Азылдысты Инвестпрограммæйы фæлгæтты арæзтцæуæг объекттыл

РХИ-йы Президент Бибылты Анатоли знон азылд, 2018 азæн РХИ-йы социалон-экономикон рæзтæн ахъазгæнæг Инвестицион программæйы фæлгæтты арæзтцæуæг объекттыл. Йемæ ма уыдысты Хицауады Сæрдар Пухаты Эрик, Арæзтад, архитектурæ æмæ цæрæнуатон-коммуналон хæдзарады министры хæстæ æххæстгæнæг Зæгъойты Эдуард, Цхинвалы администрацийы сæргълæууæг Коцты Алан, афтæ ма профилон ведомствоты къухдариуæггæнджытæ.

Райдианы паддзахады сæргълæууæг æмæ йе ‘мбæлццæттæ бабæрæг кодтой ЦАРЗ-ы микрорайоны арæзтцæуæг дыууæ фондзуæладзыгон хæдзары. Куыстытæ æххæст кæны арæзтадон компани «СТМ-ЮГ». Ныртæккæ аразджытæ æмбæрзынц фыццаг хæдзары фыццаг уæладзыг æмæ бындур та æвæрынц дыккаг хæдзарæн. Дыууæ цæрæн корпусы уыдзæнис 75 фатеры. Хæдзæрттæй сæ иумæ ракæндзысты Хъайтарты уынджы 118-æм аварион хæдзары цæрджыты, кæцыйæн разиан  чындæуыд 2008 азы августы хæсты рæс-тæджы.

Зæгъойты Эдуард куыд банысан кодта, афтæмæй арæзтцæуæг хæдзæртты фатерты фæзуæттæ зынгæ стырдæр уыдзысты, Цхинвалы цы бирæуæладзыгон хæдзæрттæ ис, уыдонæй. Объект эксплуатацимæ лæвæрд æрцæудзæн 2019 азы кæрон.

Арæзтады министры хæстæ æххæстгæнæджы ныхæстæм гæсгæ, подрядчикмæ претензитæ нæй, куыстытæ цæуынц графикмæ гæсгæ æмæ æмбæлон организацион æмвæзадыл. Арæзтадон æрмæджытæй сты ифтонг. Афтæ ма ифтонг сты техникæ æмæ кусджытæй дæр. Фæлæ ма Экологион, технологион æмæ арæзтадон хъусдарды комитеты сæрдар Къуылыхты Таймураз куыд зæгъы, афтæмæй подрядчик нырма не ‘рбавдыста, цы арæзтадон æрмæджытæй пайда кæнынц, уыдоны гъæды тыххæй сертификат.

Бибылты Анатоли хъусдарæг органтæ æмæ Арæзтадон министрады къухдариуæггæнджытæн загъта ахæм фиппаинаг, зæгъгæ, æнæмæнгхъæуæг у, ахæм уавæрты æнгом, æмархайд æмæ фарст оперативонæй скъуыддзаг кæнын. «Республикæйы архайы Стандартизаци æмæ метрологийы комитет, уымæн ис йæхи арæзтадон лаборатори. Зын нæу, арæзтадон æрмæджыты гъæд, цалынмæ сæ не спайдачындæуа, уæдмæ сбæрæг кæнын. Ацы куыст хъæуы оперативонæй æххæст кæнын», – загъта Президент.

Йæ рады подрядон организацийы минæвæрттæ ныфс бавæрдтой, æввахс рæстæджы кæй бавдисдзысты, Цæгат Ирыстонæй цы арæзтадон æрмæджытæ æрластой, уыдоны гъæды тыххæй сертификаттæ.

Гуыбаты æфсымæрты уынджы, цыран арæзт цæуынц банысангонд хæдзæрттæ, цæрджытимæ дæр аныхас кодта Бибылты Анатоли. Паддзахады сæргълæууæг аразджытæн радта конкретон хæслæвæрттæ, цæмæй æввахс рæстæджы райдайой, ам цы æртæ фондзуæладзыгон цæрæн хæдзары ис, уыдоны алыварс территориты схæрзарæзт кæныны фæдыл куыстытæ. Ацы куыстытæ æххæст æрцæудзысты Инвестпрограммæйы фæлгæтты æддейæ, «Дорэкспострой»-йы руаджы.

