Аудæм нæ æрдзыл

Ирыстоны æрдз æрдхæрæн у, адæймаг æй кæд æрвылбон дæр уыны, уæддæр ын не ‘фсæды йæ рæсугъддзинадмæ кæсынæй, æдзух нæ йæхимæ æлвасы. Ахæм у хъæздыгдзинадæй дæр æмæ дзы хъуамæ уæм буц æмæ сæрыстыр. Уымæ гæсгæ алы æмбæстаджы комкоммæ хæс дæр у, цæмæй уыцы æвæджиау хæзнайæн аргъ кæнын зонæм, хъахъхъæнæм æй, аудæм ыл æмæ нын уый дæр йæхи рады кæндзæн йæ лæггады хай. Нæ республикæйы зайы бæлæсты алыгъуызон мыггæгтæ, дардыл у хъæдæн йæ фæзуат æмæ нын уый у æрдзы стыр лæвар æмæ хæзна. Хъæд адæмон хæдзарад, адæймагæн цы стыр пайда хæссы, уый нæ алкæмæн дæр зындгонд у æмæ алы æмбæстаг дæр хъуамæ уымæ дара аудгæ ахаст. Уыцы ахсджиаг хъуыддагыл хорз кусы Хъæды хæдзарады управлени йæ дæлхай кусджытимæ иумæ. Сæрмагондæй мæ зæгъын фæнды Хъорнисы лесничествойы хъæдгæс Цхуырбаты Валерийы иузæрдион куысты тыххæй. Уый хъæуы схъомыл æмæ йын адджын æмæ зынаргъ у йæ райгуырæн уæзæг, иу бон дæр ын нæ ад кæны, хъæууон уæлдæфæй куынæ сулæфа, уæд. Йæ бæрны уæвæг хъæдмæ дары хæдзардзин ахаст, тырны, цæмæй фылдæр кæна хъæды тыгъдад, æмбæстæгтæ та дзы пайда кæной хæдзардзин æгъдауæй.

Фæлæ уæддæр иуæй-иутæ хъæдмæ дарынц æнæмæт ахаст, кæсынц æм куыдфæндыйы цæстæй, нæ йыл ауæрдынц цæгъдын æмæ знаггад кæнынæй. Ахæмтæм та Цхуырбайы фырт кæддæриддæр у къæрцхъус æмæ семæ фæлмæн æвзагæй бакæны æмбарынгæнæн куыст. Хъыгагæн, æнæмæт æмбæстæгтæ кæд уарзынц сатæг уæлдæф улæфын, сыгъдæг бынаты сæ фæллад суадзын, уæддæр сæ ферох вæййы ууыл аудын æмæ фылдæр хатт уыдон аххосæй хъæд бахауы тæссаг уавæры. Цæвиттон, ацы аз фыццаг кварталы Хъорнисы лесничествойы кæд хъæдыл стыр зиан не ‘рцыд, уæддæр бынат уыд, æндæр æмæ æндæр рæстæджыты хъæдыл зынг уæлæнгай куы сирвæзт, ахæм цаутæн. Цхуырбайы фырт куыд загъта, афтæмæй æдæппæт марты мæйы кæронмæ хъæдыл зынг сирвæзт 6 хатты, фæлæ уæддæр равдыстæуыд фердæхтдзинад. Уый фæстиуæгæн зынг тынг нæ апарахат æмæ хъæдæн стыр зиан нæ ракодта. Ацы хъуыддаджы активон уыдысты лесничествойы хистæр Цхуырбайы фырт йæхæдæг, Цъорбисы хъæуы цæрджытæ Цхуырбаты Новик æмæ Джиоты Сæлимæт, Хъорнисы хъæуы Бачелиты сыхы цæрджытæ, стæй Хъорнисы хъæуккæгтæ Уалыты В. æмæ йе ‘мкъай Козаты К.

Цхуырбаты Валери уæлдай бузныгæй баззад Хъорнисы хъæуккаг Джиоты С. Куы йын фехъусын кодта, хъæд судзы, зæгъгæ, уæд йæхи сæрмагонд машинæйыл бахæццæ зынгсирвæзты бынатмæ, бакодта удуæлдай фыдæбон æмæ дзы уый тыххæй баззад райгондæй. Зынгсирвæзт ма апарахат кæныныл ма хорз бакуыстой Республикæйы Уæлвæткон уавæрты министрады дæлхайы кусджытæ дæр.

Зæгъын хъæуы, ныртæккæ тæвд бонты рæстæджы æмбæстæгты иу хай сæ сæрибар рæстæг кæй æрвитдзысты æрдзы хъæбысы. Уый хорз у, фæлæ сæ зæрдыл дарын хъæуы, цæмæй сæ фæстæ æртытæ хуыссын кæной, ма сæ уадзой рохуаты. Уæд хъæд знаггадæй уыдзæн сæрибар æмæ нын уыдзæн зæрдæйы фæндиаг улæфæн бынæттæ.

Хуыбиаты Н.