Ног азы ӕрбалӕуд нӕ чысыл хуртӕм сӕвзӕрын кӕны уӕлдай тынгдӕр цины ӕнкъарӕнтӕ. Уыдонӕн Ногазон назбӕлас ӕрхӕссы хъӕлдзӕгдзинад, хъазгӕ ӕмӕ худгӕйӕ йӕ алыварс арвитынц сӕ рӕстӕг. Уымӕ та сӕ рагацау бацӕттӕ кӕнынц сӕ ахуыргӕнджытӕ-хъомылгӕнджытӕ, ныййарджытӕ.

Цхинвалы районы администрацийы адӕмон ахуырады хайад дӕр йӕхи рады развӕлгъау бацархайдта, цӕмӕй сӕ ахуырдзаутӕ бӕрӕгбоныл сӕмбӕлой ӕххӕст цӕттӕйӕ. Адӕмон ахуырады методкабинеты сӕргълӕууӕг Шахпаронов Алыксандр куыд загъта, афтӕмӕй 11 скъолайы дӕр назбӕлӕстӕй сты ифтонг, се сфӕлындзыныл та ныртӕккӕ архайынц куыд ахуыргӕнджытӕ, афтӕ ахуыргӕнинӕгтӕ дӕр. Организатортӕ ахуырдзауты бацӕттӕ кодтой ӕмӕ рӕсугъд фӕлыст назбӕласы алыварс кӕндзысты хъӕлдзӕг зарджытӕ мадӕлон æмæ уырыссаг ӕвзӕгтыл, дзурдзысты ӕмдзӕвгӕтӕ, сӕххӕст кӕндзысты кафты номыртӕ. Митын Дада ӕмӕ Митын Чызг сын бӕрӕгбоны цытӕн ракӕндзысты арфӕтӕ, хуыздӕр цӕттӕ чи уа, уыдонӕн сӕхи рады кӕндзысты лӕвӕрттӕ. Иугӕр бӕрӕгбонон хъазтизӕртӕ кӕронбӕттӕнмӕ куы бахӕццӕ уой, уӕд 1- 5 кълӕсты ахуыргӕнинӕгтӕн се ‘ппӕтӕн дӕр бакӕндзысты ногазон лӕвӕрттӕ. Зындгонд куыд у, афтӕмӕй сывӕллӕтты рӕвдауӕндӕттӕ ис районы – Дменис ӕмӕ Къостайыхъӕуы, ӕмӕ уым дӕр уагъд ӕрцӕудзысты ахӕм бӕрӕгбонон мадзӕлттӕ, алы саби дӕр фӕхайджын уыдзӕн лӕвӕрттӕй. Районы 4-ӕм къласонтæй иттӕг хӕрзтыл чи ахуыр кӕны, уыдонӕй ӕхсӕзӕй хуынд ӕрцӕудзысты Ногдзауты галуанмӕ ӕмӕ  хайад райсдзысты Президентон Ногазон назбӕласы хъазтизӕры. Уымӕй дарддӕр ма уагъд ӕрцӕудзӕн районон назбӕласы хъазтизӕр дӕр.

Хуыбиаты Никъала

Comments are closed, but trackbacks and pingbacks are open.