Аварион хæдзары бынаты – ног хæдзар

Ацы бонты æрæвнæлдтой нæ горæты Хъайтарты уынджы кæрон цы ава-рион хæдзар уыд, уый бынаты ног цæрæн корпусы арæзтадмæ.  Уыдзæн дзы цыппар бахизæны. Фатертæ та уыдзысты уæрæхдæр æмæ райдзастдæр.

 Хъайтарты уынджы 118-æм бирæуæладзыгон хæдзарæн тынг разиан чындæ-уыд 2008 азы августы хæсты рæстæджы. Уæдæй фæстæмæ йæ цæрджытæ æнхъæлмæ кастысты, цæмæй сын сæ бæстыхай сцалцæг кодтаиккой. Фæлæ Арæзтады министрады экспертон къамис куыд сбæрæг кодта, афтæмæй хæдзар уыд аварион æмæ йын сцалцæггæнæн нал уыд. Уымæ гæсгæ пырх æрцыд цалдæр мæйы размæ. Арæзтадон фирмæ СТМ-Юг хъуамæ хæдзар аразынмæ уадид бавнæлдтаиккой, фæлæ цы пандеми апарахат, уый бирæбæрцæй бакъуылымпы кодта арæзтад. Арæн æхгæд кæй уыд, уымæ гæсгæ арæзтадон æрмæджытæ æрласын бакъуылымпы ис. СТМ-ЮГ-ы сæйраг специалисттæй  дæр чидæртæ баззадысты Цæгат Ирыстоны. Уыдон, се ‘ппæт дæр ныр бынаты сты. Æрæджы рахызтысты дыууæкъуырион карантинæй æмæ ныр бавнæлдтой хæдзары арæз-тадмæ. Бæстыхай хъуамæ арæзт фæуыдаид 2021 азы, фæлæ ныр арæзтадон фирмæйы минæвар куыд зæгъы, афтæ-мæй, гæнæн ис, йæ арæзтад чысыл фæ-фæстиат уа.

Ацы бирæуæладзыгон хæдзары чи цард, уыдоны иу  хай раконд æрцыдысты, Гуыбаты æфсымæрты уынджы цы ног-арæзт хæдзар арæзт æрцыд, уырдæм. Хæдзар эксплуатацимæ лæвæрд куы æрцæуа, уæд хæдзары цæрджытæй Гуыбаты æфсымæрты уынгмæ цæрынмæ чи нæ акуымдта æмæ рæстæгмæ цæрæн бынат йæхæдæг чи самал кодта, уыдон фæстæмæ æрцæрдзысты сæхи фатерты.

Ног бирæуæладзыгон хæдзар æмæ сабидон

Гуыбаты æфсымæрты уынджы цы дыууæ бирæуæладзыгон бæстыхайы сырæзт, уыдонæй иннæйы та æрцардысты, ЦАРЗ-ы районы цы æрдæгхæлæтдзаг æмдзæрæндоны уыд, уым чи цард, ахæм 40 бинонтæ дыууæхатæнон фатертæ алкæмæн не сфаг сты, кæцыдæр бинонтæ уал æрцардысты иуы. Цхинвалы администрацийы цæрæнуатон-коммуналон хæдзарады къамисы сæрдар Джиоты Эндрик куыд зæгъы, афтæмæй цæрджытæй иухатæнон фатерты чи æрцард, уыдонæн агурынц уавæртæ, цæмæй уыдон дæр конд æрцæуой дыууæхатæнон фатертæм. Цæр-джытæ нырмæ цы аварион æмдзæрæндоны цардысты уый та пырх æрцæудзæнис æмæ йæ бынаты сырæздзæн ног бæстыхай, кæцыйы уыдзæн 75 фатеры. Уыцы-иу рæстæджы ам араздзысты сывæллæтты рæвдауæндон дæр. Сабидоны арæзтадæн та Инвестпрограммæйæ хицæн æрцыд 175 милуан сомы. Ацы сабидон арæзт æрцæудзæн  скъолайы агъоммæйы кары 160 сывæллонæн. ЦАРЗ-ы районы цæрджытæ рагæй æнхъæлмæ кæсынц ацы цаумæ, уымæн æмæ горæты ацы хайы нæй иунæг сабидон дæр. Арæзтады министрад куыд зæгъы, афтæмæй уыцы сабидон дзуапп дæтдзæн нырыккон домæнтæн. Уыдзæн, ивгъуыд аз нæ горæты Чиаты Иосифы уынджы цы сабидон сырæзт, раст уый халдих.

