Ивгъуыд аз, сæрдыгон улæфтыты рæстæджы, не ‘мбæстаг Битеты Тамерланы бинонтæ, йæ цардæмбал Тедеты Натия, йæ астаздзыд чызг  Сабинæ æмæ авдаздзыд фырт Давидимæ сфæнд кодтой Боржомы районмæ Натияйы ныййарджыты бабæрæг кæнын. Бæргæ хъæлдзæг æмæ æнæферохкæнгæ бонтæ  арвыстой  Натия æмæ йæ чысыл хуртæ сæ нана æмæ дадамæ уазæгуаты уæвгæйæ. Тынг сыл фæцин кодтой уыдон дæр, уæлдайдæр та уымæн, æмæ сæ хъæбулты кæй нæ федтой афæдзæй фылдæр, æмæ сæм ныр та æрцыдысты цыбыр рæстæгмæ — æрмæстдæр сæрдыгон иу мæйы æмгъуыдмæ.   Фæлæ-иу хъысмæты æвирхъау фæзилæнтæ исчи куы зонид… Натияйы зæрдæ дæр исты куы æнкъардтаид, цы йæм æнхъæлмæ каст разæй,  уæд, йæхи загъдау, йæ мад æмæ йæ фыдмæ ацæуыныл æппындæр никуы ахъуыды кодтаид.

Кæронмæ æрхæццæ сты сæрдыгон  улæфтбонтæ æмæ Натияйы хъуыд рацæуын, йæ чысыл хуртæ скъоламæ кæй хъуамæ бацыдаиккой, уый тыххæй. Натияйы фыд Гия йæ хъæбулты ракодта йæхи машинæйыл, йемæ ма ракодта йæ фырт Валодяйы дæр.  Æрдæгвæндагыл æгас бинонтæй карз фыдæлгъыстау фесты… Цæугæ цæуын Гияйы æрцахста зæрдæниз — инсульт. Йæ бон нал баци машинæ æруромын, уый нæ, фæлæ ма уый йæ тыхстæй   но-джы фæтынгдæр кодта тагъдад æмæ æгас бинонтæй йедзаг машинæ сæмбæлд бардюрыл, стæй атылд дæлбыл: Машинæйы æдæппæтæй уыдысты фондзæй иу би-нонтæй.

Ацы уæззау трагеди æрцыд Гуырдзыстоны территорийыл, Ларсы автотрассæйыл, милицийы постмæ хæстæг. Æрцæугæ цау йæхи цæстæй чи федта, уыдонæй æнхъæл ничи уыд æмæ ма ацы машинæйæ исчи сæрæгасæй аирвæрзтаид, фæлæ сæм уæддæр батагъд кодтой æххуысмæ. Бакодтой сын фыццаг æнæмæнгхъæугæ æххуыс, æмæ сæ уый фæстæ раластой æввахсдæр рынчындонмæ. Куыд рабæрæг, афтæмæй, бинонты фыд, шофыр Тедеты Гия фæмард бынаты, иннæтæ та се ‘ппæт дæр фесты удæн тæссаг цæфтæ.

Ныр рацыд фараст мæйы, фæлæ уыдонæй йæ къахыл ничима слæууыд. Ныртæккæ сусæггаг никæмæн у, уыдоны мæлæты дзæмбытæй кæй стыдтой Гуырдзыстоны професионалон дохтыртæ, уымæн æмæ авари дæр æрцыд Гуырдзыстоны территорийыл, кæд аварийы бахауджытæ не ‘мбæстæгтæ уыдысты, уæддæр.

Натияйæн кæд йæ ныййарджытæ Гуырдзыстоны баззадысты, уæддæр уый схъомыл ис Цхинвалы, каст фæци 6-æм астæуккаг скъола, уый фæстæ та ХИПУ-йы фæсарæйнаг æвзæгты факультет. Йæ цард баиу кодта ирон лæппу Битеты Тамерланимæ æмæ хъомыл кæнынц дыууæ хъæбулы. Фæстæдæр ма Натия бацыд ХИПУ-йы дыккаг дæсныйад райсынмæ æмæ ныртæккæ  у юридикон факультеты 4-æм курсы студенткæ. Йæ куыст кодта Мæскуыйаг микрорайоны сывæллæтты рæвдауæндоны хъомылгæнæгæй.

