«Авд хатты сбар æмæ иу хатт алыг кæн»

Кæддæр, дам, иу лæг куырой сарæзта ахæм ран, цыран, дам, дон нæ уыд. Куы йæ афарстой, зæгъгæ, ацы бынаты куырой цæмæн сарæзтай, дон дзы куынæ ис, уæд уый дæр бакатай кодта æмæ сын загъта, зæгъгæ, дам, ыл раздæр куынæ   ахъуыды кодтон. Æмбисонд афтæ куы у,  «авд хатты сбар æмæ иу хатт алыг кæн», зæгъгæ.

Ацы æмбисонд мæ зæрдыл уымæн æрлæууыд æмæ 30 августы, æртыццæджы куыстмæ куы æрбацæйцыдыстæм ме ‘мкусæгимæ, уæд кæсæм æмæ  Мæскуыйы уынджы Профцæдисты хæдзар æмæ Цхинвалы типографы ‘хсæн дыууæ æвзонг нæлгоймаджы куыстой «зебра» кæй хонынц, уый аразыныл. Мах сæ цуры æрлæууыдыстæм æмæ сын дисгæнгæйæ бауайдзæф кодтам, зæгъын, ацы ран куыд аразут «зебра», кæд æмæ дзы ахизæн нæй, уæд. Уыдон нын сдзуапп кодтой, зæгъгæ, махæн ахæм бардзырд радта Паддзахадон автоинспекцийы къухдариуæгад æмæ йæ аразæм. Аразгæ дæр æй скодтой, фæлæ ныр дыууæ боны мæ хъус дарын æмæ уыцы «зебрайыл» уынджы иу фарсæй иннæмæ ахизгæ никæйы ма федтон. Æмæ дзы фистæгæй цæуджытæ куынæ пайда кæной, уæд æй цæмæн сарæзтой, кæй хъæуы? Æви рæсугъддзинады тыххæй арæзт æрцыд?

Кæй зæгъын æй хъæуы, светоформæ æввахс хъуамæ уа ахизæн фистæгæй цæуджытæн. Фæлæ ацы “зебра” светофорæй цалдæр метры дæрддзæгæн арæзт æрцыд. Светофор æвæрд ис Мæскуыйы уынджы æмæ Октябры уынгтæ кæм иу кæнынц, уым. “Зебра” кæм сарæзтой, уым дыууæрдыгæй дæр нæй газоныл  иннæ фарсмæ бахизæн. Газоныл та цæуыны бар нæй, иннæ ахæм къæвдабонты та газонтыл ахизæнтæ дæр нæ уыдзæн цъыфæй. Стæй дæр скъоладзау (уырдæм æввахс ис 3-æм астæуккаг скъола) тагъд тагъд куы фæцæйцæуа, уæд гæнæн ис æмæ йæхи скъуыра, уым цы бæлас æмæ цæджындз  ис, уыдоныл. Фарстæуы, цы зондæй арæзт æрцыд æнæмбæлон бынаты «зебра».

Банысан кæнын ма мæ фæнды уый дæр, æмæ кæд æндæр горæтты хъахъхъæд цæуынц «зебрайыл» ахизыны фæдыл фæндагон змæлды фæткойтæ, уæд уыцы фæткойты тыххæй, æвæц-цæгæн, цхинвайлаг шофыртæй бирæтæ хъусгæ дæр никуы фæкодтой. Уый афтæ кæй у, уымæн та махæй æвдисæн у  алчидæр. Стæм шофыр дын бауромдзæн «зебрайы» цур æмæ дæ ауадздзæн йæ разæй. Шофыртæй бирæтæ ахæм скъæрд акæнынц, раст сын цыма хæдтæхæг фæцæй ирвæзы. Цалдæр хатты та æвдисæн уыдтæн ахæм цау-тæн дæр, цæвиттон, фæндагæй иу фарсæй иннæмæ хизгæйæ-иу светофор куы сыгъд фистæгæйцæуджытæн, уæддæр-иу ахæм скъæрд акодтой иуæй-иу шофыртæ æмæ ма-иу адæймаг аирвæзт, æрмæстдæр йæ къæхты фæрцы.

Уæдæ, хуыздæр уаид æмæ ацы зебра арæзт куы æрцæуид Мæскуыйы æмæ Октябры уынгтæ кæм иу кæнынц, уым светоформæ æввахс. Иннæ-ахæм та Паддзахадон автоинспекцийы кусджытæ карздæр ахаст куы дариккой фæндагон æдасдзинады змæлды фæт-койтæ чи халы, уыцы шофырты ахасты. Афтæ куы уа, уæд нæм къаддæр уыдзæн шофырты аххосæй фæндагыл æрцæугæ æнамонд цаутæ дæр.

Уалыты В.