Хуссар Ирыстоны Тыбылты Алыксандры номыл паддзахадон университеты райдыдта ахуырадон акци «Хъусгæфыст» Ахуырдзинады дунеон боны сæраппонд.

Къуырийы дæргъы боны хайады æппæт факультетты студенттæ дæр исдзысты хайад акцийы.

ХИПУ-йы æхсæнадæмон æмгуыстады фæдыл проректор, уырыссаг æвзаджы кафедрæйы сæргълæууæг, Хуссар Ирыстоны уырыссаг æвзаг æмæ литературæйы ахуыргæнджыты ассоциацийы президент  Тедеты Залинæ банысан кодта, зæгъгæ, ацы бæрæгбон махæн нæ зæрдыл лæууын кæны æмæ æхсæнады хоны ахуырдзинад парахат кæныны сæраппонд фылдæр хъарутæ хардз кæнынмæ.

«Ахуырдзинад у сæрибардзинадмæ фæндаг, гоймагæн аргъ кæныны бындур, фæлæ æппæты ахсджиагдæр у, уый кæй æвдисы цæрджыты социалон-культурон рæзты æм-вæзад, ахуырдзинад у нæ фидæны бындур», — загъта Тедеты Залинæ. Уый банысан кодта, зæгъгæ, ахуырдзинад у сæрибар ныхасы иудзинадмæ фæндаг алы культурæйы дæр нырыккон дунейы. Йæ ныхæстæм гæсгæ, акцийы нысан у цæмæй студенттæм фæзына сæ ахуырдзинад бæрзонддæр кæныны фæндон.

Ахуырдзинады дунеон боны цытæн студенттæн раарфæ кæнын-мæ æрбацыд ахуырад æмæ зонады фарстыты фæдыл УФ-йы Президенты администрацийы уынаффæгæнæг Республикæ Хуссар Ирыстоны Теминæ Казахова, Хуссар Ирыстоны ахуырад æмæ зонады министры хæдивæг Гаглойты Элисæ.

Теминæ Казахова йæ ныхас аздæхта студенттæм арфæйы ныхæстимæ, æмæ банысан кодта, зæгъгæ, уыдонæн сæ ахуыргæнджытæ сты хуыздæр филологтæ æмæ сын бацамыдта, цæмæй «ахуыр кæной уыдон фæлтæрддзинад æмæ курдиатыл».

ХИПУ-йы ректор Тедеты Вадим загъта бузныджы ныхæстæ уырыссаг æвзаджы кафедрæйæн, ахуырадон акци кæй сорганизаци кодтой, уый тыххæй, студенттæн та загъта æнтысты фæндиæгтæ хъусгæфыст фысгæйæ.

Хъусгæфыст ауагъта уырыссаг æвзаджы кафедрæйы доцент Остъаты Джульеттæ. Акцийы организатор уыд уырыссаг æвзаджы кафедрæ Уырыссаг æвзаг æмæ литературæйы ассоциациимæ иумæ.

Æхсæнадæмон ахуырдзинады бон снысан кодта ЮНЕСКО 1966-æм азы «Æнæахуырдзинад аиуварс кæныны фæдыл Æппæтдунеон ахуырады министрты конференцийы бацамындмæ гæсгæ». Уый уагъд цыди 1965-æм азы сентябры Тегераны. Йæ нысан кæныны бон та у 8-æм сентябрь — ацы конференцийы цытджын æгъдауæй байгом кæныны бон.

***

Æхсæндунеон ахуырдзинады боны цытæн мадзæлттæ ацыдысты Хуссар Ирыстоны скъолаты дæр.

Цхинвалы фæндзæм скъолайы ацы бæрæгбон нысан кæнын бирæ азты дæргъы ссис хорз традици.

Æмæ абон, æгъдау куыд у, афтæ ахуырадон уагдоны æппæт сывæллæттæ дæр фыстой хъусгæфыстытæ, чысыл сочиненитæ.

Райдиан кълæсты ахуыргæнæг Мулдарты Аллæ сывæллæттимæ аныхас кодта ахæм темæйыл: «Цы нысан кæны абон, ахуырдзинад дæм уа, уый».

Скъоладзаутæ æхсызгонæй лæвæрдтой дзуаппытæ ахæм фарстытæн: Хъæуы æви нæ абон ахуырдзинад райсын? Нымæцон технологиты æнусы уый хъæуы, æви нæ? Сывæллæттæ цы хатдзæг сарæзтой, уый уыди ахæм: «Нырыккон æхсæнады ахуырдзинад у æнтысты бындур!».

Уырыссаг æвзаг æмæ литературæйы ахуыргæнæг Туаты Тамарæйы ныхæстæм гæсгæ, скъоладзаутæ сæхæдæг æрцыдысты ахæм хъуыдымæ, ома, адæймагмæ хъуамæ ахуырдзинад уа.

«Ацы бон ацы фарстыл хъуыды кæнынц Японы, Францы, Английы, Германы æмæ æндæр бæстæты цæрджытæ. Æхсызгон у зæрдæйæн, ацы бон мах нæхи кæй æнкъарæм иу стыр бинонты хуызæн», — загъта Туаты чызг. Уый ма йæ ныхасмæ бафтыдта, ахуырдзаутæй æнæрæдыдæй чи ныффыста йæ фыссинæгтæ, уыдон кæй райсдзысты скъолæйон грамотæтæ.

Comments are closed, but trackbacks and pingbacks are open.