Азылды хайадисджытæ бацыдысты, Хъайтарты уынджы арæзт чи цæуы, уыцы ног цæрæн комплексмæ. Комплекс конд у дыууæ фондзуæладзыгон корпусæй æмæ сæ æдæппæт ис 200 фатеры. Хæдзæрттæй сæ иу цæттæ у цæрджыты дзы æрцæрын кæнынмæ. Дыккаг дæр у фæуынхъус, кæнынц ма дзы бæстгонгæнæн куыстытæ. Цæрæн комплекс эксплуатацимæ лæвæрд хъуамæ æрцæуа августы мæйы кæрон.

Паддзахады сæргълæууæг æвæрццаг аргъ скодта куыстыты гъæдæн æмæ горæты администрацийы раз хæс æрæвæрдта, цæмæй августы райдианмæ бæлвырд æрцæуа, ног хæдзæртты фатертæ лæвæрд кæмæн æрцæудзысты, уыцы бинонты номхыгъд. Горæты администрацийы сæрмагонд арæзт къамис хъуамæ ацы фарстыл куса æрвылбон дæр.

«Иууыл сæйрагдæр у, цæмæй цæрæнуат раст дих æрцæуа. Уый у махæн нæ фыццаградон хæс», – загъта Президент.

Уый ма базонгæ горæты хицæн инженерон хызæгты реконструкци куыд цæуы, уыимæ дæр. Цæвиттон, федта Нарты уынджы куыстытæ куыд цæуынц, уый. Паддзахадон-унитарон куыстуат «Водоканал»-ы сæйраг ин-женер Сиукъаты Иван куыд радзырдта, афтæмæй 8 июны уынгæй Фидауынгæнджыты уынгмæ фадыджы ма баззадис канализаци æмæ доны хызæгтæм баиу кæныны фараст хæдзары. Ацы куыстытæ фæуыдзысты мæйы кæронмæ.

Президент базонгæ, Цхинвалæн цæгатæрдыгæй арæзт чи ‘рцыд, уыцы медико-социалон центр цас цæттæ у, уыимæ дæр. 35 бынатæн чи у, уыцы иууæладзыгон бæстыхайы ма хъæуы чысыл куыстытæ бакæнын, афтæ территори дæр схæрзарæзт кæнын. Капиталон арæзтады управленийы минæвар куыд загъта, афтæмæй ныртæккæ подрядчик кусы, цы цухдзинæдтæ дзы рабæрæг, уыдон аиуварс кæныныл.

Гом  акционерон  æхсæнад  «Мегаполис-Т»-йы генералон директор Джуссойты Константин паддзахады сæргълæууæгæн ныфс бавæрд-та, цы куыстытæ ма дзы баззадис, уыдоны ацы мæйы кæронмæ кæй фæуыдзысты.

Президент аразджытæн бахæс кодта, цæмæй объекты алыварс территори æмбæлон уагмæ æркæной, горæты администрацийы разамынадæн та – цæмæй карздæрæй тох кæной, сосæвæндаджы былгæрæтты арæзтадон æмæ цардуагон брæттæ чи калынц, уыдоны ныхмæ. Ацы куыстмæ бакæнын хъæуы барадхъахъхъæнæг органты дæр.

Азылды фæстаг пункт уыдис Президенты резиденци Дзауы поселочы, цыран хуссарирыстойнаг арæзтадон фирмæ «Профи» кæны капиталон цалцæг. Ныртæккæ аразджытæ объекты æддаг къултæ сæрдынц, цоколы æмбæрзынц гранитæй, кæнынц бæстонгæнæн куыстытæ мидæгæй. Æдæппæтæй дзы кусынц 25 адæймаджы бæрц. Куыстытæ хъуамæ фæуой августы райдианмæ.

Бестауты Валя