Медицинон-хосгæнæн центр

8-æм июны уынджы цы зæронд абана уыд, уый йæ функцитæ нал æххæст кæны 25 азæй фылдæр. Объект уыд æдзæллаг  уавæры. Рæстæгæй-рæстæгмæ иу фæзынд амалиуæггæнджытæ, кæцыты фæндыд абана сцалцæг кæнын æмæ йæ скусын кæнын. Фæлæ абанайы коммуникацитæ æгæр кæй базæронд сты, стæй агъуыстмæ бирæ азты æркаст кæй нæ уыд,   уый æгæр стыр финансон хæрдзтæ домдта.

Ацы бонты бавналдæуыд объект пырх кæнынмæ. Бирæтæ цымыдис кæнынц абанайы бæстыхайы бынаты ног абана арæзт æрцæудзæнис æви нæ. Уый фæдыл Архитектурæ æмæ арæзтады министрады загътой, зæгъгæ, абанайы бынаты арæзт æрцæудзæн медицинон-хосгæнæн центр. Фидæны медицинон-хосгæнæн центры сæргълæууæг уыдзæн дохтыр Тасойты Азæ. «Абанайы бынаты сырæздзæнис нырыккон домæнтæн дзуапп чи дæтта, ахæм хосгæнæн центр. Абана дæр дзы уыдзæнис. Медицинон уагдоны абанайæ дарддæр уыдзæн сауна, фитнес клуб, хосгæнæн физкультурæйы æппæт хуызтæ. Нырыккон арæзтцæуæг абанаты уыцы лæггæдтæ сты се ‘ппæт дæр», зæгъы Азæ.

Уый ма куыд загъта, афтæмæй абанайы арæзтад аххæсдзæн 2-3 азы бæрц, фæлæ уыдзæн нырыккон домæнтæн дзуапп чи дæтта, ахæм уагдон.

Паддзахадон резервы æфтауцдон

Раздæры авиацион заводы территорийыл сырæздзæнис паддзахадон резервы æфтауцдон. Уым ныртæккæ цæуы  сыгъдæггæнæн куыстытæ. Объекты арæзтад дæр хаст æрцыд Инвестицион программæмæ. Хицæн ын æрцыд 40 милуан сомы. Арæзтадыл кусдзæн хуссарирыстойнаг фирмæ ООО «Цхинвалы арæзтадон компани». Проект куыд амоны, афтæмæй  хицæнæй æфснайд цæудзысты арæзтадон æрмæджытæ. Хæлцад, дзаумæттæ æмæ цардуагон техникæ æмæ æндæр æрмæджытæн дæр уыдзæн хицæн бынæттæ офис та арæзт æрцæудзæн, техникон æмæ административон кусджытæн. Паддзахадон резервы æфтауцдон  арæзт кæм цæуы, уымæн йæ фæзуат æмткæй у 7 мин кв.м. Уыцы территори æмткæй æрцæудзæн хæрзарæзт, цæмæй дзы сæрибарæй уыцы-иу рæстæг балæууæн уа дæсгай уæзласæн машинæтæн. Арæзтадон фирмæйы къудариуæггæнæг Цхуырбаты Вильям куыд зæгъы, афтæмæй æппæт куыстытæ дæр фæуыдзысты ацы азы кæрон. Уымæн æмæ ангартæ арæзт цæудзæн ног технологитæм гæсгæ. Уыдон ныридæгæн сты заказ Цæгат Ирыстоны.

Паддзахадон резервы æфтауцдон арæзт цæуы форсмажорон ситуациты тыххæй. Уый фæрцы паддзахад уæлвæткон уавæрты рæстæджы сифтонг кæндзæн йæ адæмы хæлцад æмæ фыццаг рады хъæуæг æрмæджытæй.

Уазæгты Марфа

Comments are closed, but trackbacks and pingbacks are open.