Аварийы фæстиуæгæн Натия фесæфта тынг бирæ туг, уымæ гæсгæ уымæн, фыццаджыдæр, хъуыд доноры туг бауадзын. Уый фæстæ та йын скодтой цалдæр уæззау операцийы йæ хуылфы дзаумæттыл, иу иннæмæй  тæссагдæр; игæрыл, масты дзæкъулыл, фарсылæвзагыл. Астæуыстæгыл æмæ агъды стджытыл дæр бахъуыд цалдæр операцийы, тынг цъæлтæ кæй уыдысты, уый тыххæй. Натия æртæ мæйы дæргъы уыд комæйы æмæ   дохтыртæ тох кодтой мæлæтæты дзæмбытæй йæ сласыныл.

Чысыл Давид дæр фæци тынг бирæ цæфтæ, асастысты йæ цæнг-тæ æмæ ма тасы фæстиуæгæн йæ-химæ нæ æмæ нæ цыд. Уый тыххæй уымæн нырма дæр кæнынц реабилитацион курс. Бинонтæй иууыл уæззаудæр цæфтæ фæцис чысыл Сабинæ. Уымæн  уыцы бонæй нырмæ йæ дзыхы ныхас ничи ма  фехъуыста. Цæфты фæстиуæгæн фондз мæйæ фылдæр уыд комæйы. Сабинæйæн ныцъцъæл сты йæ къæхтæ æмæ къухтæ, афаст йæ сæры кæхц, æмæ ма райста ноджы бирæ уæззау, цардæн тæссаг цæфтæ.

Ныр фараст мæйы Тбилисы професортæ æмæ уырдæм æндæр бæстæтæй кæй æрхуыдтой, уыцы дохтыртæ тох кæнынц Сабинæйы фæстæмæ цардмæ раздахыныл. Уыдон ын бакодтой æппæтварсон медицинон æххуыс, цæмæй йæ къахыл  слæууа, æмæ йæ сæры магъз дæр ма бахъыгдард уа. Кæй зæгъын æй хъæуы, ахæм хос скæнын уыд тынг вазыгджын, ахæм уавæрты бахауæг рынчынтæй сдзæбæх вæййы сæдæгай адæймæгтæй æрмæстдæр иу.  Уыдæттæ зонгæйæ, Гуырдзыстоны медиктæ уæддæр сæхимæ райстой уыцы вазыгджын хæс æмæ баныфс æвæрдтой, кæй схос кæндзысты Сабинæйæн. Абоны онг дæр чи банымайдзæн цал æмæ цал операцийы бафæрæзта чысыл Сабийы æнахъом организм, цал æмæ йæ  цал хатты стыдтой мæлæты дзæмбытæй йæ ирвæзынгæнджытæ… Æвæццæгæн, Стыр Хуыцамæ фехъуыстысты Сабинæйы æввахс хиуæтты, афтæ ма æгас Ирыстоны адæмы куывдтытæ æмæ æрæджы Сабинæ равдыста æцæг хъæбатырдзинад; райхъуыст аварийы бонæй фæстæмæ йæ фыццаг ныхас — мама, зæгъгæ.  Уый фæстæ ма, Натия куыд загъта, афтæмæй чысыл Саби сфæлхат кæны, цы дзырдтæ йын фæзæгъынц, уыдон. Уымæй уый бамбарын кодта йæ уарзон адæмæн, кæй уыдзæн семæ, йе ‘мбарынад æмæ йæ зонд дæр кæй сты æмбæлон æмвæзадыл.  Бауагъта алкæйы зæрдæйы дæр чысыл ныфс, кæй та уыдзæн раздæрау зондджын æмæ æвзыгъд чызг.

