Студент уæвгæйæ, педпрактикæйы 12-æм астæуккаг скъолайы цыдтæн. Раст зæгъын хъæуы, уæдæй ардæм дзы хорзæрдæм бирæ ивындзинæдтæ æрцыд, æдде-мидæгæй йæ бакастæй рухс кæны адæймаджы зæрдæ. Уыцы хъуыды бафидар кодтой, Фыдыбæстæ  хъахъхъæнæджы боны цытæн бæрæгбонон мадзалы хайад чи райста, уыцы уазджытæ дæр. Мидæмæ бахизгæйæ, дзы алцы дæр ис йæ бынаты, цæст фыццаг кæй ацахсы, уый у, скъола сæрыстырæй кæй ном хæссы, дунейы уыцы фыццаг космонавт Юри Гагарины худгæ цæсгом. Æрбацæуджытæ ам базонгæ вæййынц, Ирыстонæн кад æмæ ном чи скодта, уыдоны къамтимæ, Хуссар Ирыстоны æрдзон хъæздыгдзинæдтимæ æмæ афтæ дарддæр. Æппæт уыдæттæ хорзæрдæм æндавынц ахуырдзауты удыхъæд æмæ уагахастыл, сæ ахуырфæразондзинадыл, ахуыры азты дæргъы кæй цайдагъ кæндзысты æхсардзинад æмæ Райгуырæн бæстæмæ уарзондзинады æнкъарæнтыл.

Цалынмæ Фыдыбæстæ хъахъхъæнæджы боны цытæн мадзал нæ райдыдта, уæдмæ уал уазджытæ бацыдысты, ам цы музей ис, уырдæм. Скъолайы организатор Зæгъойты Ленæ лæмбынæг зонгæ кодта æрбацæуджыты, раздæры рауагъдонтæй 1989 азæй 2008-æм азмæ гуырдзиаг лæгхорты ныхмæ хъæбатырæй чи хæцыд, уыцы хæстонтимæ. Уыдонæй сæ иутæ се сгуыхтдзинады тыххæй систы Ирыстоны иууыл уæлдæр хорзæх-Уацамонгæйы ордены аккаг. Дарддæр иннæ стенды та сты скъолайы микрорайоны ветеранты къамтæ. Азтæ цæуынц, æмæ хъуамæ рох ма уой, ахуыр-хъомыладон куыстæн йæ бирæ зонындзинæдтæ чи нæ æвгъау кодта, уыцы ахуыргæнджыты, стæй рауагъдонты къамтæ дæр 1972 азæй фæстæмæ. Уæдмæ райдыдта бæрæгбонон мадзал, уыцы бон цытджын æгъдауæй ам байгом æфсæддон кабинет. Уый фæлыст у, æндæр æмæ æндæр æнæнхъæлæджы уавæрты бахаугæйæ, адæймагæн куыд баххуыс хъæуы, уыдæтты тыххæй стендтæй. Сæ бынæттæ бацахстой 10-æм æмæ 11-æм кълæсты ахуыргæнинæгтæ, ветерантæ. Ахуыргæнинæгтæ æрбахастой Хуссар Ирыстоны тырыса, азæлыдысты нæ гимны зæлтæ. Хæсты сгуыхтдзинæдтæ чи æвдыста, уыдон цæвиттон уыдзысты канд абоны нæ, фæлæ фидæны фæлтæртæн дæр. Сæ цард Райгуырæн бæстæйы сæрвæлтау нывондæн чи æрхастой, уыдоны рухс нæмттæ ссардтой иу уысм æмырæй алæууынæй. Уый фæстæ ахуырдзаутæ дзырдтой, Хуссар Ирыстон 1989 азæй фæстæмæ цы фæндæгтыл рацыд, уыдæтты тыххæй, кастысты сæм кинонывы. Ахуыргæнинæгтæ цымыдисæй хъуыстой Цхинвалы горæты Ветеранты советы сæрдар Гобозты Æхсар, æфсæддон ахуыргæнæг Джиджджойты Хаджумар, Стыр Фыдыбæстæйон хæсты хайадисджытæ æмæ ветерантæ Уалыты Лидия, Дзеранты Шота æмæ Цхуырбаты Иваны раныхæстæм, ноджы лæмбынæгдæр базыдтой нæ сагсур фырттæ æмæ чызджыты хъæбатырдзинад. Кæронбæт-тæны уазджытæн  арфæйы  ныхæстæ  загъта  ацы скъолайы æфсæддон хъуыддаджы ахуыргæнæг Къодоты Алан ахæм фембæлды тыххæй.

Хуыбиаты Никъала

Comments are closed, but trackbacks and pingbacks are open.