыгæй активон темптæй цæуы рæуджыты низы ныхмæ диспансерон ног бæстыхайы арæзтад. Ацы объект хаст у 2017 азæн Республикæ Хуссар Ирыстоны социалон-экономикон рæзтæн ахъазгæнæг Инвестицион программæмæ. Куыстытæ дзы æххæст кæны хуссарирыстойнаг компани арæнгонд бæрндзинады æхсæнад «Мегаполис-Т». Арæзтадон организаци ма кусы ног университетон комплексы æмæ Уырыссаг Чырыстон Аргъуаны Сыгъдæг Троицæйы кувæндоны арæзтадыл дæр.

Диспансеры зæронд бæстыхай, кæцы уæвы республикон соматикон рынчындоны фарсмæ, рагæй нал дæтты дзуапп абоны домæнтæн. Уымæ гæсгæ актуалон уыд ног диспансеры арæзтад. Санитарон-эпидемиологион домæнтæм гæсгæ, рæуджыты низы ныхмæ стационар 100 метрæй æввахсдæр хъуамæ ма уа цæрæн хæдзæрттæм.

Фирмæ «Мегаполис-Т»-йы прораб Æлборты Иналы ныхæстæм гæсгæ, ног диспансеры уыдзæн 25 сынтæджы. Бæстыхæйттæ уыдзысты дыууæ, иууæладзыгон æмæ кæрæдзимæ иу уыдзысты бахизæнæй. Ныккæндты дæр уыдзæн хатæнтæ. Æдæппæт, йæ иумæйаг фæзуат уыдзæн 3200 квадратон метры.

«Диспансеры арæзт æрцæудзысты æппæт æнæмæнгхъæуæг уавæртæ рынчынтæн хос кæнынæн. Лабораторион блокы уыдзæн бактериологион лаборатори, лабораторийы сæргълæууæджы кабинет, бирæ æндæр хъæуæг хатæнтæ. Функционалон-диагностикон блокы та уыдзысты процедурон рентгенкабинет, фотолаборатори фтизиатры, пульманолоджы, процедурон бронхоскопийы кабинеттæ æмæ палатæтæ. Уымæй дарддæр ма проекты нысан сты изоляцион-диагностикон бокс, интенсивон терапийы палатæ, басгарæн кабинет, стерилизацион хатæн æмæ буфет.

Диспансеры ма уыдзысты хатæнтæ персоналæн, конференцзал, алыгъуызон æфснайæн бынæттæ, халсæрттæ цæттæгæнæн цехтæ, техникон хатæнтæ. Медицинон уагдон ифтонг æрцæудзæн нырыккон ифтонггæрзтæй», – банысан кодта уый.

Арæзтад цæуы ныр цалдæр мæйы æмæ кусджытæ кусынц тагъд темптæй. Æлборты Иналы ныхæстæм гæсгæ аразджытæ кусынц сæумæрайсомæй изæрдалынгтæм. Ныртæккæ объекты амайынц къултæ, цæттæгæнæн куыстытæ æххæст цæуы плитæтæй æмбæрзынмæ. Арæзт та хъуамæ фæуа ацы азы кæронмæ. Прораб куыд зæгъы, афтæмæй йæ ныфс ис ацы æмгъуыдмæ æппæт арæзтадон куыстытæ дæр кæй сæххæст кæндзысты.

Рæуджыты низы ныхмæ ног диспансеры фæзынд суыдзæн ноджыдæр иу ахсджиаг къахдзæф республикæйы æнæниздзинад хъахъхъæныны инфраструктурæ модернизаци кæныны хъуыддагмæ. Йæ арæзтадыл æдæппæт бахардз уыдзæн 200 милуан сомы.