Ахæм æхсызгон хабар фехъусгæйæ, æвæццæгæн нæй гæнæн æмæ ма зæгъæм арфæйы ныхæстæ, Сабинæйы  ирвæзынгæнджытæн. Ахæм чысыл сабиты цард у адæймагæн йæ сæйраг мæт, уыдоны хъысмæтыл баст у нæ фидæн дæр, æмæ сыл ахæм уæззау хъуыддæгтæ бæргæ ма хъуамæ цæуид, фæлæ…

Ныртæккæ Натияйы уавæр дæр у бæрæг хуыздæр, кæд нырма раппæлинаг нæу, уæддæр. Уæлдæрзагъдгонд операциты фæстæ, цадæггай фæфидар ис йæ организм, фæлæ нырма йæ къæхтыл цæуын нæу йæ бон.  Йæ æгъдты стджытæ æгæр тынг цъæлтæ кæй уыдысты, уый тыххæй йæ хъæуы бирæ рæстæг, цæмæй æдæрсгæйæ слæууа къахыл. Ныртæккæ ис Тбилисы æмæ цæуы реабилитацион хосгæнæн курс.

Ахæм зын уавæртæй цæмæй рахызтаиккой не ‘мбæстæгтæ, ныртæккæ цы уавæры сты, уымæ, уый тыххæй сæ хъуыд тынг бирæ æхцайы фæрæзтæ. Кæй зæгъын æй хъæуы, алы бинонтæн нæу сæ бон уый бæрц фæрæзтæ самал кæнын æмæ уымæ гæсгæ, Битеты бинонтæ бахатыдысты не ‘мбæстæгтæм, куыд фæндыйы цæстæй чи нæ ракаст тыхст адæмы хъысмæтмæ, ахæмтæм, цæмæй сын бакæной финансон æхууыс. Мæнмæ гæсгæ, иунæг адæймаг дæр нæ ракаст куыдфæндыйы цæстæй, æвирхъау аварийы бахауæг бинонтæм æмæ кæмæн куыд йæ бон уыд, афтæ сын баххуыс кодтой. Нæ республикæйы раздæры президент Тыбылты Леонид сын рахицæн кодта президенты фондæй 200 мин сомы. Республикæйы алы куыстуæттæй бахастой æххуысы фондмæ æхцайы фæрæзтæ, Натия æмæ Тамерланы сыхæгтæ, æмгусджытæ,  æрвадæлтæ  æмæ ма сæ чидæриддæр зыдта, уыдон се ‘ппæт дæр баххуыс кодтой не ‘мбæстæгтæн сæ тыхст уавæры. Уый тыххæй сын Битеты бинонтæ зæгъынц стыр бузныг. «Сымах бакодтат махæн, аргъ кæмæн нæй, ахæм лæггад.  Макуы иу уæ мачи фæтыхсæд æнгæс уавæрты, ут кæддæриддæр æнæниз æмæ фыдбылызтæй хызт, куыд уæ хæдзæртты, афтæ-иу уæ фæндæгтæ дæр уæнт лæгъз æмæ арфæйаг», — арфæ кæнынц Битеты бинонтæ.

Ныр кæд фæндагонтранспортон цауы бахауджыты уавæр фæхуыздæр ис, уæддæр уыдонæн нырма бахъæудзæн тынг бирæ рæстæг, цæмæй сæхи банкъарой æнæнизæй, сдзурой æмæ æдæрсгæ цæуой сæ къæхтыл, æмæ сæ бахъæудзæн фæсарæнтæм акæнын. Уый тыххæй та сæ дарддæр дæр хъæудзæн æхцайы фæрæзтæ.  Ныронг уал уыдон бахардз кодтой цалдæр милуаны бæрц, æмæ курæг сты, кæд ма искæмæн йæ бон суаид æхцайы фæрæзтæй сын баххуыс кæнын уæд, æхцайы фæрæзтæ бангмæ азынцæн ис ахæм хыгъдмæ:

             Цæгат Ирыстоны Сбербанкы хай N 8632

               40817810960340081507     Кæнæ 7707083893

ХУЫГАТЫ Миленæ

Comments are closed, but trackbacks and pingbacks are open.