Алæмæттаг у Хуссар Ирыстоны æрдз, адæймаг æм кæсынæй не фсæды, кæддæриддæр дзы исы æхцондзинад. Йæ хъæздыгдзинады иу хай у хъæд, уым та зайы бæлæсты алыгъуызон мыггæгтæ: наз æмæ нæзы, тæгæр, сусхъæд, фæрв, тулдз, сывылдз, æнгуз, кæрз, бæрз æмæ æндæртæ. Уыдонæй алкæмæн дæр ис йæхи хиæдтæ æмæ хорзæрдæм æндавынц адæймаджы æнæниздзинадыл. Уæвгæ, куыд хорз у хъæды сатæг уæлдæфы аулæфын, бæрзонд æмæ дардыл цы пæлæхсар бæлас ныззылд, уый размæ цы рæсугъд æмæ уазал дон абузы, уымæй дæ дойны басæттын. Кæй зæгъын æй хъæуы, æрдзы ахæм стыр хæзнайыл хъæуы аудын, йæ фæзуат ын къаддæр нæ, фæлæ фылдæр кæнын. Уæд ноджы тынгдæр уыдзæн йæ ахадындзинад æмæ нысаниуæг адæмон хæдзарады хицæн къабæзты. Раст у, бæрæг аххосæгтæм гæсгæ нæ хъæды фæзуаты иу хай стæнæг вæййы, фæлæ уæддæр республикæйы Хъæды хæдзарады управлени æмæ хицæн æмбæстæгтæ æнувыд сты нæ хъæдыл, архайынц ын йæ сыгъдæгдзинадыл, йæ фæзуат ын алыгъуызон талатæй баххæст кæныныл.

Ахæм хæрзиуæгон æмæ æнæмæнгхъæуæг куыстытæ коллектив бакæны æрвылаз дæр æмæ йыл уый та æндавы хорзæрдæм. Фæстæ нæ фæлæууыд управлени ацы сезоны дæр. Цæвиттон, Ирыхъæуы сын цы талахъомылгæнæндон ис, уым 1,5 га æрцыд хуымгонд æмæ дзы 0,7 фæзуатыл байтыдтой 3 кг кæрзы тауинæгтæ, сау нæзыйы тауинаг-2 кг æмæ тæгæры тауинаг та 1,5 кг. Уымæй дарддæр ма сагъд æрцыдысты бæрзы талатæ 120 иуæджы. Тамаресы хъæуы ма управленийы коллектив хъæды культурæтæ баххæст кæ-ныны тыххæй бакодта ахсджиаг куыст æмæ уый фæстиуæгæн ам дæр бæрзы талатæ сагъд æрцыд 120 иуæджы, Къуернеты хъæуы та – нæзыйы талатæ ныссагъдæуыд 750 иуæджы. Управленийы разамынд ма бацархайдта Цæгат Ирыстонæй цалдæр хуызы талатæ бынатмæ æрласыныл дæр, номхуындæй та сырх тулдзы талатæ æрластой 700 иуæджы æмæ сусхъæды талатæ та 300 иуæджы. Уыдон лæвар байуæрстой республикæйы организацитæ æмæ цæрджытæн, горæты администрацийæн æмæ сæ спайда кодтой сæ нысаниуæгмæ гæсгæ.

Хуыбиаты Н.

Comments are closed, but trackbacks and pingbacks are open.