Хъæууон цæрæгæн йæ аудинæгтæ афæдзы алы афон дæр бирæ сты.
Цæмæй фос æнæниз уой, сæ продуктивондзинад зæрдæйы фæндиаг уа, уый тыххæй ветеринарон службæ хъуамæ йæ хæстæ æмбæлонæй æххæст кæна. Уыцы ахсджиаг хæс сæ зæрдыл дарынц Цхинвалы районы администрацийы ветеринарийы кусджытæ дæр æмæ æппæт гæнæнтæй дæр архайынц, цæмæй сæ бæрныуæвæг фос уой æнæниз. Сæйраг ветдохтыр Дудайты Леонид ацы куысты лæуд у 52 азы æмæ уыцы рæстæджы уый æппынæдзух архайы цæрджыты фосы æнæниздзинадыл. Уый йæ дæлбаруæвæг кусджытæй домы куыстмæ хæдзардзин ахаст дарын, фосæн æнæмæнгхъæуæг ветеринарон æххуыс бакæнын. Къостайыхъæуы ветеринарон фадыджы хистæр у Дзукъаты Инессæ, уымæн йæ куысты та æххуыс кæнынц Хаситы Бабули æмæ Дзæгъиаты Спартак, Дменисы хъæуы ветфадыджы хистæр у Размадзе Вахо æмæ йæ кусæг та у Лолоты Ренат. Гром æмæ Джеры фадгуыты ветдохтыртæй кусынц Хацырты Алан æмæ Кобесты Земæ, се ‘ххуысгæнæг кусджытæ та сты Биазырты Валодя, Сиукъаты Зауыр, Болататы Емзар. Фосы иумиаг нымæцыл дзургæйæ, Дудайы фырт банысан кодта, стуртæ æдæппæт кæй сты 3 мины, хуытæ – 1000, фыстæ æмæ сæгътæ дæр иу ахæм æмæ кæрчытæ та – 2 мины. 6-æм мæйы дæргъы фадгуыты кусджытæ бакодтой дзæвгар куыст низтæ рабæрæг кæнын æмæ фосы æнæниздзинады тыххæй. Банысан кæнын хъæуы уый, æмæ уыцы низтæ та сты дзæвгар, сæ иутæ сты æнцондæр дзæбæхгæнæн, иннæтæм та хъæуы тынгдæр хъусдард здахын. Кæцыдæр низ рабæрæг кæныны тыххæй бахъæуы фосæй туг сисын æмæ йын уый фæстæ æмбæлон æххуыс бакæнын. Цирроз низ базоныны тыххæй 136 стурæн сарæзтой анализтæ, анализ систой се ‘хсырæй дæр. Ис ма низ туджы лейкоз, уый дæр у тынг тæссаг низ æмæ мæгуырауæрдæм æндавы фосы æнæниздзинадыл. Сасийы низы ныхмæ дæр бакодтой бæрæг куыст. Вакцинаци кæныны дæр сæ куыст уыд ахадæн. Цæвиттон, фаднизы ныхмæ 6-æм мæймæ вакцинаци скодтой 500 стурæн. Хъыгагæн, хуыниз сарæх æмæ дзы мæлгæ дæр акодта. Цæмæй уый ма парахат кæна, уый тыххæй рынчын хуыты баныгæдтой, йæ арф 2 метры кæмæн уыд, ахæм уæрмы Стыркомы хъæуы.
Уымæй дарддæр ма сæм æрбаиу кодтой горæты ветеринарон фадыг æмæ сæ бæрны сты дыууæ базар æмæ «Солнечный» æмæ дзы æрвылбон дæр куысты лæуд сты Тыджыты Дианæ, Уалыты Фатимæ, Гатыгкоты Еленæ, Бесаты Каринæ. Ацы фадыджы ветдохтыр у Миндиашвили Еленæ. Уыдон сæйрагдæр куыст у, базары цы дзидза чи уæй кæнынц, уый гъæд рабæрæг кæнын. Дзидза æнæниз куы уа, уæд йæ хицауæн лæвæрд цæуы гæххæтт, реализацийæн бæззон кæй у, уый тыххæй. Иудзырдæй, ветеринарон сæйраг дохтыр æмæ йæ дæлбаруæвæг кусджытæн сæ разы ис дзæвгар скъуыддзаггæнинаг хæстæ æмæ сæ рæстæгыл ахицæн кæныныл кусынц зæрдиагæй.
Хуыбиаты Никъала
Comments are closed, but trackbacks and pingbacks are open.