Ацы аз не скъолатæм бацыдис 663-йы бæрц фыццагкъласоны, кæцытыл сæ ахуыргæнджытæ æмбæлдысты худгæбылæй, стыр цины æнкъарæнтимæ.

Ивгъуыд къуырийы кæрон, 5-æм сентябры нæ республикæйы æппæт скъолаты дæр цытджын æгъдауæй айзæлыдысты фыццаг дзæнгæрæджы зæлтæ æмæ та райдыдта ног ахуыры аз. Бæрæг куыд у, афтæмæй Беслæны стыр трагедийы фæстиуæгæн ныр æртыккаг аз Хуссар Ирыстоны скъолаты Зонындзинæдты бон нысан кæнынц 5-æм сентябры.

Фæззæджы æрбалæудимæ Зонындзинæдты боныл нæ республикæйы æмбæстæгтæ кæддæриддæр сæмбæлынц стыр цины æнкъарæнтимæ. Не скъоладзау фæсивæд сæ сæрдыгон улæфты бонтæ æнæмæтæй арвитгæйæ, 5-æм сентябры цингæнгæйæ æмæ рог зæрдæйыуагимæ скъолайон дарæсы рæсугъдæй уадысты се скъолатæм. Сæ хъæлдзæг худт æмæ цины хъæлæбайæ та байдзаг сты уынгтæ.

Республикæйы разамынад ацы бæрæгбонмæ развæлгъау цæттæ кæй вæййы, уымæ гæсгæ ног ахуыры азы фыццаг бон нæ республикæйы æппæт скъолатæм дæр æрвыст æрцæуынц бæрнон кусджытæ. Республикæ Хуссар Ирыстоны Парламенты Сæрдар Тадтаты Алан йæ фæндаг акодта Дзауы районмæ. Районы скъолаты ахуыргæнинæгтæ æмæ ахуыргæнджытæн ракодта зæрдæбын арфæтæ.

Зонындзинæдты бон цытджын æгъдауæй банысан кодтой Санахъоты Гришикы номыл Дзауы астæуккаг скъола-интернаты дæр. Ардæм æрбацыдысты 10 фыццагкъласоны рæсугъд скъолайон дарæсы дидинджытимæ. Уыдон стыр цинимæ скъолайы кæртмæ бакодтой сæ ныййарджытæ æмæ сыл кæрты та æмбæлдысты райдиан къласы ахуыргæнæг æмæ хъомылгæнджытæ, сæ фыццаг ахуыргæнджытæ. Фыццаг хатт чи æрбацыдысты скъоламæ, уыцы чысыл ахуыргæнинæгтыл цин кодтой хистæр кълæсты ахуыргæнинæгтæ æмæ ахуыргæнджытæ дæр.

Бæрæгбонон мадзал байгом ис 11-æм къласы ахуыргæнинæгты арфæйаг ныхæстæй æмæ уый фæстæ музыкæйы зæлтимæ æрбахуыдтой фыццагкъласонты сæ ахуыргæнджытимæ. Æрæмбырдуæвджытæ сыл сæмбæлдысты къухæмдзæгъдимæ. Традицимæ гæсгæ фыццагкъласонтæн æмæ æппæт ахуыргæнинæгтæн дæр арфæйы ныхас загъта скъолайы директор Галуанты Зæлинæ: «Абон мах нысан кæнæм Зонындзинæдты бон æмæ уый цытæн арфæ кæнын уе Эппæтæн дæр, уæлдай арфæйы ныхæстæ та мæ фæнды зæгъын нæ фыццагкъласонтæн, цæмæй сæ ахуыры райдиан уа æнтыстджын æмæ сæ рацæуа хорз ахуыртæ æмæ хорз адæймæгтæ. Уыдон махæн сты нæ фидæн æмæ сын мæ зæрдæ зæгъы фидар æнæниздзинад æмæ ахуыры уæрæх фæндæгтыл цæуын», – загъта скъолайы директор.

Зонындзинæдты боны цытæн ахуыргæнинæгтæн арфæйы ныхæстæ загъта Парламенты Сæрдар Тадтаты Алан ДæР: «Зынаргъ, ахуыргæнинæгтæ, зынаргъ ахуыргæнджытæ æмæ ныййарджытæ. Мæнæн абон тынг æхсызгон у Зонындзинæдты бон æз дæр уæ фарсмæ кæй дæн æмæ иумæ кæй нысан кæнæм ацы нысаниуæгджын бæрæгбон. Фыццаджыдæр мæ арфæйы ныхæстæ зæгъын фæнды нæ фыццагкъласонтæн, кæцытæ ацы рæсугъд бон бахъуыды кæндзысты цæргæ цæрæнбонтæм. Мæн фидарæй уырны æмæ ам цы ахуыргæнджыты коллектив кусы, уыдон æппæт тыхтæ дæр кæй нæ бавгъау кæндзысты сымахæн, цæмæйдæриддæр райсат хорз зонындзинæдтæ. Æз бузныг дæн скъолайы педколлективæй сæ иузæрдион куысты тыххæй, Ирыстонæн фидæны фæлтæр кæй хъомыл кæнынц æмæ сæ раст фæндагыл кæй кæнынц, уый тыххæй. Хицæнæй мæ бузныджы ныхæстæ фæнды зæгъын ныййарджытæн, скъолайон царды активон хайад кæй фæисынц, уый тыххæй. Ноджыдæр арфæгонд ут, мæ зæрдæ уын зæгъы фидар æнæниздзинад, стыр æнтыстытæ, уæ ахуыр уын æхцондзинад цы хæсса æмæ уæ Ирыстон сæрыстыр цы уа, уый амонд уæ уæд!», – загъта Тадтаты Алан.

Бæрæгбоны сæраппонд ма æппæт ахуыргæнинæгтæн арфæ ракодтой Дзауы районы администрацийы сæргълæууæг Джиоты Андрей, районы администрацийы ахуыры хайады минæвар Пæррæстаты Иннæ æмæ Мегафоны минæвар Бежанты Зæринæ, кæцы фыццагкъласонтæн балæвар кодта фæйнæ скъолайон дзаумæтты комплект.

Зонындзинæдты боны цытæн уагъдцæуæг мадзал ма барæсугъд кодтой ацы скъолайы ахуыргæнинæгтæ музыкалон номыртæй, бакастысты æмдзæвгæтæ дæр. Мадзалы кæрон ахуыргæнинæгтæн айзæлдысты фыццаг дзæнгæрæджы зæлтæ æмæ уый фæстæ фыццагкъласонтæн парти «Иууон Ирыстон»-ы номæй балæвар кодтой портфельтæ. Бæрæгбонон линейкæйы ма фыццагкъласонтæн цытджын æгъдауæй сæ риутыл бакодтой скъола-интернаты номыл арæзт æрцæуа логотипимæ риуылдарæнтæ.

ЦХУЫРБАТЫ Ларисæ

Comments are closed, but trackbacks and pingbacks are open.